Bahebelu 12 - KNTP

Lesa ye Shetu

¹ Onkao mambo atweba byo twazhokolokwa na jibumba jikatampe ja batumonyi ja byonka bino. Tutaye byonse bitunemena, ne abwa bundengamambo bupelawizha kwitukasankanya, tunyeme kapeela na mukoyo konka ko betutujila kulutwe.

² Kasa tutala kwi Yesu, ntangi ne kalumbulula wa lwitabilo lwetu, ye wakosejilemo mu bya kumanama pa musalabu na mambo alusekelo lwamutujilwe kulutwe ne kutaako muchima ku bumvu ne, kabiji pano waikala konka ku kuboko kwa kilujo kya jitanda ja Lesa.

³ Langulukai aye wakosejilemo pa kulengululwa ku bandengamambo kwa byonkabyo! Kuchiina amba mwa kakooka ne kupungila mu michima yenu.

⁴ Mukyangye kwibukanya bundengamambo kufika ne pa kwichila mashi enu pakulwa naabo.

⁵ Nanchi mwavulama alwa lutundaiko lo bemwambijile anweba byo muji baana amba, “Mwanami kechi usuule kufundwa kwa Nkambo ne, nangwa kupungila pa kulengululwa kwi aye ne.

⁶ Mambo aye Nkambo ufunda yeatemwa, kabiji upuma baana bonse bo atambula.”

⁷ Muchinchike mu bya malwa mambo Lesa ubena kwimuba byo boba na baana. Mambo ng'anyi mwana ye babula kufunda kwi shanji?

⁸ Pakuba umvwe ne kufundwa ne, byonka byoeboba baana bonse, abyo nanchi mwi baana ba mu bukende kechi mwi baana bakine ne.

⁹ Na mambo a kino, atweba twajinga na bashetu ba pano pantanda betufunjilenga, kabiji twibanemekelenga. Twafwainwa kukila kumunekenena Taata wa mipashi yetu ne kumona bumi!

¹⁰ Mambo abo bashetu betufunjilenga atweba moba acheche monka mo kibawamijile ku michima yabo; pakuba aye witufunda amba tumone byawama, amba tutambuleko kuzhila kwanji.

¹¹ Kufundwa konse kechi kuleeta lusekelo ne kana bulanda, pakuba kulutwe kwi abo bonse bakosela monka kwibaletela bipangwa bya mutende, bo bololoke.

Kwibafunda ne kwibajimuna

¹² Onkao mambo ololai maboko enu aleela ne ku kosesha manungo enu anekena!

¹³ Kabiji ololai mashinda a maulu enu, kuchiina amba usunkuta waketelumuna, poso amba abukiwe.

¹⁴ Mwesekeshe kwikala na mutende na bantu bonse ne buzhile nabo pamo, mambo pakubulwabo kafwako nangwa umo ukamumona Nkambo ne.

¹⁵ Jimukai kuchiina amba, nangwa umo wakabwela mu nyuma ne kufuma ku bupe bwa Lesa. Amba muzhazhi wa bululu wakeya kusapuka ne kwimukatazha ne bavula bakatamishiwa.

¹⁶ Amba kechi kwikale nangwa umo wa bulalelale nangwa wabula kuzhila nobe Isao ne, yenka wapoteshe bubeji bwanji na kijiilo kimo kya kajo.

¹⁷ Mambo anweba mwayuka amba, palutwe byo asakile kutambula mapesho, walengulwilwe mambo kechi wamwene jishinda ja kulapila ne, nangwa wakebeshetu na mipolo.

¹⁸ Mambo anweba kechi mwaiya ku mutumba ye bakonsha kukwatako wateemenenga na mujilo ne, nangwa ku kifichifichi ne, nangwa ku mfishi ne, nangwa ku kipuupu ne.

¹⁹ Ne ku kuvuma kwa ntolompita ne, nangwa ku jiwi jaubile abo bejumvwine basashijile amba, kechi jitwambile kyambo kikwabo ne,

²⁰ mambo bakankelwe kulondela awa mukambizho wapainwe amba, “Nangwatu nyama umvwe akunkuleko bamwase mabwe.”

²¹ Kine, kyamwekele kyajinga kyakatazha bingi kya moyo kyakuuba ne Mosesa mwine naye wa ambile amba, “Nauba bingi moyo ne kuzakama!”

²² Pakuba anweba mwaiya ku mutumba wa Ziona ne ku muzhi wa Lesa mumi, Yelusalema wa mwiulu, ne ku mabumba a bamalaika ba kukankalwa ne kubalwa.

²³ Ne ku kukonkana kwa bonse ne ku kipwilo kya babeji banembwa mwiulu. Ne kwi Lesa uchiba mambo a bonse ne ku mipashi ya bantu baoloka balumbululwa.

²⁴ Ne kwi Yesu, ng'ambi wa lulayang'ano lupya, ne ku mashi a kusansa a amba bulongo kukila a kwa Abela.

²⁵ Jimukai kechi mukaane awa ubena kwimwambila ne. Mambo aba bakaine kumvwa awa wibajimwine pano pantanda kechi bapulukile ne. Kine ne atweba kechi tukapuluka nangwa pacheche ne, umvwe twamuvundamina awa witufunda uji mwiulu!

²⁶ Pa kyokya kimye jiwi janji jatenkenye ntanda, pakuba pano aye walaya amba, “Kwashala jimo jonka jo nkatenkenya byonse kechi ntanda yonka ne, ne jiulu jiine najo pamo.”

²⁷ Kino kyambo kya kwamba amba, “kwashala jimo jonka,” kitubuula mambo a kufumya kwa byobya bintu bitenkena, byonkabya byalengelwe, amba abya bintu bibula kutenkena, bikale kikupu.

²⁸ Onkao mambo twikale ba kusanta byo twatambula bufumu bubula kutenkena, namba tumwingijile Lesa mingilo ya bupopweshi bwaitabilwa, na kumunemeka ne na kumwakamwa;

²⁹ mambo Lesa wetu ye mujilo usokang'ana.