Bahebelu 11 - KNTP

Lwitabilo

¹ Kabiji lwitabilo lo luketekelo lwa kine, amba abya byo twaketekela kumona bikamwekana, ko kuswa ne kwitaba kwa kubula kuzhinauka amba abya bibula kumwekana kine ko biji.

² Mambo mo monka mo bashimwijilwe bulongo bashakulu baakala.

³ Ko ku lwitabilo kotwayukila namba ntanda yalengelwe ku jiwi ja Lesa, ko kuuba amba ne byobya byo tumona kechi byalengelwe na abya bimweka ne.

⁴ Ko ku lwitabilo ko alambwile Abela kwi Lesa kitapisho kyalumbuluka kyakila kya kwa Kaina mu kuwama, momo ashimwijilwe amba waoloka, Lesa naye washimwine na mambo a bya bupe byanji. Kabiji ne pano ukyamba nangwa wafwa na mambo a lwitabilo lwanji.

⁵ Ko ku lwitabilo ko atuntulwilwe Enoka amba wakafwa. Ne aye kechi bamumwene ne mambo Lesa wamutuntulwile. Mambo kasa akyangye kutuntululwa bamushimwine amba, wamutokeshe Lesa pa muchima.

⁶ Kabiji kwa kubula lwitabilo kechi kyakonsheka kumutokesha Lesa pa muchima ne, mambo awa wiya kwi Lesa kyamufwainwa aye kwitaba amba ko aji, kabiji amba ye ufweta boba bamukeba.

⁷ Ko ku lwitabilo Nowa, byo bamujimwine kwi Lesa na mambo a bintu kasa bikyangye kumweka, pa kwakamwa Lesa, walengejile jimo bwato bwa kupulukilamo ba mukisemi kyanji ne aye mwine. Mo mo bazhachishiwe ba pano pantanda, ne Nowa waikele ke nswanyi wa bololoke bwa mu lwitabilo.

⁸ Ko ku lwitabilo Abulahama, byo aichilwe wakookejile kuya ku ntanda ingi yo akatambula ke buswanyi bwanji. Kabiji wayile kasa abula kuyuka ko abena kuya.

⁹ Ko ku lwitabilo ko aikajile ke mwenyi mu ntanda ya mulaye, kasa ekala mu matente ne Izaka ne Yakoba, banswanyi pamo ne aye ba mu yewa mulaye umo.

¹⁰ Mambo Abulahama watengejilenga muzhi uji na bitendekesho, Lesa mwine ye sendwe ne ntungi wa yeo muzhi.

¹¹ Ko ku lwitabilo ko amwenejile bulume aye Saala mwine bwa kwimita byo akijile pa myaka ya kusema. Aye wamulangulukile wamulayile amba, ye wakishinka.

¹² Onkao mambo kufuma mu muntu umo, naye wajinga nobe mufu, mwasemekelwe bavula pamo nobe kuvula kwa tubangabanga twa mwiulu, kabiji nobe kuvula kwa musenga uji ku kitulu kya kalunga ka mema.

¹³ Bano bonse bafwijile mu lwitabilo. Kechi batambwile bintu byalayilwe ne, bino bebimwenetu ne kwi bisekelela kasa baji kwalepa, ne kwitaba amba bo benyi kabiji bo bakang'enda pano pantanda.

¹⁴ Abo bamba bintu bya byonkabyo bamwesha amba babena kusaka kyalo kyabo abo bene.

¹⁵ Umvwe bateele michima ku kyokya kyalo kyo bafuminemo, inge bamwene mwa kubwelela monka.

¹⁶ Pakuba pano, basakisha kyalo kyakila mu kuwama, kya mwiulu. Onkao mambo aye Lesa kechi wauba bumvu kutelwa amba Lesa wabo ne, mambo wibanengezhezha jimo muzhi.

¹⁷ Ko ku lwitabilo ko alambwile Abulahama Izaka pa kwesekwa, kine yenkaye watambwile milaye washi akalambule mwananji yenkawa umo ye asemene.

¹⁸ Ye ye ba ambijile kwi Lesa amba, “Mwi Izaka momo ikatelelwa nkunwa yobe.”

¹⁹ Aye walangulukile amba, Lesa wakonsha kumusangula nangwa mu bafu, mo monka mo amutambwijile jibiji nobe mu kifwanyikizho.

²⁰ Ko ku lwitabilo Izaka ko ebapesheshe ba Yakoba ne Isao, na mambo a bintu bikamweka.

²¹ Ko ku lwitabilo Yakoba byo afwilenga ko ebapesheshe baana bonse babiji ba kwa Yosefwa, ne kupopwela Lesa kasa abandamina pa mukombo wanji.

²² Ko ku lwitabilo Yosefwa, byo ajinga pepi kufwa, ko a ambile na mambo akuviluka kwa bena Isalela ne kwibakambizha na mambo a bikupa byanji.

²³ Ko ku lwitabilo, pa kusemwa Mosesa ko ba mufiile ba ng'ondo basatu bansemi banji, mambo bamumwene amba mwana wa wamisha, kabiji kechi bachiine mukambizho wa mfumu ne.

²⁴ Ko ku lwitabilo, Mosesa pa kukoma ko akaine kutelwa amba ye mwana wakwa mwana Felo.

²⁵ Wasalulwile kumanama pamo na bantu ba Lesa, ne kukana wakaine kumona lusekelo lwa bundengamambo lwa myaka imo.

²⁶ Walangulukile amba matuka a kutukilwa pe Kilishitu awama kukila kuwama kwa bunonshi bwa Ijipita, mambo watajile ku mfweto ya kulutwe yo akafwetwa.

²⁷ Ko ku lwitabilo koashiile ntanda ya Ijipita, ne kuchiina bukaji bwa mfumu ne, mambo aye wachinchikile nobe wamwene aye ubula kumweka.

²⁸ Ko ku lwitabilo ko a ikajikiile kijiilo kya lupitailo, ne kusansa mashi, amba monaushi wa babeji kechi ebafikile bena Isalela ne.

²⁹ Ko ku lwitabilo koba abukile Kalunga Kachila nobe pa mushiji wauma, bino bena Ijipita byo baesekele kuuba byonkabyo, balobele bonse mu mema.

³⁰ Ko ku lwitabilo ko yaponene nsakwa ya Yeliko, byo beizhokolokele moba atanu na abiji.

³¹ Ko ku lwitabilo Lehaba pite ko abujile konaika pamo ne abo bamilengulwila, byo ebatambwijile mu mutende beyendejile ntanda.

³² Kabiji bikwabo byo nsakwamba bika? Mambo kimye kisakunkepela umvwe ng'ambe na mambo akwa Gidiona, ne akwa Balaka, ne akwa Samisonyi, ne akwa Yefita, ne akwa Davida, ne akwa Samwela, ne a bangauzhi.

³³ Mo mu lwitabilo abo mo bashinjile byalo bya mu bufumu bwavula, ne kufikizha bololoke, ne kutambula milaye, ne kushinka tunwa twa mabokwe,

³⁴ ne kuzhima bulume bwa mujilo, ne kupuluka ku bui bwa mpoko, ne kutambula bulume mu kunekena kwabo, ne kwaluka ke bilobo mu nkondo, ne kwiapanga mazhita a balwanyi.

³⁵ Banabakazhi nabo batambwile jibiji bafu babo na lusanguko. Bakwabo nabo bafwile na kumanyikwa, ne kukana mwa kupulukila, amba bakasanguke mu lusanguko lwakila mu kuwama.

³⁶ Bakwabo nabo be bamanyikile na kwibendeleka ne kwibapuma na bikote, ne na mfungwa ne mu tuleya.

³⁷ Ba ashilwe mabwe, bachibawilwe bipimvwa na so, batapilwe na mpoko. Bapitang'enenga mu biseba bya mikooko ne bya bambuzhi, bakajilwe, be bamanyikile, ne kwi bayanjisha.

³⁸ Bano bantu pano pantanda kechi pe bafwainjilwe ne, kasa bapitang'ana mungyetu ne mu mitumba, ne mu bibwe, ne mu mimbwa ya panshi.

³⁹ Ne bano bonse, nangwa bashimwinwe na mambo a lwitabilo lwabo, kechi batambwile kyalayilwe ne,

⁴⁰ mambo Lesa witumwena atweba kyakila mu kuwama, amba abo pakubula atweba kechi balumbululwe ne.