Bahebelu 10 - KNTP

¹ Mambo Mizhilo byo iji na kimvule kya bintu byawama bikeya; kechi kine kipasha kya byobya bine bintu ne, kechi yakonsha kwibalumbulula nangwa pachechetu aba bafwenya kwipi na byonkabyo bitapisho, byo balambula moba onse pa mwaka pa mwaka ne.

² Inge kyajinga byobyo aba bapopwela Lesa inge balekele kwibilambula. Mambo umvwe abo balambula batokeshiwa kala, inge kechi bakikala na michima ya kwizhachisha na mambo ne.

³ Pakuba mu byobya bitapisho mo mwajinga bya kwibavulula kulanguluka pa mambo, pa mwaka pa mwaka.

⁴ Mambo kechi kyakonsheka amba mashi a bang'ombe balume ne a bambuzhi afumye bundengamambo ne.

⁵ Onkao mambo Kilishitu byo aishile pano pantanda aye wa ambile amba, “Bitapisho ne milambo anweba kechi mwibisakile ne, kabiji mwannengezhezhe jimo mubiji.

⁶ Mu milambo ya kusoka ituntulu ne mu bitapisho bya bundengamambo, kechi mwamwenejilemo lusekelo ne.

⁷ Ponkapo na ambile namba, ‘Talai amiwa naiya, na kuuba kyaswa muchima wenu anweba Lesa, monka mo kyannembelwa mu buku wa Mizhilo.’”

⁸ Byo a ambile patanshi amba, “Bitapisho ne milambo ya kusoka ituntulu, ne bitapisho bya bundengamambo kechi mwibisakile ne, nangwa kumwenamo lusekelo ne,” nangwa bino bintu byalambulwa monka mwayila Mizhilo.

⁹ Ponkapo aye amba, “Talai amiwa naiya na kuuba kyaswa muchima wenu.” Aye ufumyapo bitapisho bitanshi ne kwikazhapo kya Kilishitu.

¹⁰ Ne mu kyonka kyaswa muchima wanji momo twazhijikilwa ponka pa kulambulwa kwa mubiji wa Yesu Kilishitu jimo jonka kikupu.

¹¹ Kabiji bang'anga bonse bemana pa juba, pa juba kasa bengila na kulambula javula bitapisho bimo byonka byabula kukonsha kufumya bubi nangwa pachechetu ne.

¹² Bino Kilishitu byo alambwile kitapisho kimo kyonka kya bubi kya myaka, waikajile ku kilujo kya Lesa.

¹³ Kasa apembelela kufuma ku kyokya kimye poso balwanyi banji ba kebalule ke kyakutulapo maulu anji.

¹⁴ Mambo na mulambo umo aye wibalumbulula kikupu aba bazhijikwa.

¹⁵ Kabiji ne aye Mupashi wa Wazhila naye witushimwina, byo apwisha kwamba amba,

¹⁶ “Luno lo lulayang'ano lo nkalayang'ana naabo pakupita aa moba, byo byaamba Nkambo. Nkabiika Mizhilo yami mu michima yabo, ne kwiinemba pa michima yabo kabiji ne pa milangwe yabo.”

¹⁷ Kabiji wa amba ne kikwabo amba, “Bubi bwabo ne mizhilulwila yabo kechi nkebivuluka jibiji nangwa pachechetu ne.”

¹⁸ Kuji lulekelo lwa bino, kechi kuji kulambula mulambo mukwabo wa bubi ne.

Tufwenye kwipi na Lesa

¹⁹ Onkao mambo anweba bakwetu byo twafwainwa kutwela na kuchinchika amwa mwazhila na mashi a Yesu,

²⁰ monka mu jishinda jipya jumi jo etushinkwijile ja kupita mu kipembe, ko kuuba amba mu mubiji wanji.

²¹ Ne byo tuji na ng'anga mukatampe wa luusa lwa pa nzubo ya Lesa.

²² Twayai tufwenye kwipi na muchima wa kine wayula lwitabilo lwa kubula kuzhinauka, na michima yetu kasa yatokeshiwa kala ku bubi bwituzhachisha ne mibiji yetu kasa ya ovwewa kala na mema atoka.

²³ Tukwachishe ku kwisolola kwa luketekelo lwetu kwa kubula kutelengela, mambo aye walayile ye wakishinka.

²⁴ Kabiji twilanguluke atweba bene na bene ne kwitundaika na butemwe ne na mingilo yawama.

²⁵ Kechi tuleke kupwila pamo, byo boba bamo ne. Poso kwikosesha atweba bene na bene, byo mwamona aja Juba kasa jibena kufwenya pepi.

²⁶ Mambo umvwe twalenga mambo a mulupata kasa twatambula kala maana a bukine, kechi kwakishala kitapisho kikwabo kya bubi ne.

²⁷ Poso luketekelo luleeta moyo wa kuchiina luzhachisho, ne mujilo wakatazha ukebaja balwanyi.

²⁸ Muntu walengulwile Mizhilo ya Mosesa wafwile kwakubula lusa pa byambo bya batumonyi babiji nangwa basatu.

²⁹ Pakuba anweba mwalanguluka byepi na mambo a lukabisho lukamufwainwa muntu ulengulula Mwana Lesa ne kulengulula mashi a lulayang'ano o azhijikilwamo amba, o atu kabiji umuba mwenga aye Mupashi wa Lesa wa bupe, kechi lukakijishemotu mu kukatazha nenyi?

³⁰ Mambo twamuyuka awa wa ambile amba, “Kushinkanya ko kwami, ne kulubula amiwa nkalubula.” Kabiji wa amba jibiji amba, “Nkambo ukebachibila bantu banji mambo abo.”

³¹ Kyo kintu kilengesha moyo kuponena mu maboko a Lesa mumi!

³² Bino vulukai oa moba atanshi, byo mwatambwile kyeya, mu oa moba mwatekenye ne kukosa mu nkondo ikatampe ya bya kumanama.

³³ Bimye bimo, bemubile mwenga mu bantu ne kwi mu manyika, kabiji bimye bikwabo mwakwatankene naabo baubilwe byonkabyo.

³⁴ Mambo anweba mwi bobijile lusa bajinga mu mfungwa, kabiji mwasangalele pa kwimupukula bintu byenu, byo mwayukile amba, anweba bene muji na bunonshi bwakila mu kuwama kabiji bwa myaka.

³⁵ Onkao mambo kechi mutaye kuchinchika kwenu ne, mambo kuji na mfweto ikatampe.

³⁶ Mambo kimufwainwa kutekanya, amba pa kupwisha kuuba kyaswa muchima wa Lesa mukatambule kyalayilwe.

³⁷ Mambo monka mwa ambila kinembelo amba, “Mambo kwakishala ka kimye kachechetu, awa wiya ukeya, kechi ukabanda ne.

³⁸ Bino mololoke wami ukamwena bumi mu lwitabilo; kabiji umvwe wabwela mu nyuma, muchima wami kechi ukamwenamo lusekelo mwi aye ne.”

³⁹ Bino atweba kechi twi boba babwela mu nyuma ne konaika ne, pakuba twi boba baji na lwitabilo lwa kupulusha mweo.