3 Yoano 1 - KNTP

¹ Amiwa mukulumpe. Kwi Ngayusa mutemwe, ye natemwa kya kine kine.

² Anweba batemwe, nalomba namba anweba mushukwe mu bintu byonse kabiji namba mwikale na butuntulu bwa mubiji, monka mo ashukilwa mupashi wenu.

³ Nasekejile bingi byo baishile balongo na kushimuna mambo a bukine bwenu, monka momwaikela mu bukine.

⁴ Nji na lusekelo lukatampe, pakumvwa amba baana bami baikala mu bukine.

Bamutakaika Ngayusa

⁵ Anweba batemwe, mubena kwingila mwingilo wakishinka mu byo mwibobila balongo ba mwi Nkambo, nangwa benyi.

⁶ Ne abo bashimuna kuno ku kipwilo na mambo a butemwe bwenu. Ne anweba mukooba bulongo umvwe mwibemanya pa lwendo lwabo mo kyafwainwa kwi Lesa.

⁷ Abo batatwile lwendo lwabo na mambo a jizhina ja Kilishitu, kwakubula kutambulapo kintu nangwa kimo kufuma ku Bangentila ne.

⁸ Onkao mambo atweba twafwainwa kukwasha bantu ba byonkabye, namba twikale bamingilo ba kwingila naabo mu mwingilo wa kwingijila bukine.

Diotelefesa ne Demeteliusa

⁹ Nanemba bimo ku kipwilo, bino Diotelefesa, watemwa buntangi, kechi waswa byo naamba ne.

¹⁰ Onkao mambo umvwe naiya, nkasolola mingilo yanji yonse yoabena kuuba, ya kwituneena byambo byatama. Kabiji kechi ubatu byonkabyotu ne, aye ukana ne kwibatambwila balongo, kabiji wibakanya ne boba basaka kwibatambwila, ne kwibapanga mu kipwilo.

¹¹ Anweba batemwe, kechi mulondele akya kyatama ne, pakuba londelaiko akya kyawama. Awa uba byawama ye wa kwa Lesa, awa uba byatama kechi wamumonapo Lesa ne.

¹² Bonse bantu bamushimuna bulongo Demeteliusa, bukine bwine bumushimuna nabo. Ne atweba tumushimuna pamo, ne anweba mwayuka amba kushimuna kwetu ko kwa kine.

Byapelaako

¹³ Nji na byavula bya kwimunembela, bino kechi nasaka kwibinemba na kinembesho ne na inki ne.

¹⁴ Naketekela kwimumona katataaka, bino tukesambe kasa twimona.

¹⁵ Mutende ekale ne anweba. Balunda nenu bonse bemwimuna. Bemunai bonse balunda netu pa muntu pa muntu.