2 Yoano 1 - KNTP

¹ Kufuma ku Mukulumpe. kwi Inamfumu wasalululwa ne baana banji, bonatemwa mu bukine, kabiji kechi amiwa yenkatu ne, ne abo bonse bayuka bya bukine,

² na mambo a bukine bonka bwaikala mwi atweba, kabiji bukekalanga mwi atweba myaka yonse.

³ Bupe, ne lusa, ne mutende, bifuma kwi Lesa Taata ne kwi Yesu Kilishitu Mwana Taata, bikale ne atweba, monka mu bukine ne mu butemwe.

Bukine ne butemwe

⁴ Amiwa nasekejile bingi byo nataaine baana benu bamo kasa benda mu bukine, byonka byoetukambizhizhe aye Taata.

⁵ Pano nemusashijila anweba ba inamfumu, kechi nobe ne munembela mukambizho mupya ne; poso yenkawa ye twajinga nanji ku ntendekelo, namba tutemwang'ane atweba bene na bene.

⁶ Kabiji buno bo butemwe, namba twende monka mwayila mikambizho yanji. Uno ye mukambizho monka mo mwaumvwijile ne ku ntendekelo amba mukendenga monka mu butemwe.

⁷ Mambo bajimbijimbi bavula bapalang'ena pano pantanda, bonkaba babula kwitaba kwiya kwa Yesu mu mubiji. Uno ye awa mujimbijimbi ne anti kilishitu.

⁸ Kasa mwikenkenta anweba bene, kuchiina amba mwakataya abya bintu byotwaingijile, mukatambule mfweto yonse.

⁹ Bonse baya kulutwe ne kwikala monka mu mafunjisho a Kilishitu ne, kechi baji na Lesa ne. Awa waikala mu mafunjisho ye uji ne Taata ne Mwana.

¹⁰ Umvwe umo waiya ko muji ne kuleeta luno lufunjisho ne, kechi mumutambule mu nzubo yenu ne, nangwa kumwimuna ne.

¹¹ Mambo awa wamwimuna ye wakwatankana nanji mu mingilo yanji yatama.

Bya kupezhako

¹² Nangwa nji na byavula bya kwimunembela, kechi nasaka kunemba pa pepala ne na inki ne; pakuba naketekela kwiya ko muji ne kwamba nenu kasa tutalang'ana, namba lusekelo lwetu lukafikile.

¹³ Baana ba kwa nyenga yenu wasalululwa bemwimuna.