2 Timoti 4 - KNTP

¹ Na kukambizha ku meso a Lesa, ne ku meso a Kilishitu Yesu, ye ukebachibila mambo bomi ne bafu, ne na mambo a kwiya kwanji, ne na mambo a bufumu bwanji,

² pa kusapwila mambo, kasa winengezhezha jimo pa kimye kyafwainwa ne pa kimye kyabula kufwainwa, wibalengulule, ne kwibakalukila, ne kwibatundaika, na kukooka muchima konse ne na lufunjisho.

³ Mambo kimye kikeya kyo bakabula kuswa mafunjisho alumbuluka, bino byo baji na matwi ababana, bakavuzha bafunjishi babo abo bene monka mwayila bya kusakasaka byabo.

⁴ Kabiji bakafutulwila matwi abo kungi kufuma ku bya bukine, ne kusendukila ku bishimitu.

⁵ Pakuba obewa wikale watekanya mu bintu byonse, kasa ukosa mu bya malwa, ne kwingila mwingilo wa busapwishi bwa Mambo Awama, ne kupwisha bulongo mingilo yobe.

Bya kumukwasha aye mwine

⁶ Mambo amiwa katataka mbena kuya na kwichilwa nobe mulambu, ne kimye kya kuyijijila kwami kyafika.

⁷ Nabalwenga bulwi bwawama, napwisha kala kikonkwanyi kyami, nabalamenga lwitabilo.

⁸ Pano bantujila kala munchinya wa bololoke, yeakampa mu joja juba aye Nkambo, mutonyi waoloka, kabiji kechi amiwa yenkatu ne, pakuba ne bonse batemwa kumweka kwanji.

⁹ Uteeshe muchima upelawizhe kwiya kuno konji.

¹⁰ Mambo Demasa wandeka kala, pa kutemwa bya pano pantanda, waya ku Tesalonika. Kelesense waya ku Ngalatiya, ne Titusa naye ku Dalamatiya.

¹¹ Nashalatu ne Luka yenka. Upitule ne Mako wiye nanji kuno, mambo aye unkwasha bulongo mu mingilo.

¹² Kabiji Tikikusa namutumine ku Efisesa.

¹³ Byo ukeyanga ukansendele awa munkukumba wami ye nashiile ku Toloasa kwi Kalupusa, ne mabuku nao, ne biseba bya binembelo byo bine.

¹⁴ Alekasanda sendwe wa mukuba wangubile byatama byavula; Nkambo ukamufweta monka mwayila mingilo yanji.

¹⁵ Ne obewa wafwainwa kujimuka na mambo a aye, mambo aye wibilengulwishetu byambo byetu.

¹⁶ Mu kwiambila kwami kutanshi, kafwako nangwa umo wang'ambijilepo ne, pakuba bonse bandekele, nalomba namba kino kechi kibatelelwe bu mambo ne.

¹⁷ Pakuba aye Nkambo waimene pamo ne amiwa na kunkosesha, amba monka mwi amiwa mambo asapwilwe ne kukumbana konse, Bangentila bonse beomvwe kabiji napokolwelwe mu kanwa ka bokwe.

¹⁸ Aye Nkambo ukampokolola ku mingilo yonse yatama, kabiji ukapulusha ne kumfikizha ku bufumu bwanji bwa mwiulu. Kwi aye kwikale lukumo myaka ne myaka. Amena.

Lwimu lwapelaako

¹⁹ Imuna Pilisila ne Akwila, ne ba munzubo ya Onesifolusa.

²⁰ Elasatusa washajile ku Kolinda, pakuba Tolofimusa namushiile ku Miletusa kasa akolwa.

²¹ Uteshe muchima kwiya kuno ba ng'ondo ba mashika kasa bakyangye kufika. Yubulusa wakwimuna, ne Pudensa, ne Linusa, ne Kaludya, ne balongo bonse bakwimuna.

²² Nkambo ekale na mupashi wobe. Bupe bwikale ne anweba.