2 Timoti 2 - KNTP

Mushilikale wawama wa kwa Kilishitu Yesu

¹ Byonkabyo obewa mwanami, ukose mu bupe buji mwi Kilishitu Yesu.

² Kabiji abya bintu byo wa umvwine kwi amiwa mukachi ka batumonyi bavula, ukebifikizhe byonkabyo ku bantu bakishinka, bonka bakakonsha kwibafunjisha ne bakwabo.

³ Obewa manama pamo ne amiwa, byo kyafwainwa mushilikale wawama wa kwa Kilishitu Yesu.

⁴ Kafwako mushilikale wikasankanya na bya kutabataba bya mu buno bumi ne, mambo usaka kumutokesha pa muchima aye wamunembele bushilikale.

⁵ Pamo byonkabyo, inge muntu waeseka kushindang'ana mu bisela, kechi akavwikwe munchinya ne, poso washindang'ana monka mwayila mizhilo.

⁶ Njimi wingila mwingilo ye wafwainwa kwikala mutanshi kujamo.

⁷ Languluka byo ng'amba, mambo Nkambo ukakupa maana a kumvwa byonse.

⁸ Kasa uvuluka Kilishitu Yesu, wasangukile mu bafu, wa mu lukunwa wa Davida, monka mwayila Mambo Awama ami.

⁹ Mo mo namanamina kufika ne ku mfungwa nobe kapondo. Bino mambo a Lesa kechi akaswa ne.

¹⁰ Onkao mambo o nebikosela byonse pa mambo a basalululwa, namba ne abo nabo batambule lupulukilo luji mwi Kilishitu Yesu ne lukumo lwa myaka pamo.

¹¹ Kino kyambo kyokya kishinka amba, “Umvwe twafwile nanji pamo, tukekala na bumi pamo ne aye.

¹² Umvwe twakosela mu bya malwa, tukekala nanji mu bufumu pamo. Umvwe twamukana, ne aye naye usa kuketukana;

¹³ Umvwe atweba twabula kwikala bakishinka, aye kasa aikala wakishinka; mambo kechi wakonsha kwikana aye mwine ne.”

Wamwingilo waitabilwa

¹⁴ Wibavulule bino bintu, ne kwibakambizha ku meso a Nkambo amba, kechi bapachike lupata lwa byambo ne, mambo lo lwatu, kabiji lwibavulang'anya aba bebyumvwa.

¹⁵ Kasa uteshakotu muchima ukefikizhe obewa mwine kwi Lesa, kasa walumbuluka, muntu wa mwingilo wabula ne kya kubilaako bumvu, kasa utwalatu bulongo mambo a bukine.

¹⁶ Chiina bya bu kyambeambe, mambo ba byobyo bayangatu mu bumbulwa kwakamwa Lesa.

¹⁷ Ne byambo byabo bikayanga na kufukula nobe kipwalonda. Mwi abo muji ba Haiminusa ne Filitusa.

¹⁸ Bo bapampuka ku bukine, kasa bamba amba, lusanguko lwapita kala kabiji babena konauna lwitabilo lwa bamo.

¹⁹ Nangwa byonkabyo kitendekesho kyakosa kya kwa Lesa kyaikajikwa, kiji na kano kayukilo amba, “Aye Nkambo wayuka banji” kabiji amba, “Bonse bateela jizhina ja Nkambo bafumeko ku bubi.”

²⁰ Mu nzubo ikatampe kechi mujitu bijiilo bya ngolode ne siliva byonka ne, muji ne bya bichi ne bya buchimba. Kabiji bimo bya mwingilo wa mushingi, bikwabo bya mwingilo wabula mushingi.

²¹ Byonkabyo umvwe muntu witokesha mwine ne kwifumya ku byatama, ukekala ke kijiilo kya mwingilo wa mushingi, kyazhijikwa, kyafwainwa kwingilako Nkambo kyanengezhiwa jimo mingilo yonse yawama.

²² Kabiji nyema bya lwiso bya bwanyike, ulonde bololoke, ne lwitabilo, ne butemwe, ne mutende, pamo na boba beta Nkambo na muchima watoka.

²³ Pakuba mepuzho a kukosama, ne a bulubi wiakaane, byo wayuka amba, aleeta lutobo.

²⁴ Kalume wa Nkambo kechi wafwainwa kutoboka ne. Poso ekale wakooka muchima ku bonse, wakonsha kufunjisha, watekanya,

²⁵ mu bukimote kasa ebolola aba bamulengulula, amba apo kampe Lesa ukebapa lulapilo luleeta maana a kuyukisha bya bukine.

²⁶ Kabiji amba balubuluke michima ne kufuma mu kakose ka Diabola, byo bakwatwa kwi aye mukuuba kyaswa muchima wanji.