2 Tesalonika 3 - KNTP

Tulombeshaipo

¹ Kyapelaako, anweba bakwetu, kasa mwitulombelela atweba, mambo a Nkambo ayenga kulutwe kwakubula kya kwiakanya ne, atumbijikwe monka mo obila ne mwi anweba.

² Kabiji namba tupokololwe ku bantu babi bakatazha. Mambo bonse kechi baji na lwitabilo ne.

³ Bino Nkambo ye wakishinka, kabiji ukemukosesha bulongo ne kwimulamwina kwi aye mubi.

⁴ Kabiji tuji na luketekelo mwi Nkambo na mambo a anweba namba, mu bena kwibyuba kabiji mukebyubanga abya bintu byo twimukambizha.

⁵ Pano aye Nkambo atangijile michima yenu mwayila butemwe bwa Lesa ne butekanye bufuma kwi Kilishitu.

Lujimuno na mambo a bukope

⁶ Anweba bakwetu, twimukambizha mu jizhina ja Nkambo yetu Yesu Kilishitu namba, mwabane naabo bonse balongo betu mwi Nkambo abo baikala na bukope bwa kwingila, ne kulondela mafunjisho o twimufunjishe atweba ne.

⁷ Mambo anweba bene mwayuka byo kimufwainwa kuuba abya byo mwamwene mwi atweba. Mambo kechi twajinga bankope byotwaikajilenga nenu ne.

⁸ Kabiji kechi twajiile kajo katuutu ka muntu nangwa umo ne. Pakuba twaingijilenga mwingilo wakosa ne wa malwa. Twaingijilenga bufuku ne mute kuchiina amba twakemukatazha.

⁹ Mambo kechi twabujile luusa lwakuuba amba anweba mwafwainwa kwitumwena bintu ne, bino twasakile kwikala ba kumwenako anweba amba mulondelenga mwi atweba.

¹⁰ Mambo ne byotwajinga nenu twimukambizhizhe kino namba, “umvwe muntu wakana kwingila kechi mu muleke aje ne.”

¹¹ Mambo twibomvwa bamo ba mwi anweba bankope, babula kusaka kwingila nangwa pachechetu ne, bino basakatu kwibiika mu mingilo ya bakwabo.

¹² Ba byonkabyo twibakambizha ne kwibajimuna mwi Nkambo Yesu Kilishitu namba, bekale ba kwingila mingilo mu kwimwena abo bene ne kajo ka kuja.

¹³ Pakuba anweba bakwetu, kechi mukooke mukuuba byawama ne.

¹⁴ Kabiji umvwe muntu wakana kukookela byotwanemba mu yo ino nkalata, ao muntu mu mukenkente bulongo, kechi mwikale mu lumvwang'ano ne aye ne, amone bumvu.

¹⁵ Bino kechi mu mumone nobe mulwanyi ne, poso kumufunda byafwainwa mulongo wetu.

Byambo bya kupezhako

¹⁶ Pano aye mwine Nkambo wa mutende, emupe mutende moba onse mu bintu byonse. Nkambo ekale ne anweba bonse.

¹⁷ Lwimu lwami amiwa Paulo. Na kuboko kwami amiwa mwine. Ko kayukilo mu makalata ami onse, byo byo nnemba.

¹⁸ Bupe bwa Nkambo yetu Yesu Kilishitu bwikale ne anweba bonse.