2 Tesalonika 1 - KNTP

¹ Paulo, ne Silivanusa ne Timoti. Ku kipwilo kya bena Tesalonika, kya mwi Lesa Taata wetu ne Nkambo Yesu Kilishitu.

² Bupe kwi anweba, ne mutende bifuma kwi Lesa Taata ne kwi Nkambo Yesu Kilishitu.

Buchiba mambo pa kwiya kwa Nkambo

³ Anweba bakwetu, atweba twafwainwatu kusanta kwi Lesa moba onse na mambo a anweba. Mambo kyo kituwamina kuuba, mambo lwitabilo lwenu lubena kukoma bingi, kabiji ne butemwe bwenu bo mwitemwa anweba bene na bene nabo bubena kuvula.

⁴ Onkao mambo atweba tubena kwitootela mwi anweba mu bipwilo bya Lesa, na mambo a lwitabilo lwenu ne butekanye bwenu, mu bya kupatwa kwenu konse ne bya malwa byo mumona.

⁵ Nakyo ko kayukilo kamwesha bunchiba mambo bwaoloka bwa Lesa amba, mukatelwe amba bo bafwainwa bufumu bwa Lesa, bo mumanamina ne anweba.

⁶ Mambo kyo kyaoloka kwi Lesa kwibalubwila bya malwa aba bemumwesha malwa,

⁷ ne kwimupa anweba mumona bya malwa kya kukokoloka pamo ne atweba, pa lumwekesho lwa Nkambo Yesu byo akafuma mwiulu na bamalaika ba bulume bwanji

⁸ mu mujilo uteema, kasa ashinkanya naabo babula kukookela Mambo Awama a Nkambo yetu Yesu.

⁹ Abo bakamona lukabisho lwa lonaiko lwa myaka, lwa kupangwa ku kilungi kya Nkambo ne ku lukumo lwa bulume bwanji,

¹⁰ mu joja juba byo akeya na kutumbijikilwa mu bazhijikwa banji ne kumukomoka ku bonse baitabila. Mambo ne anweba mwaitabijile kushimuna kwetu.

¹¹ Onkao mambo kyo kyo twimulombelela moba onse. Amba Lesa wetu akemulanguluke amba mwilufwainwa lwito lwenu. Ne kufikizha kusaka kwenu konse kwa buwame ne mingilo yonse ya lwitabilo na bulume.

¹² Amba jizhina ja Nkambo yetu Yesu jitumbijikilwe mwi anweba, ne anweba mwi aye, monka mwayila bupe bwa Lesa wetu ne bwa Nkambo Yesu Kilishitu.