2 Petelo 3 - KNTP

Kwiya kwa Kilishitu

¹ Pano anweba batemwe, ino yo nkalata ya bubiji kwimunembela, kabiji mu onse abiji mbusha michima yenu yawama ne kwimuvulula.

² Namba muvulukenga byambo byaambilwe kala ku bangauzhi bazhila, ne mukambizho wa Nkambo Mupulushi kupichila mu batumwa benu.

³ Patanshi kasa muyuka kino amba, mu moba akapelaako ba mwenga bakeya na myendeleko, kasa balondela bya lwiso lwabo

⁴ ne kwamba amba, “Mulaye wa kwiya kwanji uji kwepi? Mambo kufuma mu kimye kyo bafwile bashakulu betu, bintu byonse byaikala byonka byo byajinga kufuma ku ntendekelo ya lulengelo.”

⁵ Mambo bekivulama kino amba, kufuma ne kukala kwajinga bya mwiulu, ne ntanda yalengelwe ku mema, kufuma mu mema, na jiwi ja Lesa,

⁶ ko konka ku bino, ko yaonaikijile ntanda yajingapo, byo yalobele mu mema.

⁷ Pakuba bya mwiulu bya katataka ne ntanda, byalaminwa mujilo ku jiwi jimo jonka, kupembela juba ja kije ne ja lonaiko lwa bantu babula kwakamwa Lesa.

⁸ Bino anweba batemwe, kechi muvulame kino kintu kimo ne, namba kwi aye Nkambo juba jimo jauba nobe myaka kiumbi, ne myaka kiumbi yauba nobe juba jimo.

⁹ Aye Nkambo kechi wabanda ku mulaye wanji, byo balanguluka bamo mambo a kubanda ne. Pakuba wimutekenya muchima, byo abula kusaka nangwa umo amba onaike ne, poso amba bonse balapile.

¹⁰ Bino juba ja Nkambo jikeya nobe ngivi. Mo mo bikapita bya mwiulu na kiwowo kikatampe, ne bijimo bikasunguluka na kyuya kya malwa, ne ntanda ne mingilo yaingijilwapo ikasololwa patoka.

¹¹ Bino bintu, byo bikasunguluka byonse, mwafwainwa kwikala bantu ba byepi? Mwikale mu bwikalo bwa buzhile ne bwa kunemeka Lesa,

¹² byo mwikutengela ne kwikusakisha kwiya kwa juba ja Lesa, monka mukasungulukila bya mwiulu kasa bipya na mujilo, ne bijimo bikasunguluka na kyuya.

¹³ Pakuba atweba, monka mwayila mulaye wanji, tutengela bya mwiulu bipya ne ntanda ipya, mo bwaikala bololoke.

¹⁴ Onkao mambo, anweba batemwe, byo mutengela bino bintu, teshaikotu michima yenu, namba, mukatanwe mu mutende, kasa mwabulwa jitomya ne kaneneno ku meso anji.

¹⁵ Ne kulanguluka amba, butekanye bwa Nkambo yetu lo lupulukilo; monka mo emunembejile ne Paulo mulongo wetu mutemwe, monka mwayila maana oapelwe.

¹⁶ Imo mo anembela mu makalata anji onse kasa amba bino bintu. Mo muji bimo byakatazha kumvwa, byo bakondakanya babula maana ne babula kukosa, monka mobobila na binembelo bikwabo, ne kwionauna abo bene.

¹⁷ Onkao mambo, anweba batemwe, byo mwayukila jimo bino bintu jimukai, mwakatwalwa mungi na mafunjisho angi a bampupabizhila ne kufuma pomwaina pa kosa.

¹⁸ Bino kasa mukoma mu bupe ne mu maana a kumuyuka Nkambo ne Mupulushi wetu Yesu Kilishitu. Kwi aye kwikale lukumo ne pano ne myaka yonse. Amena.