2 Petelo 1 - KNTP

¹ Shimona Petelo, kalume ne mutumwa wa Yesu Kilishitu. Kwi abo batambula lwitabilo lwa bololoke pamo ne lwetu lwa monka mu bololoke bwa Lesa wetu ne Mupulushi Yesu Kilishitu.

² Bupe ne mutende bimuvujile anweba mu maana a kuyuka Lesa ne Yesu Nkambo yetu.

Kwitwa ne kusalululwa kwa bena kilishitu

³ Bulume bwanji bwa bu Lesa bwitupa byonse bya kwitukwasha mu bumi ne mu kunemeka Lesa kwetu, monka mu maana a kumuyuka aye witwichile mu lukumo lwanji mwine ne mu kulumbuluka kwanji.

⁴ Mo mo etupelejile milaye yanji ya buneme ne ikatampe iine amba, monka mu ino anweba bonse mwaluke ke ba kutambulako muchima wa bulesa, byo mwapuluka ku bubole buji pano pantanda na mambo a lwiso.

⁵ Na onka ano mambo, anweba bene muteeshekotu muchima, namba mu lwitabilo lwenu mu mwenemo kulumbuluka, kabiji mu kulumbuluka kwenu namo mu mwenemo maana,

⁶ ne mu maana enu namo mu mwenemo kwikanya, ne mu kwikanya kwenu namo mu mwenemo butekanye, ne mu butekanye bwenu namo mu mwenemo ku nemeka Lesa,

⁷ ne mu kunemeka Lesa kwenu namo mu mwenemo butemwe bwa kutemwa balongo, ne mu butemwe bwa kutemwa balongo namo mu mwenemo butemwe bwa kutemwa bonse.

⁸ Mambo umvwe bino bintu muji nabyo ne kuvula byavula, kechi mukekalatu ne, nangwa kubula kupanga bipangwa bya maana a kumuyuka Nkambo yetu Yesu Kilishitu ne.

⁹ Mambo aye wabula bino bintu ye mpofu, umonatu byonka biji pa bwipi, kasa avulama kutokeshiwa kwanji ku mambo anji a kala.

¹⁰ Onkao mambo balongo bami, teshaikotu muchima namba, kwitwa kwenu ne kusalululwa kwenu kwikale ke kwa kine, mambo umvwe mwauba bino bintu, kechi muketuntula ne.

¹¹ Mambo mo monka mo kikemupewa kutwela mu bufumu bwa myaka bwa Nkambo ne Mupulushi wetu Yesu Kilishitu.

¹² Onkao mambo amiwa nateshakotu muchima kwimuvulula bino bintu moba onse, nangwa mwibiyuka, ne kwikala mwaikajisha mu bukine bo muji naabo.

¹³ Amiwa nalanguluka namba kyo kyawama, byonkiji mu uno mubiji, kwimusunsunya pa kwimuvulula.

¹⁴ Kasa nayuka namba, kuvuulwa kwa uno mubiji wami kuji pepi, monka mo ang'ambijile Nkambo yetu, Yesu Kilishitu.

¹⁵ Kine, amiwa nkateshakotu muchima na kwimubula namba panyuma ya kufwa kwami mukebivulukenga bino bintu moba onse.

Bakamonyi bamwene na meso lukumo lwa Kilishitu

¹⁶ Mambo atweba byo twimubujile mambo a bulume ne kwiya kwa Nkambo yetu Yesu Kilishitu, kechi twalondejile bishimi byo bashimikile bantu mu kujimuka kwabo ne, bino atweba bene twi batumonyi ba kumona na meso lukumo lwanji lukatampe.

¹⁷ Mambo aye watambwile kwi Lesa Shanji, buneme ne lukumo, byo jaishile kwi aye jiwi jafumine ku alwa lukumo lukatampe lwakila, ja byonka bino amba, “Uno ye Mwanami ye natemwa, mo namwena lusekelo!”

¹⁸ Kabiji ne jino jiwi twijumvwine atweba bene byo jafumine mwiulu, byotwajinga nanji kuyewa mutumba wazhila.

¹⁹ Kabiji pano tuji na mambo o banembele bangauzhi alumbululwatu ke a kine kine; ku oo mambo umvwe mwatako muchima, nobe ku lampi uteema pafiita, poso bukakye, ne ntaanda wa kumakya akasaame mu michima yenu, mukooba bulongo.

²⁰ Kabiji patanshi muyuke kino amba, kafwako muntu wakonsha kulumbulula bya bungauzhi bya mu binembelo aye mwine ne.

²¹ Mambo bya bungauzhi kechi byaishile na kyaswa muchima wa muntu nangwa jimotu ne, bino bantu ba ambile byafumine kwi Lesa, monka mo bebatangijile ku Mupashi Wazhila.