2 kolinda 9 - KNTP

Bya bupe bya kukwasha bazhijikwa

¹ Pakuba na mambo a mwingilo wa kukwasha bazhijikwa, kechi kyamfwainwa amiwa kwimunembela ne.

² Mambo nayuka kuswa kwenu, kwandengela kwimutota kubena Makedonya namba, “Bena Akaya baswijiile jimo ne mwakawa.” Kabiji kizaku kyenu kibakolomona bavula ba mwi abo.

³ Byonkabyo natuma balongo betu, kuchiina amba, kwimutota kwetu kwakaluka ke kwatu mu kino kintu. Namba monka mo naambijile, mwikale benengezhezha jimo,

⁴ kuchiina amba, nangwa na kintu kya byepi, umvwe nkeya ko ko na bamo bena Makedonya, twakemutaana kasa mwabula kwinengezhezha jimo, atweba twakamona bumvu, (bumvu bwetu kechi bwenu ne) mu luno luketekelo.

⁵ Onkao mambo nalangulukile namba kyafwainwa kwibasashijila bakwetu, namba, batangilepo ko muji, ne kupwizhizha jimo bya bupe byenu byo mwalaile kala, namba bitujilwe jimo, bya bupetu kechi bya kukanjikizha ne.

⁶ Pakuba naamba kino namba, awa ukusa nkunwa icheche, ukanowa kajo kacheche; kabiji aye ukusa nkunwa yavula ukanowa kajo kavula.

⁷ Bonse pa muntu pa muntu bapane monka mo bafukwila mu michima yabo. Kechi bapane na butanyi ne, nangwa na mambo a kukanjikizha ne, mambo Lesa watemwa upana na lusekelo.

⁸ Kabiji Lesa wakonsha kwimumwena byawama byonse byavujisha, amba anweba mwikale babula kukajilwa kwa bintu byonse moba onse, mumone mwa kwingijila mingilo yonse yawama.

⁹ Monka mo kyanembelwa amba, “Aye wibipalang'anya, wapana ku bayanji; Bololoke bwanji bukekala myaka.”

¹⁰ Kabiji aye umumwena mbyaji nkunwa, ne kajo ka kuja, ukemumwena nkunwa yenu ya kubyala ne kwiivuzha, ne kuvuzha bipangwa bya bololoke bwenu.

¹¹ Ne anweba mukekala na byavula mu bintu byonse, mwikale na bupanyi bonse, bo bukavuzha sante kwi Lesa mu mingilo yetu.

¹² Mambo kwingila kwa ye uno mwingilo, kechi kukapelelatu ponka pa kukwasha bazhijikwa mu kukajilwa kwabo ne, kabiji kukavuzha ne sante kwi Lesa mu bavula.

¹³ Kabiji byo mwalumbulukila mu ye uno mwingilo bakatumbijika Lesa na mambo a kukookela kwa kwitabila kwenu mu Mambo Awama a Kilishitu, ne na mambo a bupanyi bwenu bwavula bwa kupana kwi abo ne ku bonse.

¹⁴ Ne abo bene nabo kasa bemusakisha ne kwimulombelela na mambo a bupe bwa Lesa bwavujisha bo muji naabo.

¹⁵ Sante ekale kwi Lesa na mambo a kya bupe kyanji kyabulwa ne mwa kwikilumbulwila.