2 kolinda 8 - KNTP

Bumpanyi bwa bena Kilishitu

¹ Anweba bakwetu, twasaka kwimubula na mambo a bupe bwa Lesa bwapewa ku bipwilo bya mu Makedonya.

² Mambo nangwa baesekwa na bya malwa byavula, bino lusekelo lwabo lwavujisha, ne bumpanyi bwabo bwavujisha, nangwa baji na buyanji bukatampe.

³ Mambo bapaine monka mwayila bulume bwabo, amiwa ne kamonyi, kine ne kukila pa bulume bwabo. Bapaine monka mobakasulukila bene,

⁴ kasa betusashijila na lusashijilo lukatampe na mambo a kwikalamo na lubaji mu kwibakwasha bazhijikwa.

⁵ Kabiji kechi byonka byotwaketekejile ne, nanchi patanshi bepaine bene kwi aye Nkambo, ne kwi atweba monka mu kyaswa muchima wa Lesa.

⁶ Onkao mambo twa musashijila Titusa amba, monka mo atatwijiile uno mwingilo, apwishishe monkamo buno bupe mwi anweba.

⁷ Kabiji byo muji naabyo byavula byakila, mu lwitabilo, ne na kwamba, ne na maana, ne na mukoyo, ne na butemwe bwa kwitutemwa atweba, twasaka namba muvujilwe ne mu buno bupe nabo pamo.

⁸ Kechi naamba na kwimukambizha ne, poso na mambo a kwibweseka bukine bwa butemwe bwenu na mukoyo wa bakwenu.

⁹ Mambo mwayuka bupe bwa Nkambo yetu Yesu Kilishitu, amba, nangwa wajinga munonshi, byonkabyo na mambo a anweba waalukile ke muyanji amba, anweba monka mu buyanji bwanji mwaluke ke banonshi.

¹⁰ Pano mu ano mambo nemubuula byo nalanguluka. Kimufwainwa anweba kupwisha akya kyo mwatatwile awa mwaka, kabiji kechi kwikyubatu konka ne, bino ne kwikiswishatu pamo.

¹¹ Pano pwishai bulongo mwingilo! Namba monka mo mwaikajile na muchima upelawizha kuswa, mupwishishe monka mo mwakonshesha kuubila.

¹² Mambo umvwe kuswa ko kuji, kya bupe kitabilwa monka mwayila byo aji nabyo muntu, kechi mwayila byo abula ne.

¹³ Mambo kechi naamba kino namba bakwenu bapeelelwe ne anweba munemenwe ne,

¹⁴ poso mwesakane namba, byenu byavula bya mu ano moba bikale ke byabo mu kukajilwa kwabo amba, byabo byavula nabyo bikekale ke byenu mu kukajilwa kwenu, namba mwesakane.

¹⁵ Monka mo kyanembelwa amba, “Aye wabungizhizhe byavula kechi wamwene byashajilepo ne, ne aye wabungizhizhe bicheche kechi wabujilwebyo ne.”

Mingilo yo bamutumijile Titusa na bakwabo

¹⁶ Bino sante ekale kwi Lesa, ye wabiika mukoyo umotu mu muchima wa kwa Titusa ne wami wa kwimuta muchima.

¹⁷ Mambo kine aye kechi waswatu na lusashijilo lwetu lonka ne, bino ne aye mwine byo aji na muchima wa mukoyo, waiya koko ko muji na kyaswa muchima wanji aye mwine.

¹⁸ Kabiji twamutuma pamo ne aye mulongo wetu ye batota mu busapwishi bwanji bwa Mambo Awama mu bipwilo byonse.

¹⁹ Kabiji kechi kyonkakyotu ne, aye bamutongwele ku bipwilo kwenda ne atweba mu ye uno mwingilo wa butemwe ye tubena kwingila mu kumuletela lukumo aye Nkambo ne mu kumwesha kuswa kwetu.

²⁰ Twauba byo byo, na mambo a kuchiina amba, baketunena bibi na mambo a byotubena kwingila na bino bya bupe byapainwe.

²¹ Mambo atweba twatesha muchima mukuuba byawama kechi ku meso a Nkambo konka ne, ne ku meso a bantu pamo.

²² Kabiji twibatuma ne na mulongo wetu mukwabo, ye twaeseka mu byavula kabiji aye wauba mukoyo mu bintu byavula, pakuba pano wakijisha kuuba mukoyo, na mambo a luketekelo lukatampe lo aji naalo mwi anweba.

²³ Pakuba Titusa, aye ye mukwetu mo tumvwang'ena, ye mukwetu motwingijila mwingilo wa kwimwingijila anweba; kabiji abo bakwabo, batumwa ku bipwilo, lo lukumo lwa Kilishitu.

²⁴ Onkao mambo mweshai ku bo bo bantu kiyukilo ku bipwilo kya butemwe bwenu ne kya kwimutota kwetu byo twimutotele.