2 kolinda 7 - KNTP

¹ Onkao mambo anweba batemwe, byo tuji na ino milaye, twitokeshe atweba bene ku bubipisho bonse bwa mubiji ne bwa mupashi, kasa tulumbulula buzhile bwetu na moyo wa kwakamwa Lesa.

Lusekelo lwa kwa Paulo

² Tushiilai mpunzha mu michima yenu. Kechi twaubilepo muntu nangwa umo byatama ne, nangwa kujimukila muntu nangwa umo ne.

³ Kechi naamba kino namba nemuzhachishe ne; mambo na ambile kala namba, anweba muji mu michima yetu nangwa mu lufu, nangwa mu kwikala na bumi.

⁴ Nachinchika bingi pa kwamba ne anweba; kabiji kwitota kwami kwa kwitotela mwi anweba ko kukatampe; pano muchima wami watundaikwa, wayujishatu paa na lutekenesho mu malwa etu onse.

⁵ Mambo byo twafikile mu Makedonya mibiji yetu kechi yamwene pa kukokolokela ne. Twamwene bya malwa konse konse; pangye pajinga bulwi, mukachi mwajinga moyo.

⁶ Nangwa byonkabyo aye Lesa, utekenesha balajika michima, witutekeneshe atweba pa kwiya Titusa.

⁷ Kabiji kechi kwiya kwanji konkatu ne, ne na lutekenesho lo amwene mwi anweba. Ne pa kwitubuula mambo a kunsakisha kwenu, ne kujila kwenu, ne lupata lwenu lwa kunkwasha amiwa; onkao mambo nasekejile bingi kyakila.

⁸ Mambo nangwa nemulengejile kuuba bulanda na nkalata yami, kechi kyangubishe bulanda ne, nangwa patanshi kyankwachile ku muchima, pakuba namona namba, aya nkalata imulengejile bulanda, byonkabyo bwajinga bwa kimye kimotu.

⁹ Pakuba pano nasekela, kechi na mambo a kwimubishatu bulanda ne, poso na mambo a kwimubisha bulanda bwimuletela kulapila. Mambo mwaubishiwe bulanda bwa mwayila bwina Lesa, amba kechi mushamwe mu kintu kimo na mambo a atweba ne.

¹⁰ Mambo bulanda bwa mwayila bwina Lesa butwala ku lulapilo luleeta lupulukilo, lo lulapilo lubula kuleeta kinyenge. Pakuba bulanda bwa pano pantanda butwala ku lufu.

¹¹ Mambo talai buno bulanda bwa mwayila bwina Lesa bo bwimulengeshe kuteshakotu muchima, kine ne kusaka kwibingisha, kine ne kwibuzhingijila bubi, kine ne kwakamwa, kine ne kunsakisha, kine ne kuuba mukoyo, kine ne kukabisha bubi! Mu byonse mwilumbulula amba, mwabinga mu ano mambo.

¹² Kabiji nangwa nemunembejile, kechi nanembele mambo a yewa waubile kyatama ne, nangwa na mambo a yewa waubilwe kyatama ne, poso mambo a kuuba amba, kwituteesha muchima kwenu kumweke kwi anweba ku meso a Lesa.

¹³ Onkao mambo twakwashiwa. Kabiji ne mu kukwashiwa kwetu twasekejile bingi kyakila na mambo a lusekelo lwa Titusa, mambo mwayikizhe muchima wanji anweba bonse.

¹⁴ Mambo nangwa nemutotele mu kintu nangwa kya byepi kwi aye, kechi nalengeshiwa bumvu ne. Kabiji byonse byo twimwambijile byajinga bya kine, byonkabyo ne kutota kwetu nako ko natotele kwi aye Titusa kwamwekele amba, kwa kine.

¹⁵ Ne butemwe bwanji kwi anweba pano bwavujisha bingi, byo alanguluka mambo a lukookela lwenu anweba bonse, byo mwamutambwijile na moyo ne kuzakama.

¹⁶ Nasekela mambo mu bintu byonse nemuketekela bulongo.