2 kolinda 6 - KNTP

¹ Kabiji byo twingila pamo ne Lesa, twimusashijila namba, kechi mutambule bupe bwa Lesa ke bwatu ne.

² Mambo aye wa amba amba; “Mu kimye kyaitabilwa nakuteelekele. Ne mu juba ja lupulukilo, nakukwashishe.” Umvwai! Pano po pa kimye kyaitabilwa. Talai, jino jo juba ja lupulukilo!

³ Kechi tubika bya kwituntulako bantu nangwa kimo ne, kuchiina amba mwingilo wetu wakanenwa bibi.

⁴ Bino mu bintu byonse kasa twilumbulula byo tuji bamingilo ya Lesa, mu kutekanya kwavula, ne mu bya malwa, ne mu bya kukajilwa, ne mu byakatazha.

⁵ Ne mu bipumo, ne mu bukaili, ne mu biwowo, ne mu mingilo yakosa, ne mu bya kutong'ama ne mu kukajilwa kajo.

⁶ Ne mu buwame, ne mu maana, ne mu kukooka muchima, ne mu lusa, ne mu Mupashi wa Lesa Wazhila, ne mu butemwe bwabula bujimbijimbi,

⁷ ne mu mambo a bukine ne mu bulume bwa Lesa, ne na byela bya nkondo bya bololoke mu kuboko kwa kilujo ne kwa kipiko.

⁸ Ne na lukumo ne kupelulwa, ne na kunenwa byatama ne kwitwambila byawama, nobe bajimbijimbi, nanchi twi bakine.

⁹ Nobe babula kuyukanyikwa, nanchi twi ba yukanyikwatu bulongo; nobe babena kufwa, nanchi talai twi bomi; nobe bafundwa, bino kwipayiwa ne;

¹⁰ nobe ba bulanda, nanchi tusekela moba onse, nobe bayanji, nanchi tunonkesha bavula nobe twabula byonse, nanchi twanonka byonse.

¹¹ Anweba bena Kolinda! Kanwa keetu kemwasamina, ne muchima wetu wimushinkukila kyabaya.

¹² Butemwe bwetu kechi bwimukepela ne; kana anweba bene butemwe bwenu bo bwimukepela.

¹³ Kabiji pano na mambo a kubwezha kyafwainwa, nemwambila nobe ng'ambila baana bami, namba ne anweba mushinkule michima yenu.

Nzubo yazhila ya kwa Lesa mumi

¹⁴ Kechi mwikase ku kikonkoji kimo na babula kwitabila ne, mambo bololoke ne bubi bwendang'ane pamo byepi? Nangwa kyeya ne mfishi byumvwang'ane pamo byepi?

¹⁵ Kabiji Kilishitu ne Beliala bapwane byepi? Nangwa waitabila etabanzhane byepi na wabula kwitabila?

¹⁶ Kabiji nzubo yazhila ya Lesa iswang'ane byepi na bankishi? Mambo atweba twi nzubo yazhila ya Lesa mumi! Monka mwa ambijile Lesa amba, “Amiwa nkekala mwi abo, ne kwenda mwi abo. Kabiji nkekala ke Lesa wabo, ne abo nabo bakekala ke bantu bami.”

¹⁷ Onkao mambo Nkambo wa amba amba, “Fumai mwi abo ne kwabana naabo. Ne kukwatako ku kyabipa nangwa kimo ne, ne amiwa nkemutambula.

¹⁸ Kabiji nkekala ke Shenu, ne anweba mukekala ke baana bami ba balume ne ba bakazhi, byo byamba Nkambo wa bulume bonse.”