2 kolinda 5 - KNTP

¹ Mambo twayuka namba umvwe tente wetu wa pano pantanda ye twaikalamo wapopololwa, tuji na kishimikwa kifuma kwi Lesa, yo nzubo yabulwa kushimikwa na maboko, ya myaka, ya mwiulu.

² Mambo kino kimye tubena kubinza, kasa tusakisha kuvwikwa na nzubo yetu ifuma mwiulu;

³ Umvwe twavwikwa kechi tukatanwa na bwamba ne.

⁴ Mambo atweba byo tukiji mu ye uno tente tubena kubinza, byotwanemenwa, kechi na mambo a kuuba amba, tuvuulwe ne, poso amba tuvwikwe kikwabo amba, akya kya lufu bekimine ku bumi.

⁵ Bino aye witunengezhezhe jimo kino, ye Lesa yenka witupele Mupashi wa Lesa wanji, ke bukikizhi.

⁶ Onkao mambo twachinchika moba onse, ne kuyuka twayuka namba, byo tuji mwetu mu mibiji, tuji kungi ne aye Nkambo.

⁷ Mambo twenda mu lwitabilo kechi na kumona na meso ne.

⁸ Twa amba namba, twachinchika, kabiji twaswa kwikala kungi na mubiji, ne kwikala kwetu konka kuji aye Nkambo.

⁹ Onkao mambo kabiji tuteshakotu muchima namba, nangwa kwetu nangwa kungi, twikale ba kumutokeshanga pa muchima.

¹⁰ Mambo atweba bonse tukamweka konka ku kipona kya kije kya Kilishitu, amba bonse pa muntu pa muntu, tukatambule mfweto ya bintu bya mu mibiji, monka mo twaubijile, nangwa byawama nangwa byatama.

Bulunda ne Lesa kupichila mwi Kilishitu

¹¹ Byonkabyo byo twayuka moyo wa kwakamwa Nkambo, tubena kwibasashijila bantu amba betabe. Bino aye Lesa wituyukishatu atweba kabiji naketekela namba twa sololwa patoka ne mu michima yenu pamo.

¹² Kechi tubena kweseka kwilumbulula jibiji kwi anweba ne, tubena kwimupa mwa kwitotela mwi atweba, namba mwikale na mwa kwibalondolwela aba betotela mu mmwenkelo ya muntu, kechi nabiji mu muchima wanji ne.

¹³ Mambo atweba nangwa twakonya, twakonya na mambo a Lesa, kabiji nangwa twi batekanya, twi batekanya na mambo a anweba.

¹⁴ Mambo butemwe bwa Kilishitu bo bwitwingijisha, mambo twayuka namba, umo byo afwijile bonse, nanchi bonse bafwile.

¹⁵ Kabiji wibafwijile bonse amba, bekala na bumi kechi bakiikajile abo bene ne poso bamwikajile aye wibafwijile ne kusanguka.

¹⁶ Byonkabyo pano kechi twakiyuka muntu mu buntunshi ne. Kabiji nangwa twayukile Kilishitu mu buntunshi, pakuba pano kechi twakimuyukilabo ne.

¹⁷ Onkao mambo umvwe muntu uji mwi Kilishitu, aye ke mulengwa mupya, bintu bya kala byapichijila, bya aluka ke bipya.

¹⁸ Kabiji bino byonse bifuma kwi Lesa, ye witupwainye ne aye mwine mwi Kilishitu, kabiji witupele mwingilo wa lupwaino.

¹⁹ Ko kuuba amba, Lesa wapwaine na ba pano pantanda mwi Kilishitu ne aye mwine, ne kwibatelela mizhilulwila yabo ne, kabiji wafikizhe byambo bya lupwaino kwi atweba.

²⁰ Byonkabyo atweba twi bantomesha ba Kilishitu, pamo nobe Lesa mwine wimusashijila mwi atweba. Twimusashijila na mambo a Kilishitu namba, pwanai ne Lesa.

²¹ Aye wabujile kuyuka bundengamambo bamwalwile ke bundengamambo na mambo a atweba, amba atweba twaluke ke bololoke bwa Lesa mwi aye.