2 kolinda 4 - KNTP

Kya buneme kiji mu kijiilo kya buchimba

¹ Onkao mambo byo tuji na ye uno mwingilo, monka mo twaubijilwe lusa, kechi tupungila ne.

² Kabiji twakana bintu byafyamika bya bumvu, kechi twenda mu bujimuku ne, nangwa kukwata mambo a Lesa na bujimbijimbi ne. Kabiji pa kusolola bya bukine patoka, twilumbulula ku michima ya bantu bonse ku meso a Lesa.

³ Pakuba inge mambo etu awama avwetwa, avwetwa kwi boba babena konaika.

⁴ Mwi abo lesa wa pano pantanda wiipofula michima ya babula kwitabila kuchiina amba, bakamona kyeya kya Mambo Awama a lukumo lwa Kilishitu, aye kipasha kya Lesa.

⁵ Mambo kechi tusapwila mambo etu atweba bene ne, tusapwila mambo a Kilishitu Yesu namba ye Nkambo, ne atweba twi bakalume benu na mambo a Yesu.

⁶ Mambo yenkaye Lesa wa ambile amba, “Kyeya kisamine mu mfishi!” Ye wasaamijile mu michima yetu, mu kupana kyeya kya maana a kuyuka lukumo lwa Lesa lwa mu kilungi kya Yesu Kilishitu.

⁷ Tuji na kino kya buneme mu bijiilo bya buchimba, amba bukata bwine bwa bulume bumweke byo buji bwa kwa Lesa, ne byo bubula kufuma mwi atweba.

⁸ Twafinwa konse konse, byonkabyo kechi twashinkilwatu ne, twasusubala, byonkabo kechi twasusubeshatu ne,

⁹ twapangwapangwa, byonkabyo kechi twashalatu bunke ne, twalapulwa panshi, byonkabyo kechi twaonaulwatu ne.

¹⁰ Bimye byonse kasa tusenda mu mibiji yetu lufu lwa Yesu, amba ne bumi bwa Yesu nabo bumweke mu mibiji yetu.

¹¹ Mambo atweba nangwa twi bomi tupanwa moba onse ku lufu pa mambo a Yesu, amba ne bumi bwa Yesu nabo bumwekele mu mibiji yetu ya lufu.

¹² Byonkabyo lufu lwingila mwi atweba, bino bumi bwingila mwi anweba.

¹³ Mambo pa kwikala na mupashi umo wa lwitabilo, monka mo kyanembelwa amba, “Naitabile, ko kwamba ko na ambile.” Ne atweba twaitabila, ko kwamba ko twamba.

¹⁴ Kasa twayuka namba awa wasangwile Nkambo Yesu uketusangula ne atweba pamo ne Yesu, kabiji uketufikizha pamo ne anweba mu kyenyi kyanji.

¹⁵ Mambo bintu byonse bimubilwa anweba, amba bupe pa kuvula mu baavula, buvuzhe sante mukuleeta lukumo kwi Lesa.

Bwikalo bwa mu lwitabilo

¹⁶ Onkao mambo kechi tupungila ne. Pakuba nangwa bumuntu bwetu bwa mubiji bubena kuya na konaika, bumuntu bwetu bwa mukachi bubena kusangulwa pa juba pa juba.

¹⁷ Mambo malwa etu apeela, a kakimye kamotu, abena kwitwingijila lukumo lwakijishatu kunema, lwa myaka.

¹⁸ Byo tubula kutala ku bintu bimweka, kana ku bibula kumweka. Mambo bintu bimweka byo bya bimye byapelelela, pakuba abya bibula kumweka byo bya myaka.