2 kolinda 3 - KNTP

Bakalume ba lulayang'ano lupya

¹ Nanchi tubena kutatula jibiji kwilumbulula atweba bene nyi? Nangwa kitufwainwa atweba kusaka makalata pamo na bakwabo a kwitulumbulula a kuleeta ko muji nangwa afuma kwi anweba nyi?

² Anweba mwi nkalata yetu, yanembwa mu michima yetu, ya yukanyikwa ne kutangwa ku bantu bonse.

³ Byo mwamweka bu nkalata ya Kilishitu, yaingijiwa kwi atweba. Kechi yanembwa na inki ne, poso na Mupashi wa Lesa mumi, kechi pa maselechi a mabwe ne, poso pa maselechi a michima ya bantu.

⁴ Ne luketekelo lwa byonkabyo tuji naalo mwi Kilishitu kwi Lesa.

⁵ Kechi na mambo a kuuba amba, twakonsha atweba bene kwilangulukila kintu amba kyafuma mwi atweba bene ne. Mambo kukonsha kwetu kufuma kwi Lesa;

⁶ ye witulenga amba tukonshe kwikala ke bamingilo ba mu lulayang'ano lupya, kechi ba binembelotu ne, nanchi na Mupashi wa Lesa. Mambo binembelotu bipayang'ana, pakuba Mupashi upana bumi.

⁷ Bino umvwe awa mwingilo wa lufu, ye banembele na kumankaula pa mabwe, waishile na lukumo, lwakuuba amba bena Isalela kechi bakonsheshe kutajijisha pa kilungi kya kwa Mosesa ne, mambo a lukumo lwa kilungi kyanji, lonka lwayilenga na kuzhimang'ana,

⁸ nanchi awa mwingilo wa na Mupashi akabulwe byepi kuuba lukumo lwakila?

⁹ Mambo umvwe mwingilo uleeta luzhachisho wajinga na lukumo, nanchi awa uleeta bololoke wakijishatu mu lukumo!

¹⁰ Mambo kine awa nangwa wajinga wa lukumo, pano kechi ukiji na lukumo ne, mambo a lukumo lujiipo lwakijisha.

¹¹ Mambo umvwe awa wapichilengatu wajinga na lukumo, kine kabiji awa waikajikwa kikupu wakila kwikala na lukumo.

¹² Onkao mambo, pa kwikala na luketekelo lwa byonkabyo, twachinchika bingi.

¹³ Kechi tuji nobe Mosesa wabikile mbuutwa pa kilungi kyanji ne, kuchiina amba, bena Isalela bakamona mpelo ya lolwa lukumo lwayilenga na kuzhimang'ana.

¹⁴ Bino michima yabo yakoseshiwe, mambo kufika ne ku juba ja lelo, pa kutanga lulayang'ano lwakala yonkaya mbuutwa ikiji ponka, mambo aya mbutwa ivwetulwapotu mwi Kilishitu.

¹⁵ Kabiji kufika ne ku juba ja lelo, pa kutanga mabuku a Mosesa, mbuutwa ikiji ponka pa michima yabo.

¹⁶ Pakuba muntu wa alulukila kwi Nkambo, mbuutwa ikavwetulwapo.

¹⁷ Bino “Nkambo” ye Mupashi; kabiji kuji Mupashi wa Nkambo, ko kuji ne bwana bwa bene.

¹⁸ Pakuba atweba bonse, bilungi kasa byavwetulwa, kasa tumona lukumo lwa Nkambo nobe mu katajilo, tubena kwalulwa mu kipasha kimo kyonka ne aye mwine, kufuma mu lukumo lumo kufika ne mu lukumo lukwabo, monka mo lufumina kwi Nkambo Mupashi wa Lesa.