2 kolinda 2 - KNTP

¹ Napwishishe kino mu muchima wami namba, kechi nkeye kwenu jibiji na kwimumvwisha bulanda ne.

² Mambo umvwe nemulengesha bulanda, kuji ng'anyi wa kunsangajika poso yenkawa ye naubisha bulanda?

³ Kabiji nanembele byonkabyo na mambo a kuchiina amba, pa kwiya nakamona bulanda ku bonkaba bafwainwa kunsangajika. Kabiji nemuketekela bonse bulongotu namba, lusekelo lwami lo lwenu anweba bonse.

⁴ Mambo mu bya lumanamo byavula ne bulanda bwa mu muchima mo nemunembejile na mipolo yavula, kechi na mambo a kuuba amba ne mubishe kinyenge ne, poso namba muyuke butemwe bukatampe bo nemutemwisha.

Kumulekela mambo awa walenga mambo

⁵ Pakuba umvwe umo waletele bulanda, kechi wandetejile amiwa yenka ne, bino mu jishinda jimo wimuletejile bulanda ne anweba bonse, naamba kino mambo kechi nasaka kubayisha kintu ne.

⁶ Muntu wa byonkabyo lwamuwaina lonkalwa lukabisho loatambula ku bavula.

⁷ Pano mwafwainwa kumulekela mambo ne kumutekenesha, kuchiina amba, wa byonkabyo wakafwijijila na bulanda bwavula.

⁸ Onkao mambo nemusashijila namba, pano mumweshe jibiji butemwe bwenu kwi aye.

⁹ Mambo na onka ano mambo o nanembejile, namba nemuyukishe, kana mwaswa kukookela mu bintu byonse.

¹⁰ Mambo kwiyewa ye mwalekela mambo, ne amiwa namulekelao pamo. Pakuba o nalekela amiwa, umvwe nalekela mambo, nealekela ku meso a Kilishitu na mambo a anweba.

¹¹ Kuchiina amba, Satana waketujimukila, mambo twayuka bya bujimuku bwanji.

Paulo mu Toloasa

¹² Byo naishile ku Toloasa na kusapwila Mambo Awama a Kilishitu, aye Nkambo wanshinkwijile kibelo.

¹³ Muchima wami bino kechi waikajile bulongo ne, na mambo a kubula kutanako Titusa mulongo wami. Kabiji ponkapo pa kwibashajikapo, nayile ku Makedonya.

Lushinjilo mwi Kilishitu

¹⁴ Bino sante ekale kwi Lesa! Ye witutangijila mu lushinjilo mwi Kilishitu moba onse, ne kusolwela mwi atweba bwema bwawama bwa maana a kumuyuka aye konse, konse.

¹⁵ Mambo atweba twi bwema bwawama bwa Kilishitu kwi Lesa, mwi abo babena kupuluka, ne mwi abo babena konaika.

¹⁶ Ku bamo twi bwema bwa lufu buleta lufu, ku bakwabo twi bwema bwa bumi buleta bumi. Kabiji ng'anyi wafikilamo mu bino bintu?

¹⁷ Mambo atweba kechi tuji pamo na bamo bavula basulwisha mambo a Lesa amba bamwenemo ne, pakuba atweba twambila mwi Kilishitu konka ku meso a Lesa byambo bibafwainwa bakishinka ne baatumwa kwi Lesa.