2 kolinda 13 - KNTP

Bya kwibajimuna ne lwimu lwapelaako

¹ Jino jo ja busatu jo mbena kwiya ko muji. Mu kanwa ka batumonyi babiji nangwa basatu byambo byonse bikalumbuluka.

² Abo balengele kala mambo ne bonse bakwabo pamo nebajimwijile jimo, kabiji ne pano, byonji kungi, nebajimuna ne jibiji pamo byonka byo naubile byo najinga nenu mu kimye kya bubiji, namba umvwe nkeya jibiji koko, kechi nkebaleka ne.

³ Byomubena kukeba kayukilo kyakuuba amba, Kilishitu ye wa amba mwi amiwa. Aye pa kwingila kwi anweba kechi wanekena ne, pakuba ye mwine wa bulume mwi anweba.

⁴ Mambo nangwa waipayilwe ku musalabu mu kunekena, waikala na bumi monka mu bulume bwa Lesa. Mambo ne atweba twi banekena mwi aye, byonkabyo kwi anweba tukekala nanji na bumi monka mubulume bwa Lesa.

⁵ Ipimai anweba bene, mumone kana muji mu bwikalo bwa mu lwitabilo, mwipime anweba bene. Nanchi anweba bene kechi mwiyuka amba Yesu Kilishitu uji mwi anweba nenyi? Kana apo kampe mwakankalwa kulumbuluka.

⁶ Kabiji naketekela namba, mukayuka amba, atweba kechi twabula kulumbuluka ne.

⁷ Kabiji twalomba kwi Lesa namba kechi mube kyatama nangwa kimo ne, kechi kyakuuba amba, atweba tumweke nobe twalumbuluka ne, poso kyakuuba amba, anweba mubeenga byawama, nangwa atweba twamweka nobe twabula kulumbuluka.

⁸ Mambo kechi twakonsha kukanya bukine ne, poso kwibukwasha.

⁹ Atweba tusekela byo tuji banekena ne anweba byo muji bakosa. Kabiji twalomba ne kino nakyo namba, mulumbulukishe.

¹⁰ Mambo mbena kunemba bino bintu byonji kungi mambo nachiina namba, byo nkeya nakemushintaukila pa kwimubila luusa loampele Nkambo lwakukomesha bantu kechi lwa konauna ne.

¹¹ Kyapelaako, anweba bakwetu, sekelai mulumbuluke; kasa mukosesha michima yenu, mwikale na muchima umo, ikalai mu mutende. Kabiji aye Lesa wa butemwe ne wa mutende ukekala neenu.

¹² Iimunai na lwimu lwazhila.

¹³ Bazhijikwa mwi Nkambo Yesu Kilishitu bonse bemwimuna.

¹⁴ Bupe bwa Nkambo Yesu Kilishitu, ne butemwe bwa Lesa, ne lumvwang'ano lwa Mupashi wa Lesa Wazhila, bikale ne anweba bonse.