2 kolinda 12 - KNTP

Lumwekesho lo amwene Paulo

¹ Kyamfwainwa amiwa kwitota nangwa kechi kyayilamo ne, kabiji nsakwamba ne pa bimwesho ne lumwekesho lwa Nkambo.

² Namuyuka muntu wa mwi Kilishitu, pano papita myaka jikumi na ina, (kana waji mu mubiji, kechi nayuka ne, nangwa wabujilwe mu mubiji, kechi nayuka ne, Lesa yewayuka) ao muntu washikwilwe mu jiulu ja busatu.

³ Kabiji nabwezhapo namba a o muntu (kana waji mu mubiji, kana wabujilwe mu mubiji, kechi nayuka ne, Lesa yewayuka,)

⁴ byo ashikwilwe mu Paladisa, ne kumvwa byambo byabulwa ne mwa kwibyambila, byazhila muntu kwibyamba.

⁵ Mukwimenako ao muntu byonkabyo nsa kwitota. Pakuba amiwa mwine kechi nketota ne, kana mu kunekena kwami.

⁶ Mambo nangwa nkasaka kwitota, kechi nkekala wakosama ne, mambo nkamba bya kine. Byonkabyo nekileka, kuchiina amba, muntu wakandangulukila kukila moammwena amiwa ne moang'umvwina.

⁷ Kabiji na mambo a kuchiina amba, naketumbijikisha na mambo a bukata bwine bwa lumwekesho, napeelwe mwiiba mu mubiji, ye muluwe wa Satana wa kumpumapuma, kuchiina amba naketumbijikisha.

⁸ Na mambo a kino kintu nasashijile aye Nkambo jisatu, namba kimfume.

⁹ Aye wang'ambijile amba, “Bupe bwami bwakuwaina, mambo mu kunekena mo bulumbulukila bulume bwami.” Onkao mambo nketotela mu kunekena kwami na lusekelo lukatampe, namba bulume bwa Kilishitu bwikale pe amiwa.

¹⁰ Mambo nasekela mu kunekena, ne mu bya kuntanchisha ku muchima, ne mu bya kukajilwa, ne mu kupatwa, ne mu bya kumanama, na mambo a Kilishitu. Mambo umvwe nanekena, po pongikala ke wakosa.

Kijikila kya kwa Paulo na mambo a bena Kolinda

¹¹ Naaluka ke wakosama: anweba yenu mwangubishakyo. Mambo nafwainwe kutotwa kwi anweba. Mambo kechi nashala panyuma kuboba “Batumwa bakila” nangwa mu kintu kimo ne, nangwa amiwa ne watu.

¹² Kine biyukilo bya mutumwa byaubilwe mwenu mu butekanye bonse, na biyukilo ne na bya kukumya ne na mingilo ya bulume.

¹³ Nanchi bemubile ng'anyi kintu kyatamine kyabujilwe kubiwa ku bipwilo bikwabo, kana mu kyonkakya kyo nabujile kwitwika pe anweba ne kwimunemena? Ndekelaiko ano mambo.

¹⁴ Talai, jino jo jabusatu jonji na muchima wa kwiya ko muji, kabiji kechi nkekala kisendwa kwi anweba ne, mambo kechi nkasaka bintu byenu ne, poso anweba bene. Mambo baana kechi bafwainwa kwibamwena bansemi ne, kana bansemi bo bafwainwa kwibamwena baana babo.

¹⁵ Amiwa nkataya byami byonse ne kwitaya amiwa mwine na lusekelo lukatampe na mambo a myeo yenu. Umvwe amiwa nemutemwisha kyakila, kabiji anweba ke muntemwe pacheche nyi?

¹⁶ Pakuba nangwa byonkabyo, amiwa mwine kechi najinga kisendwa kwi anweba ne; pakuba abo amba, nemujimukijile na bujimbijimbi ne kwimongola.

¹⁷ Nanchi nemujimukijile kupichila nangwa mu umo wa mu boba bo nemutumijile nyi?

¹⁸ Nasashijile Titusa kwimupempula ne kutuma namutumine na mulongo wetu mukwabo pamo. Nanchi aye Titusa wimujimukijile nyi? Nanchi kechi twaendelenga na mupashi umotu nenyi? Nanchi kechi twaendelenga mungayo imotu nenyi?

¹⁹ Apo anweba kampe mubena kulanguluka amba, tubena kwamba bya kwiwamisha atweba bene kwi anweba ne mu kino kimye? Kabiji ko ku meso a Lesa ko twambila mwi Kilishitu. Pakuba anweba batemwe, bintu byonse byo bya kwimukomesha.

²⁰ Mambo nachiina namba, apo kampe byo nkeya, nkemutaana kasa mwaikala na monabula kusakila, ne amiwa mwine nkataanwa kwi anweba na momwabula kusakila, kabiji nachiina namba kampe kukekala lutoobo, ne kichima, ne bukaji, ne bya bongozhi, ne miyebe, ne bya kutepeta, ne bya kwilundumika, ne biwowo.

²¹ Kabiji ne byo nkeya jibiji Lesa wami wakandengesha bumvu ku meso enu, kabiji nkajila na mambo a bavula balengele kala mambo, ne kulapila ku bubipisho, ne bulalelale, ne bya bunya byo baubile ne.