2 kolinda 11 - KNTP

Paulo ne batumwa ba bubela

¹ Inge mwakonsha kuntekeenya muchima mu kukosama kwami kucheche inge natemwa. Kine kabiji muntekeenye.

² Mambo amiwa nemumvwina mukao, ye mukao wa bwina Lesa, mambo nemwitabila mulume umo yenkaye Kilishitu, namba nkemufikizhe kwi aye bumuzhike bwawama.

³ Kabiji nachiina namba, nangwa na kya byepi, michima yenu yakabipishiwa ne kufuma kuyewa muchima umo ne wawama wata kwi Kilishitu, byonka byo amujimbaikile Evwa aye mulolo mu bujimuku bwanji.

⁴ Mambo anweba musendwatu bukiji umvwe umo waiya ko ko, usapwila Yesu ungi, ye twabujile kusapwila atweba, nangwa umvwe mwatambula mupashi ungi, ye mwabujile kutambula, nangwa mwaitaba mambo awama angi, o mwabujile kutambula!

⁵ Mambo nalanguluka namba, kechi nashala mu nyuma ku bo bo “Batumwa baakila,” nangwa pacheche ne.

⁶ Nangwa ne kilubi pa kwamba, kechi ne kilubi mu maana ne; monse, twikimwesha kino kuji anweba mu bintu byonse.

⁷ Nalengele mambo nyi byo nepelwile amiwa mwine namba anweba mutumbijikwe, byo nemusapwijile Mambo Awama a Lesa a kubula mfweto?

⁸ Nayibile ku bipwilo bikwabo, pa kutambula mfweto kwi abo, namba nemwingijile anweba.

⁹ Kabiji byo najinga nenu ne kukajilwa bintu, kechi namukatezhepo muntu nangwa umo ne, mambo balongo betu bafumine ku Makedonya, bampeele byonse byo nakajilwe. Mu byonse nekainye kwimukatazha, kabiji byonkabyo kechi nkemukatazha ne.

¹⁰ Monka mo bwaikela bukine bwa Kilishitu mwi amiwa, kafwako ukankaanya kuno kwitota kwami mumande a mu kyalo kya Akaya ne.

¹¹ Mambo ka? Na mambo a kubula kwimutemwa nyi? Lesa yewayuka byo nemutemwa.

¹² Kabiji akya kyonguba, kyo kyonka kyo nkooba, namba mfumye kya kunnenenako kwi aba bakeba kya kunnenenako, kuchiina amba bakamona mwa kwitotela nobe ne abo bengila byonka byo twingila ne atweba.

¹³ Mambo bantu ba byonkabyo bo batumwa ba bubela, bo bamingilo ya bujimbijimbi, kasa bealula nobe batumwa ba kwa Kilishitu.

¹⁴ Kabiji kino kechi kyokya kukumya ne, mambo ne Satana naye wialula nobe malaika wa kyeya!

¹⁵ Byonkabyo umvwe bamingilo yanji bealula nobe bamingilo ya bololoke kechi kyo kintu kikatampe ne. Kumpelo yabo kukekala monka mwayila mingilo yabo.

Bya malwa byo amwene Paulo mutumwa

¹⁶ Naamba jibiji namba, kafwako nangwa umo andanguluke amba, amiwa nakosama ne. Kabiji nangwa mwalanguluka byo byo, muntambule byonkabyo nobe nakosama, namba nketote pacheche.

¹⁷ (Akyo kyombena kwamba kechi mbena kwamba bifuma kwi Nkambo ne, mbena kwamba nobe mu kukosama, mu luketekelo luno lwa kwitota;

¹⁸ amo bavula byo betotela mu buntunshi, ne amiwa nketota pamo.)

¹⁹ Mambo anweba mwibatekenya bakosama na lusekelo, byo muji bamaana.

²⁰ Mambo anweba mwamutekenya muntu, nangwa wimuleeta mu buzha, nangwa wimuja, nangwa wimunyanchijila, nangwa witumbijika mwine, nangwa wimupuma pa kilungi!

²¹ Naamba bya kwilengesha bumvu, nobe twanekena! Byonkabyo monse monse mo achinchikila muntu na kwitota (naamba nobe nakosama,) byonkabyo ne amiwa nachinchika.

²² Umvwe bo ba Hebelu, ne amiwa pamo. Umvwe bo bena Isalela, ne amiwa pamo. Umvwe bo ba nkunwa ya Abulahama, ne amiwa pamo.

²³ Umvwe bo bamingilo ya Kilishitu (naamba nobe nakonya kala) amiwa nebakila, mu mingilo yakosa yakila mu kuvula, ne mu tuleya twakila mu kuvula, ne mu bipumo byavula kechi bya kubala ne, ne mu bya lufu javula.

²⁴ Bimye bitanu ku Bayudea natambwile bipumo makumi ana pabuula mambo,

²⁵ kabiji napuminwe ku tumama jisatu. Mabwe nao naaswa jimo. Kuloba mu mato nako bimye bisatu. Kabiji juba jimo bufuku ne mute, najinga pa mema.

²⁶ Kabiji ng'endo nayo yavula, ne mu bya lufu bya pa mikola, ne mu bya lufu bya ku tupondo, ne mu bya lufu bya ku bakwetu Bayudea, ne mu bya lufu bya ku Bangentila, ne mu bya lufu bya mu muzhi, ne mu bya lufu bya mungyetu, ne mu bya lufu bya pa kalunga kamema, ne mu bya lufu bya ku balongo betu babubela.

²⁷ Ne mu mingilo yakosa ne mu ya kumanama, ne mu kutong'ama kwavula, ne mu nzala ne mu kilaka, ne mu kuzhikilwa na nzala kwavula, ne mu mashika ne bwamba.

²⁸ Kabiji pa bikwabo byo nabula kutelaula, paji ne kyannemena moba onse, kyo kijikila kyami na mambo a bipwilo byonse.

²⁹ Ng'anyi wanekena ne amiwa kunekena ne? Ng'anyi ye batuntwisha ne amiwa muchima kupya munda ne?

³⁰ Umvwe kyafwainwa amiwa kwitota, nketota na mambo a bintu bya kunekena kwami.

³¹ Lesa ne Shanja Nkambo Yesu, ye utotwa myaka ne myaka, wayuka byo nabula kubepa.

³² Mu Damasakasa aye ndamakyalo wa kwa mfumu Aletasi wabikile ba kumbelamina ku bibelo bya muzhi wa Damasakasa mu kusaka kunkwata.

³³ Kabiji bakwetu bampishishe mu kipenze ne kungikizha pangye ya nsakwa mu kitumbe, kabiji napulukile mu maboko anji.