2 kolinda 10 - KNTP

Paulo walwiila mwingilo wanji

¹ Pano, amiwa mwine Paulo, nemusashijila na bukimote bwa Kilishitu ne na kukooka muchima kwanji, yenka amiwa napeela pakumweka ku meso enu, pakuba nchinchika kwi anweba umvwe nji kungi!

² Kine, nemusashijila namba, byo nkekala nenu, kechi mukandengele kuchinchika pamo nabyo naketekela kuchinchika ku bamo betulanguluka nobe twenda mwendela bantunshi ne.

³ Mambo nangwa twaikala pano panshi kechi tulwa mwayila buntunshi ne.

⁴ Mambo byela bya bulwi bwetu kechi byo bya buntunshi ne, nanchi byo bya bulume bukatampe bufuma kwi Lesa bwa kukundula masakwa akosa. Tukundula mapata a bubela;

⁵ mambo tukundula milanguluko ingi, ne byonse byalepa byaimikwa mu kukanya maana a Lesa, kasa tuleeta milanguluko yonse mu buzha bwa kukookela Kilishitu.

⁶ Kabiji twaikela jimo na muchima wa kukabisha milengulwila yonse, byo lukalumbuluka bulongo lukookelo lwenu.

⁷ Talai kubiji ku meso enu. Umvwe muntu wiketekela amba, ye wa kwa Kilishitu, alanguluke jibiji mu muchima wanji kino amba, byonka byo anji wa kwa Kilishitu, aye ne atweba byonkabyo twibakwa Kilishitu.

⁸ Mambo nangwa netote javula pacheche na mambo a luusa lwetu, lwapaine Nkambo na mambo a kwimukomesha, kechi na mambo a kwimonauna ne, kechi kikandengesha bumvu ne.

⁹ Naamba kino, kuchiina amba nakamweka nobe nasaka kwimuzakamisha na makalata ami.

¹⁰ Mambo abo bamba amba, “Makalata akwa Paulo akosa kabiji aji na bulume, pakuba mubiji wanji pa kumumona wakonyangala, ne byambo byanji byo byatu.”

¹¹ Ba byonkabyo balanguluke kino amba, byonka byotwamba byambo bya mu makalata umvwe tuji kungi, byo byo tuji ne mu byubilo pakumweka ku meso.

¹² Mambo atweba kechi twachinchika kwipima nangwa kwiesakanya ne abo bamo belumbulula bene ne. Pakuba abo byo bepima bene na bene ne kwiesakanya abo bene na bene, babula maana.

¹³ Pakuba atweba kechi tuketota kukila pa kipimo kyetu ne, poso monka mwayila bipimo byoetutongwejile Lesa, bifika ne ko muji anweba.

¹⁴ Mambo kechi tubena kukila pa bipimo byetu nobe kechi twaishile ko muji ne; mambo atweba twajinga batanshi kufika ko muji anweba na Mambo Awama a Kilishitu.

¹⁵ Kechi tubena kukila pa kikonkwanyi kyetu ne kwitotela mu mingilo ya bakwetu ne. Mambo twaketekela namba, pa kukoma lwitabilo lwenu, ne atweba tukakomena mwi anweba, kabiji ne mwingilo wetu ukayanga nakubaisha kufika ne kwalepa.

¹⁶ Namba tukasapwile Mambo Awama mu byalo biji kulutwe ne anweba, ne kwitotela mu kikonkwanyi kya mukwetu mu mingilo yaubilwa jimo ne.

¹⁷ Pakuba aye witota, etotele mwi Nkambo.

¹⁸ Mambo aye witota mwine kechi ye witabilwa ne, kana ye batota kwi Nkambo.