2 kolinda 1 - KNTP

¹ Paulo, mutumwa wa Kilishitu Yesu, monka mwaswila muchima wa Lesa, ne Timoti mulongo wetu. Ku kipwilo kya Lesa kiji mu Kolinda, ne ku bazhijikwa bonse baji mu Akaya monse.

² Bupe bwikale ne anweba ne mutende bifuma kwi Lesa Taata wetu ne Nkambo Yesu Kilishitu.

Paulo wasanchila Lesa

³ Atotwe Lesa, Shanja Nkambo yetu Yesu Kilishitu, Shanja bya lusa, Lesa wa lutekenesho lonse!

⁴ Ye witukwasha mu bya malwa byetu byonse, amba tukonshe kwibakwasha aba babena kumona bya malwa, bya misango ne misango, na bonkabwa bukwasho bo etukwasha naabo aye Lesa.

⁵ Mambo bya lumanamo bya Kilishitu byo bituvujila, byonkabyo ne bya bukwasho nabyo bituvujila pamo mwi Kilishitu.

⁶ Bino atweba inge twamona bya malwa, byo bya bukwasho bwenu ne lupulukilo lwenu, inge twamona bukwasho nakyo kyo kya bukwasho bwenu, bo bwimutekenesha pa kumanama lumanamo lumo pamo ne atweba.

⁷ Kabiji luketekelo lwetu lwa kwimuketekela anweba lwakosa; mambo twayuka namba, byonka byo mubena kushilang'ena ne atweba mu bya lumanamo, kabiji byonkabyo mukashilang'ena ne atweba, ne mu bya lutekenesho pamo.

⁸ Mambo anweba bakwetu, kechi twasaka namba, mubule kuyuka abya bya malwa byetu bitumwekejile mu Asha ne. Twannemenwe bingi kukila ne pa bulume bwetu, onkao mambo kechi twaketekejile kupuluka nangwa pacheche ne.

⁹ Kine, ne atweba bene michima yetu itubujile amba, tusa kufwa. Byonkabyo bino bitumwekejile amba, kechi twiketekele atweba bene ne, poso Lesa usangula bafu.

¹⁰ Aye witupokolwele ku lufu lukatampe lwa byonkabyo, kabiji uketupokolola, mwi aye mo twabiika luketekelo lwetu namba, ye uketupokololanga,

¹¹ ne anweba kasa mwitukwasha pamo na milombelo yenu. Namba bantu bavula basante na mambo a atweba ne a bibusa byo twapewa na mambo a milombelo ya bavula.

Paulo byo apimpwile kufuukula kwa lwendo lwanji

¹² Mambo kwitota kwetu ko ko kuno, ko kushimuna kwa jiwi ja mu michima yetu, amba mo mu buzhile ne mu bumuchima wa bukine bwa Lesa, momo twaikela pano pantanda, pakuba kwi anweba ko kwine, kechi mu maana a buntunshi ne, poso mu bupe bwa Lesa.

¹³ Mambo kechi twimunembela bintu bikwabo ne, poso byonka byo mwakonsha kutanga ne kumvwa, kabiji naketekela namba, muke byumvwisha bulongo,

¹⁴ byonka byo mwatatula kwituyuka amba, atweba twi kyenu kya kwitotelamo pamo byonka byo mukekala ne anweba ke kyetu kya kwitotelamo mu juba ja Nkambo yetu Yesu.

¹⁵ Kabiji najinga bingi na luketekelo mukino, nasakile patanshi kwiya ko muji namba, mukamwenemo mapesho ja bubiji.

¹⁶ Nasakile kwimupempula pa kuya ku Makedonya, kabiji ne pa kufuma ku Makedonya kwiya kwenu jikwabo namba, mukanshinjikinyeko pa lwendo lwami lwa kuya ku Yudea.

¹⁷ Nanchi pa kulanguluka byo byo, nalangulukile kyatu nyi? Nangwa nafuukwile, monka mwayila buntunshi namba, ngikale aku amba, “Ee, ee,” aku nako amba, “Ine, ine” pa kimye kimo nyi?

¹⁸ Pakuba Lesa byo aji wakishinka, ne byambo byetu byo twimwambila kechi biji bya kwamba amba, “Ee,” kabiji amba, “Ine” ine.

¹⁹ Mambo Mwana Lesa, Yesu Kilishitu, yenka ye twimusapwijile atweba, amiwa ne Silivanusa, ne Timoti, kechi wajinga wa kuzhinauka amba, “Ee”, kabiji amba, “Ine”, ine, pakuba mwi aye mwajingatu “Ee”.

²⁰ Mambo milaye ya Lesa, yonse yaikajikwa mwi aye. Onkao mambo mwi aye momo twambila namba, “Amena” mu kumuletela lukumo aye Lesa.

²¹ Pano aye Lesa ye witwikajika bonse, atweba ne anweba mwi Kilishitu. Kabiji aye Lesa ye witushinga manyi,

²² kabiji ye yenka witubika kayukilo, ne kwitupa Mupashi Wazhila mu michima yetu ke bukikizhi.

²³ Kabiji namwita Lesa namba ekale kamonyi wa bya mu muchima wami! Namba kimuwamijile anweba amiwa byo nabujile kwiya ku Kolinda.

²⁴ Kechi na mambo a kuuba amba, tuji na bunkambo bwa pa lwitabilo lwenu ne, twi bamwingilo pamo ne anweba mambo a lusekelo lwenu, byo mwakosela mu lwitabilo.