1 Yoano 5 - KNTP

Lushinjilo lwetu panopantanda

¹ Yense waitaba amba Yesu ye Kilishitu, ye wasemwa kwi Lesa, kabiji yense watemwa Taata watemwa ne yense wasemwa kwi aye.

² Mu kino mo motwayukila amba twibatemwa baana ba Lesa, pa kumutemwa Lesa ne kukookela mikambizho yanji.

³ Mambo kutemwa Lesa koko kuno, amba tulame mikambizho yanji. Ne mikambizho yanji kechi yakatazha ne,

⁴ mambo bonse basemwa kwi Lesa bashiinda panopantanda. Kabiji lushinjilo lwashiinda panopantanda, lo lwitabilo lwetu.

⁵ Kabiji ye ng'anyi muntu ushinda panopantanda? Kana yenka waitaba amba Yesu ye Mwana Lesa.

Kushimuna mambo a Yesu Kilishitu

⁶ Yesu Kilishitu ye waishile na mema ne na mashi. Kechi na mema onka ne kana na mema ne na mashi. Kabiji ne Mupashi naye ushimuna, mambo Mupashi ye bukine.

⁷ Mambo kuji bisatu bishimuna;

⁸ aye Mupashi, ne mema, ne mashi, ne bino bisatu byayila mumo.

⁹ Umvwe twatambula kushimuna kwa bantu, kushimuna kwa Lesa kwakila buneeme, kabiji aye Lesa wamushimuna Mwananji.

¹⁰ Awa wamwitabila Mwana Lesa uji na bukamonyi mwi aye mwine; aye wabula kwitabila Lesa, ye wamwalula ke wa bubela; mambo a kubula kwitaba kushimuna kwa Lesa ko a mushimuna Mwananji.

¹¹ Kabiji kushimuna kwanji koko kuno, amba Lesa witupele bumi bwa myaka, ne buno bumi buji monka mwi Mwananji.

¹² Awa uji na Mwana Lesa ye uji na bumi, kabiji aye wabula Mwana Lesa ye wabula bumi.

Bumi bwa myaka

¹³ Bino bintu nemunembela anweba mwaitabila mu jizhina ja Mwana Lesa namba muyuke amba tuji na bumi bwa myaka.

¹⁴ Kabiji luno lo luketekelo lotuji naalo mwi aye, amba umvwe twalomba kintu mwayila muchima wanji, aye witumvwa.

¹⁵ Kabiji umvwe twayuka namba aye witumvwa byonse byo twalomba, twayuka namba tuji nayo aya milombelo yo twalomba kwi aye.

¹⁶ Umvwe umo wamona mulongo wanji kasa alenga mambo abula kuleeta lufu ukalomba, ne aye Lesa ukamupa bumi bwa abo balenga mambo abula kuleeta lufu. Bino koaji mambo aleeta lufu. Kechi oo naamba namba, akalombe ne.

¹⁷ Bumbulwa koloka bonse bo bundengamambo, bino ko aji mambo abula kuleeta lufu.

¹⁸ Twayuka namba kafwako wasemwa kwi Lesa utwajijilatu na kulenga mambo ne, mambo aye wasemwa kwi Lesa bamulama, ne aye mubi kechi umuba kintu ne.

¹⁹ Twayuka namba twibakwa Lesa, nangwa ntanda yonse iji mu bulume bwa kwa aye mubi.

²⁰ Kabiji twayuka namba Mwana Lesa waiya kabiji witupa maana a kumuyuka Aye wa kine, ne atweba tuji mwi Aye wa kine, monka mwi aye Mwananji Yesu Kilishitu. Uno ye Lesa wa kine, kabiji buno bo bumi bwa myaka.

²¹ Anweba twana ilamai ku bankishi!