1 Yoano 4 - KNTP

Mupashi wa kine ne mupashi wa bubela

¹ Anweba batemwe kechi mwitabe mipashi yonse ne, ipimai mipashi kana yafuma kwi Lesa, mambo bangauzhi ba bubela bavula bapalang'ena pano pantanda.

² Mukino mo mukayukila Mupashi wa Lesa, mupashi yense waitaba amba Yesu Kilishitu waishile mu mubiji, ye wafuma kwi Lesa.

³ Bino mupashi yense wamukaana Yesu kechi ye wakwa Lesa ne. Ao ye mupashi wa anti kilishitu, ye mwaumvwine amba ukeya, kabiji waiya kala pano pantanda.

⁴ Anweba twana, mwi bakwa Lesa kabiji mwibashinda, mambo awa uji mwi anweba wamukila awa uji mu ba pano pantanda.

⁵ Aba bo ba pano pantanda, onkao mambo kyobambila bya pano pantanda, ne ba pano pantanda bebomvwina.

⁶ Atweba twibakwa Lesa. Aye wamuyuka Lesa witumvwa atweba, aye wabula kwikala wakwa Lesa kechi witumvwa atweba ne. Mukino mo motwayukila Mupashi wa bukine ne mupashi wa bubela.

Lesa ye butemwe

⁷ Anweba batemwe, twitemwe atweba bene na bene, mambo butemwe bufuma kwi Lesa, ne bonse batemwang'ana basemwa kwi Lesa kabiji bamuyuka Lesa.

⁸ Awa wabula kutemwang'ana kechi wamuyuka Lesa ne, mambo Lesa ye butemwe.

⁹ Mukino mo mwasolokejile butemwe bwa Lesa mwi atweba, amba Lesa watumine Mwananji yenka awa umo panopantanda, amba twikale na bumi kupichila mwi aye.

¹⁰ Butemwe buji bino; kechi amba atweba twamutemenwe Lesa ne, poso amba aye witutemenwe atweba ne kutuma Mwananji amba ekale ke mfuto ya mambo etu.

¹¹ Anweba batemwe, Lesa byo etutemenwe byonkabyo, ne atweba twafwainwa kwitemwa atweba bene na bene.

¹² Kafwapo wamumwenepo Lesa ne, bino umvwe twitemwa atweba bene na bene, Lesa waikala mwi atweba, ne butemwe bwanji bwa lumbulukila mwi atweba.

¹³ Muno mo motwayukila namba twaikala mwi aye ne aye mwi atweba, mambo witupa Mupashi wanji.

¹⁴ Kabiji twamona ne kushimuna namba Taata watumine mwananji amba ekale ke mupulushi wa ba panopantanda.

¹⁵ Yense waitaba amba Yesu ye Mwana Lesa, Lesa waikala mwi aye, ne aye mwi Lesa.

¹⁶ Kabiji atweba twayuka ne kwitaba butemwe bo etutemwa Lesa. Lesa ye butemwe, ne aye waikala mu butemwe ye waikala mwi Lesa, ne Lesa waikala mwi aye.

¹⁷ Monka muno mo bwalumbulukila butemwe mwi atweba, pakuba amba tukekale na kuchinchika mu juba ja kije, mambo byonka byo aji, byo byo tuji ne atweba panopantanda.

¹⁸ Kechi muji moyo mu butemwe ne, pakuba butemwe bwalumbuluka bupanga moyo. Mambo moyo uji na lukabisho, kabiji yense uba moyo kechi walumbuluka mu butemwe ne.

¹⁹ Atweba twatemwang'ana mambo aye witutemenwe patanshi.

²⁰ Umvwe muntu waamba, amba “Namutemwa Lesa,” bino kasa ashikwa mulongo wanji, ye wa bubela. Mambo awa wabula kutemwa mulongo wanji yeamona, kechi wakonsha kutemwa Lesa yeabula kumona ne.

²¹ Kabiji uno ye mukambizho wafuma kwi aye, amba aye watemwa Lesa wafwainwa kutemwa ne mulongo wanji pamo.