1 Yoano 3 - KNTP

Baana ba Lesa

¹ Talai yewa musango wa butemwe bo etutemwa naabo Taata, byo twateelwa amba baana ba Lesa, kabiji kine byobyo tuji. Naonka ano mambo ba pano pantanda kechi betuyuka ne mambo ne Aye kechi bamuyukile ne.

² Anweba batemwe, pano twi baana ba Lesa, kabiji kikyangye kumwekesha byo tukekala. Bino twayuka namba byo akamweka Aye, tukapashang'ana nanji, mambo tukamumona byonka byo aji.

³ Kabiji bonse baji na luno luketekelo mwi Aye, betokesha bene byonka byoatoka Aye mwine.

⁴ Bonse balenga mambo bazhatwa pa kuzhilulula mizhilo, mambo bundengamambo ko kuzhilulula mizhilo.

⁵ Kabiji anweba mwayuka amba aye wamwekele amba afumye bubi kabiji amba mwi aye kechi muji bubi ne.

⁶ Kabiji yense waikala mwi aye kechi utwajijila na kulenga mambo ne; bino awa utwajijila na kulenga mambo kechi wamumona nangwa kumuyuka Lesa ne.

⁷ Anweba twana, kechi muleke nangwa umo emujimbaike ne. Awa uba byaoloka ye waoloka, byonka byo a oloka Aye mwine.

⁸ Awa utwajijila na kulenga mambo ye wa kwa Diabola, aye Diabola ye ndengamambo kufumatu ne ku ntendekelo. Onkao mambo Mwana Lesa kyokyo amwekejile amba onaune mingilo ya kwa Diabola.

⁹ Kafwako wasemwa kwi Lesa utwajijilatu na kulenga mambo ne, mambo lukunwa wa Lesa waikala mwi aye, kabiji mambo wasemwa kwi Lesa kechi utwajijilatu na kulenga mambo ne.

¹⁰ Mukino mo mwayukanyikilwa baana ba Lesa, ne baana ba Diabola, bonse babula kuuba bololoke kechi bo bakwa Lesa ne, nangwa aye wabula kutemwa mulongo wanji ne.

Mwitemwe anweba bene na bene

¹¹ Ano o mambo o mwaumvwine kufuma ku ntendekelo, amba twafwainwa kwitemwa atweba bene na bene.

¹² Kechi twafwainwa kwikala pamo nobe Kaina ne, wajinga mubi, waipayile mulongo wanji. Kabiji wamwipaijile ka? Mambo mingilo yanji yajinga yatama bino ya kwa mulongo wanji yajinga yawama.

¹³ Anweba balongo, kechi mukumye ne, umvwe bemushikwa kuba pano pantanda.

¹⁴ Twayuka namba twafuma mu lufu twapitaila mu bumi, mambo twibatemwa balongo betu. Awa wabula kutemwa mulongo wanji waikala mu lufu.

¹⁵ Awa washikwa mulongo wanji ye mbanzhi, kabiji mwayuka amba kafwako mbanzhi uji na bumi bwa myaka bwaikala mwi aye ne.

¹⁶ Mu kino mo twayukila butemwe byo buji, amba Kilishitu wapaine mweo wanji na mambo a atweba, kabiji ne atweba twafwainwa kwibapaina myeo yetu balongo betu!

¹⁷ Bino umwe umo uji na bya bunonshi bya pano pantanda kabiji wamona mulongo wanji wakajilwa, bino washinka muchima wanji ne kumuubila lusa ne, butemwe bwa Lesa bwaikala byepi mwi aye?

¹⁸ Anweba twana, kechi tutemwetu na byambo byonka ne, nangwa na lujimi yenka ine, kana mu byubilo ne mu bukine.

Kwikala bachinchika mwi Lesa

¹⁹ Monka muno mo tukayukila namba twi ba bukine, ne kukosesha michima yetu kwi aye.

²⁰ Umvwe michima yetu ituzhachisha, Lesa wakila michima yetu, kabiji wayuka byonse.

²¹ Anweba batemwe, umvwe michima yetu kwituzhachisha ne, twaikala na kuchinchika kwi Lesa.

²² Kabiji byonse byo tulomba tutambula kufuma kwi aye, mambo tulama mikambizho yanji ne kuuba byonka bimutokesha pa muchima wanji.

²³ Kabiji uno ye mukambizho wanji, amba twitabile mu jizhina ja Mwananji Yesu Kilishitu, ne kwitemwa atweba bene na bene, byonka byo etu kambizha aye mwine.

²⁴ Kabiji aye ulama mikambizho yanji ye waikala mwi aye, ne aye mwi abo. Monka muno mo twayukila amba waikala mwi atweba, na Mupashi ye etupeele.