1 Yoano 2 - KNTP

Kilishitu ye nkwasho wetu

¹ Anweba twana twami, nemunembela bino namba kechi mulenge mambo ne. Bino umvwe muntu walenga mambo, tuji na Nkwasho uji ne Taata, Yesu Kilishitu, waoloka.

² Aye ye mfuto ya mambo etu, kechi etu onka ne, ne aba pano pantanda ponse.

³ Kabiji monka muno mo twayukila namba twamuyuka, umvwe twalama mikambizho yanji.

⁴ Awa wamba amba, “Namuyuka” bino kasa abula kulama mikambizho yanji ye wabubela, ne bukine kechi buji mwi aye ne.

⁵ Pakuba awa ulama byambo byanji, kine mwi aye butemwe bwa Lesa bwalumbuluka. Monka muno motwayukila namba tuji mwi Kilishitu,

⁶ awa wamba amba waikala mwi Kilishitu wafwainwa kwenda byonka byo a endelenga Aye.

Mukambizho mupya

⁷ Anweba batemwe, kechi mbena kwimunembela mukambizho mupya ne, poso yenka mukambizho wa kala ye mwajinga nanji ne kuntendekelo. Awa mukambizho wa kala byo byambo byo mwaumvwine.

⁸ Nangwa byonkabyo, mukambizho ye mbena kwi munembela ye mupya, ye wa kine mwi Aye ne mwi anweba, mambo mfishi ibena kupita, ne kyeya kya kine kya saama kala.

⁹ Awa wamba amba uji mu kyeya, kasa ashikwa mulongo wanji, ukiji mu mfishi.

¹⁰ Awa wamutemwa mulongo wanji waikala mu kyeya, ne mwi aye kechi muji kya kwituntulako ne.

¹¹ Bino awa washikwa mulongo wanji uji mu mfishi ne kwenda mu mfishi, kabiji kechi wayuka ko abena kuya ne, mambo mfishi ya mupofula meso anji.

¹² Mbena kwimunembela anweba twana, mambo bemulekela mambo enu na mambo a jizhina janji.

¹³ Mbena kwimunembela, anweba bashaabo, mambo mwamuyuka wa ku ntendekelo. Mbena kwimunembela, anweba bansongwalume, mambo mwamushinda aye mubi. Nemunembela, anweba banyike, mambo mwamuyuka aye Taata.

¹⁴ Mbena kwimunembela anweba, bashaabo, mambo mwamuyuka wa ku ntendekelo. Mbena kwi munembela anweba, bansongwalume, mambo mwakosa, ne mambo a Lesa aikala mwi anweba, ne anweba mwamushinda aye mubi.

¹⁵ Kechi mutemwe panopantanda nangwa bintu biji panopantanda ne. Umvwe muntu watemwa panopantanda, butemwe bwa kutemwa Taata kechi buji mwi aye ne.

¹⁶ Mambo byonse biji panopantanda lwiso lwa mubiji ne lwiso lwa meso ne kwitota kwatu kwa buno bumi, kechi bifuma kwi Taata ne pakuba byo bya panopantanda.

¹⁷ Kabiji panopantanda pabena kupita na lwiso lwapo, bino aye uba kyaswa muchima wa Lesa ukekala myaka ne myaka.

Anti kilishitu

¹⁸ Anweba baana, kino kyo kimye kyapelaako! Kabiji byonka byo mwaumvwine amba anti kilishitu ubena kwiya, ne pano ba anti kilishitu ba mweka kala bavula, po po twayukila namba kino kyo kimye kyapelaako.

¹⁹ Bafumine mwi atweba, bino kechi bajinga ba mwi atweba ne; mambo inge bajinga ba mwi atweba, bafwainwe kutwajijila ne atweba. Bino bafumine mwi atweba mu kwi bamwesha amba kechi bonse bo ba mwetu ne.

²⁰ Pakuba anweba mwashingwa kwi Aye Wazhila, kabiji bonse muji na buyuke.

²¹ Kechi mbena kwimunembela anweba, na mambo akubula kuyuka bukine ne, bino nemunembela mambo mwibuyuka, kabiji mambo kafwako bubela bufuma mu bukine ne.

²² Nanchi wa bubela ye ng'anyi? Kana bonkaba bakana amba Yesu kechi ye Kilishitu ne. Bano bo ba anti kilishitu, bonkaba bakana Taata ne Mwana.

²³ Mambo bonse bakana Mwana bakana ne Taata; abo bamwitabila Mwana baji ne Taata pamo.

²⁴ Onkao mambo lekai akya kyo mwaumvwine kufuma mu ntendekelo kikale mwi anweba. Akya kyo mwaumvwine umvwe kyaikala mwi anweba, ne anweba mukekala mwi aye Mwana ne mwi Taata.

²⁵ Kabiji uno ye mulaye ye etulayile, bo bumi bwa myaka ne myaka.

²⁶ Bino bintu ne munembela anweba na mambo aboba babena kweseka kwi mujimbaika.

²⁷ Pakuba akwa kushingwa ko mwatambwile kwi Aye kwaikala mwi anweba, kabiji anweba kechi musaka nangwa umo kwi mufunjisha ne. Bino akwa kushingwa byo kubena kwi mufunjisha mu byonse amba byo bya kine kabiji kechi muji bubela ne, byonka byo kwi mufunjisha. Ikalai mwi Aye.

²⁸ Kabiji pano, anweba twana, ikalainga mwi aye, namba byo akamweka tukekale bachinchika ne kuuba bumvu ku meso anji byoakeya ne.

²⁹ Umvwe mwayuka amba ye waoloka, mwafwainwa kuyuka kine amba bonse boba bololoke basemwa kwi aye.