1 Yoano 1 - KNTP

Byambo bya bumi

¹ Akya kyajinga mu ntendekelo, kyo twaumvwine, kyo twamwene na meso etu, kyo twatajishishe, ne kukwatako na maboko etu, kya Mambo a bumi.

² Ne abwa Bumi bwamwekele, kabiji twibumona, ne kushimuna twibushimuna, ne kwimubuula anweba abwa Bumi bwa myaka ne myaka, bo bwajinga ne Taata kabiji be bumwesheshe ne kwi atweba.

³ Akya kyo twamwene ne kumvwa, twimubuula ne anweba, namba mwikale pamo ne atweba mu lumvwang'ano lotuji naalo ne Taata ne Mwananji Yesu Kilishitu.

⁴ Kabiji twimunembela bino namba lusekelo lwetu lulumbuluke.

Lesa ye kyeya

⁵ Kabiji ano o mambo o twaumvwa kwi aye ne kwimubuula anweba, namba Lesa ye kyeya, ne mwi aye kechi muji mfishi nangwa pachechetu ne.

⁶ Umvwe twa amba namba tuji mu lumvwang'ano nanji kasa twenda mu mfishi, twabepa kabiji kechi tubena kuuba bya bukine ne.

⁷ Pakuba umvwe twenda mu kyeya byonka byo aji Aye mu kyeya, tuji mu lumvwang'ano atweba bene na bene, ne mashi a Yesu Mwananji etutokesha ku bundengamambo bonse.

⁸ Umvwe twa amba namba bundengamambo tufwabo, tubena kwijimbaika atweba bene, ne bukine kechi buji mwi atweba ne.

⁹ Umvwe twisolola mambo etu, Aye ye wakishinka ne koloka mu kwitulekelako mambo etu ne kwitutokesha ku bumbulwa koloka bonse.

¹⁰ Umvwe twa amba namba kechi twalenga mambo ne, twamwalula Aye ke wa bubela, ne Mambo anji kechi aji mwi atweba ne.