1 Timoti 6 - KNTP

Mambo a bazha

¹ Aba bonse baji mu kikonkoji kya buzha, balanguluke amba bankambo yabo bafwainwa mushingi yense amba, jizhina ja Lesa ne lufunjisho lwetu kechi binenwe bibi ne.

² Abo baji na bankambo yabo baitabila, kechi bebasuule mambo a kuuba amba, bo balongo betu ne; kana kwibengijila kyakila, mambo a kuuba amba, abo bamwenamo byawama mu mingilo yabo baitabila, kabiji bo batemwe. Funjisha bino bintu ne kwibitundaika.

Mafunjisho a bubela ne bunonshi bwa kine

³ Umvwe muntu wafunjisha lufunjisho lungi ne kwibiswa byambo byalumbuluka bya Nkambo yetu Kilishitu Yesu ne, nangwa lufunjisho lwa mwayila munema wa kunemeka Lesa ne,

⁴ wilundumika, ne kuyukapo kintu nangwa kimo ne. Kabiji usakishatu bya kwipuzhaipuzha ne bya kupachika na byambo, ko kufuma bikonkoma, ne lutobo, ne kayebe, ne milanguluko ibi,

⁵ ne kupachika kwa bantu ba michima yatama babula bukine, kasa balanguluka amba, munema wa kunemeka Lesa mo mwa kumwena bunonshi.

⁶ Pakuba munema wa kunemeka Lesa wa kwikizhamo ne muchima kyokya kumwenamo byavula.

⁷ Ng'anyi kintu kyo twaletelepo pano pantanda? Kafwako! Byonkabyo kechi tukakonsha kusendapo kintu nangwa kimo kufuma pano pantanda ne.

⁸ Bino umvwe tuji na kajo ne bivwalo, byonkabyo tukasekela na bino byonka.

⁹ Bino aba bakeba kunonka baponena mu lweseko ne kufwa mu kakose, ne mu bya lwiso bya kubula maana ne mu bya kwionauna, byo bibebizha bantu mu lufu ne mulonaiko.

¹⁰ Mambo kutemwa mali ye muzhazhi wa misango yonse ya bubi. Bino bamo byo beakumbilwe ebasendwile kufuma ku lwitabilo, ne kwiasa bene na bya bulanda byavula.

Bya kumukwasha mwine Timoti

¹¹ Pakuba obewa, muntu wa Lesa, unyemeko ku byo bino bintu. Sakisha bololoke, ne munema wa kunemeka Lesa, ne lwitabilo, ne butemwe, ne butekanye, ne bukimote.

¹² Lwanga bulwi bwawama bwa lwitabilo. Kwachisha ku bumi bwa myaka, ko ko waichijilwe, byo wisolwele kwisolola kwawama ku meso a batumonyi bavula.

¹³ Na kukambizha ku meso a Lesa, yenka upana bumi ku bintu byonse, ne ku meso a Kilishitu Yesu, yenka washimwine kwisolola kwawama ku meso a Pontiusa Pilato,

¹⁴ namba ulame uno mukambizho kwa kubula biko, ne kwa kubula kaneneno kufika ne ku lumwekesho lwa Nkambo yetu Yesu Kilishitu.

¹⁵ Loakamwesha mu kimye kyanji mwine, yenkaye wa bibusa, wa luusa lonse, Mfumu wa bamfumu, ne Nkambo wa ba nkambo.

¹⁶ Ye yenka ubula kufwa, waikala mu kyeya kya kubula kukonsha kufikako. Ye babula kumona ku muntu nangwa umo ne; nangwa kukonsha kumumona ne. Kwi aye kwikale buneme ne bulume bwa myaka. Amena.

¹⁷ Banonshi wibakambizhe amba, kechi bekale na michima ya kwitumbijika ne, nangwa kubiika luketekelo lwabo mu bunonshi bwa pano pantanda ne, kana mwi Lesa, ye witupa bintu byavujisha bya kusekelamo.

¹⁸ Bafwainwa kuuba byawama, ne kwikala banonshi bamu mingilo yawama, bekale bampanyi bepana mu kukwashang'ana.

¹⁹ Ne kwitujila jimo kitendekesho kyawama kya bunonshi kya mu myaka ikeya, namba bakwachishe ku, bonkabwa bumi bwa kine.

²⁰ Kine obewa Timoti, lama akya kyo wapelwe; vundamina ku bya kyambeambe byatu, ne ku lupata lwa ao o bateela mu bubela amba, “maana.”

²¹ Mambo bamo pakwietaba, bapampuka ku lwitabilo. Bupe bwikale ne anweba.