1 Timoti 5 - KNTP

Mingilo ya kwibengijila bakwabo

¹ Kechi ukalukile muntu mukulumpe ne, poso kumusashijila nobe shobe. Ne bansongwalume nabo nobe bakolojobe,

² banabakazhi bakulumpe nabo nobe bainobe, banabakazhi banyike nobe banyenga yobe na mushingi yense.

³ Nemeka banabakazhi bafwilwa, abo kine baabula wa kwibakwasha.

⁴ Pakuba umvwe mwanamukazhi wafwilwa uji na baana nangwa bankana banji, bekale batanshi mu kumwesha kunemeka Lesa kwabo pa kukwasha ba mu bisemi byabo bene, ne kubwezha byawama ku bansemi babo, mambo kino kyo kyaitabilwa ku meso a Lesa.

⁵ Aye mwanamukazhi wafwilwa kine, washalatu bunke, luketekelo lwanji lujitu mwi Lesa, kabiji ukelwatu mu misashijilo ne mu milombelo bufuku ne mute.

⁶ Bino aye wipana mu bya kwilemena ye mufu nangwa ukipema.

⁷ Bino bintu nabyo wibikambizhe amba bekale babula kaneneno.

⁸ Kabiji umvwe muntu wabula kwibamwena balongo banji byafwainwa, kine ne bamunzubo yanji mwine bobene, wilukaana kala lwitabilo, wakila wabula kwitabila mukutama.

⁹ Kechi uleke mwanamukazhi wafwilwa anembwe jizhina kasa akyangye kufikizha myaka yanji ya kusemwa makumi atanu na jimo ne, kabiji wafwainwa kwikala mwanamukazhi wasongwelwetu ku mwanamulume umo,

¹⁰ watumbalala na mingilo yawama, umvwe walelelenga baana banji bulongo, kabiji watambwilanga benyi, waovwelenga maulu a bazhijikwa, wakwashanga bamwenenga bya malwa, wipaine mu kwingila mingilo yonse yawama.

¹¹ Bino banabakazhi bafwilwa kasa bakiji banyike kechi wibanembe ne, mambo bya kusakasaka byabo bibalengesha kusaka kusongolwa, bafuma kwi Kilishitu,

¹² ne kwiletelela luzhachisho, mambo akusha lulayang'ano lwabo lutanshi.

¹³ Kabiji kikwabo nakyo bafunda kuuba bukope, kasa bapitang'ana ku mazubo ne mazubo; kabiji kechi bukope bonkatu ne, ne kuyebeka bakwabo, ne kwibiika mu mambo a bakwabo, kasa bamba bintu byo babula kufwainwa kwamba.

¹⁴ Byonkabyo nasaka namba, banabakazhi bafwilwa banyike basongolwe, baseme baana, balame mazubo abo, ne kumushiila aye mulwanyi mwa kwitunenena bibi ne.

¹⁵ Mambo bamo basenduka kala ne kulondela Satana.

¹⁶ Umvwe mwanamukazhi waitabila uji na balongo banji banabakazhi bafwilwa ebakwashe aye mwine, kipwilo kechi kinemenwe naabo ne, pakuba amba kipwilo kikwashe bafwilwa babula ba kwibakwasha.

¹⁷ Bakulumpe ba kipwilo balama kipwilo bulongo mwibalanguluke amba, bo bafwainwa mushingi wakila, kikatakata aba bengila kyakosa mu byambo ne mu kufunjisha bo bene.

¹⁸ Mambo kinembelo kyaamba amba, “Kechi mukase ng'ombe pa kanwa ubena kupuula kajo ne.” Kabiji amba, “Wa mwingilo wafwainwa mfweto yanji.”

¹⁹ Kechi uswe byo bashinawina mukulumpe ne, poso waumvwa ku batumonyi babiji nangwa basatu.

²⁰ Bino na mambo aboba batwajijila na kulenga mambo wibalengulule ku meso a bonse, namba bakwabo nabo bachiine.

²¹ Na kukambizha obewa ku meso a Lesa, ne a Kilishitu Yesu, ne a bamalaika basalululwa, namba ulame bino bintu kwa kubula kuchibila jimo mambo mu muchima, ne kuuba kintu nangwa kimo kya kutala ku kilungi kya muntu ne.

²² Kechi upelawizhe kutenteka maboko pa muntu nangwa umo ne, nangwa kwibiika mu mambo a bantu bakwabo ne. Wilame obewa mwine kasa watoka.

²³ Kechi ukitomengatu mema onka ne, tomapo tubinyu tucheche na mambo a lukatazho lwa munda mobe ne kubelabela kobe.

²⁴ Bubi bwa bantu bamo kechi bufyama ne, butangijila jimo ku kije; pakuba bwa bantu bakwabo bwibalondela panyuma.

²⁵ Pamo byonkabyo, ne mingilo yawama nayo imweka ayo ine, kabiji nangwa imo ibula kumweka kechi ikakonsha kufyamika kikupu ne.