1 Timoti 4 - KNTP

Bafunjishi ba bubela

¹ Pakuba aye Mupashi wa ambishatu bulongo amba, mu bimye bya kulutwe bamo bakapondoka ku lwitabilo, ne kuteesha michima ku mipashi ya bujimbijimbi ne ku mafunjisho a bademona.

² Monka mu bukamfutumfutu bwa bantu ba bubela, baji na michima yanembwa kayukilo na kyela kyakaba na mujilo.

³ Bo bakanya kusongola ne kwizhijika kajo kamo, koalengele Lesa amba, bekatambule na kusanta abo baitabila ne kuyuka bya bukine.

⁴ Mambo byonse byo alengele Lesa byawama, kabiji kafwako nangwa kimo kyafwainwa kwikikaana ne, umvwe bekitambula na kusanta,

⁵ mambo pano bekitokesha na byambo bya Lesa ne na lulombelo.

Kalume wawama wa kwa Kilishitu Yesu

⁶ Umvwe wafunjisha bino bintu ku baitabila, ukekala ke wa mwingilo walumbuluka wa kwa Kilishitu Yesu, wikomesha na byambo bya lwitabilo, ne na lufunjisho lwalumbuluka lo walondejilenga kufika ne leelo.

⁷ Ukaane bishimi byatu bishimikila banabakazhi bakote. Kabiji wifunjishenga obewa mwine ulumbuluke mu munema wa kunemeka Lesa.

⁸ Mambo mu kwikosesha kwa mubiji umwenamo bimo bicheeche, pakuba mu munema wa kunemeka Lesa umwenamo byonse, byo aji na mulaye wa buno bumi, ne wa abwa bukeya,

⁹ Kino kyambo kyokya kishinka, kabiji kyafwainwa kwitabilwa konse.

¹⁰ Mambo na onka ano mambo o twingijisha kyakosa kasa twakolomokatu, mambo luketekelo lwetu luji mwi Lesa mumi, ye Mupulushi wa bantu bonse, pakuba baitabila bo bene.

¹¹ Wibikambizhe bino bintu ne kwibifunjisha.

¹² Kechi uleke muntu akusuule mambo wimwanyike ne, bino wikale wa kumwenako abo baitabila, mu byambo, ne mu bwikalo, ne mu butemwe, ne mu lwitabilo, ne mu bumuchima watoka.

¹³ Tesha muchima mu kutanga, ne mu kwibakosesha ne mu kwibafunjisha, kufika ne kimye kyo nkeya.

¹⁴ Akya kya bupe kiji mwi obewa kyo wapelwe na bungauzhi byo wabikilwe maboko ku bakulumpe, kechi wikilekelele ne.

¹⁵ Kasa wibyuba bino bintu, wikale monka mwi abyo, amba kuya palutwe kobe kumweke ku bonse.

¹⁶ Kasa wiketa obewa mwine ne lufunjisho lobe pamo. Ukelwe mu bino bintu, mambo pakuba kino usakukepulusha obewa mwine ne abo bakumvwa pamo.