1 Timoti 3 - KNTP

Byafwainwa kwikala bantangi ba kipwilo

¹ Kino kyambo kyokya kishinka, umvwe muntu wakeba mwingilo wa bukulumpe bwa kulama kipwilo, ubena kukeba mwingilo wawama.

² Byonkabyo mukulumpe ulama kipwilo wafwainwa kwikala wabula kaneneno, mwanamulume uji na mukazhi umo, wilama bulongo, wa muchima watekanya, wa bwikalo bwalumbuluka, watemwa kutambwila benyi, wakonsha kufunjisha,

³ kechi upendwa na maalwa ne, nangwa upumang'ana ne, kana wakooka muchima, ubula kutoboka, wabula kutemwa mali.

⁴ Ulama bulongo bamunzubo yanji mwine, waikala na baana banji kasa bamunekenena na mushingi yense.

⁵ Mambo umvwe muntu kechi wayuka kulama bamunzubo yanji mwine bulongo ne, akakonshe byepi kulama kipwilo kya Lesa?

⁶ Kechi waitabila katataka ne, kuchiina amba wakelundumika ne kuponena mu luzhachisho lumo na Diabola.

⁷ Kabiji wafwainwa kuteelwa bulongo ku bapangye ya kipwilo, kuchiina amba wakaponena mu myendeleko ne mu kakose ka Diabola.

Bankwasho ba kipwilo

⁸ Pamo byonkabyo ne bankwasho ba kipwilo nabo bekale bashing'ama, kechi ba njimi ibiji ne, nangwa batomatoma binyu ne, nangwa ba lwiso lwa mali ne.

⁹ Bafwainwa kulama byafyamika bya lwitabilo na muchima watoka.

¹⁰ Kabiji patanshi bebeseke, umvwe kechi baji na mambo ne, bino bengile mingilo ya bunkwasho.

¹¹ Banabakazhi nabo pamo, bekale bashing'ama kechi bababang'ana ne, belama bulongo, bakishinka mu bintu byonse,

¹² kabiji nkwasho wa kipwilo ekale na mukazhi umo, kasa alama baana banji ne ba munzubo yanji bulongo.

¹³ Mambo abo bengila bulongo mwingilo wa bunkwasho, bemwena bene bwikalo bwa buneme, ne kuchinchika kukatampe kwa mu lwitabilo lwa mwi Kilishitu Yesu.

Kintu kyafyamika kikatampe

¹⁴ Bino bintu nakunembelabyo, nangwa naketekela kwiya ko uji palutwe kacheche.

¹⁵ Namba umvwe nabanda, uyuke mwafwainwa kwikeela bantu munzubo ya Lesa, kyo kipwilo kya Lesa mumi, jo jipanda ne jikonka ja bukine.

¹⁶ Kabiji kyaitabilwatu amba, kyafyamika kya mu kunemeka Lesa kwetu kyo kikatampe. Aye wamwekele mu bumuntu, Walumbulwilwe amba waoloka mu Mupashi, bamumwene ku bamalaika. Wasapwijilwe mu mikoka ya bantu, waitabilwe pano pantanda, kabiji watambwilwe mwiulu mu lukumo.