1 Timoti 2 - KNTP

Kupopwela Lesa mu kipwilo

¹ Byonkabyo patanshi, na kusashijila namba, misashijilo, ne milombelo, ne mapeesho, ne misanchilo, bibobilwe bantu bonse;

² ne bamfumu, ne bonse baji mu bukulumpe namba, twikale mu bwikalo bwa mutende ne bwazhindama mu kunemeka Lesa konse, ne na mushingi.

³ Kino kyo kyawama ne kyaitabilwa ku meso a Lesa Mupulushi wetu,

⁴ ye wasaka amba, bantu bonse bapuluke, bakayukishe bukine.

⁵ Mambo kujitu Lesa umo, kabiji kujitu ng'ambi umo, uji pakachi ka Lesa ne bantu, aye mwine ye muntu, yenkaye Kilishitu Yesu,

⁶ ye wipaine mwine na kwibakuula bonse. O mambo ashimunwa mu myaka yao yafwainwa.

⁷ Oo natongwejilwe amba, ngikale musapwishi ne mutumwa (Naamba bya kine, kechi nabepa ne,) wa kufunjisha Bangentila mu lwitabilo ne mu bukine.

⁸ Byonkabyo nasaka namba banabalume balombe konse konse kasa basuntula maboko abo azhila, kwa kubula bukaji ne kutoboka.

⁹ Pamo byonkabyo ne banabakazhi nabo bavwale bibafwainwa na mushingi ne butekanye; kechi na nsuki ya kwichika ne, nangwa na bya ngolode ne, nangwa na ba mangalite ne, nangwa na bivwalo bya mutengo wabaya ne,

¹⁰ poso na mingilo yawama, byafwainwa banabakazhi beteela amba, boba kunemeka Lesa.

¹¹ Mwanamukazhi afunde kuzhindama na kukookela konse.

¹² Pakuba kechi naswisha mwanamukazhi kufunjisha ne, nangwa kwikala na bukulumpe pa mwanamulume ne, bekale bazhindama.

¹³ Mambo Adama walengelwe patanshi, apa bino ke Evwa.

¹⁴ Ne Adama kechi wajimbaikilwe ne, bino mwanamukazhi ye wajimbaikilwe, ne kuzhilulula wazhilulwile muzhilo.

¹⁵ Bino bakapuluka pa kusema baana umvwe, bakekalanga monka mu lwitabilo ne mu butemwe ne mu kuzhijikwa, ne kwikanya.