1 Timoti 1 - KNTP

Lwimu

¹ Paulo, mutumwa wa kwa Kilishitu Yesu monka mwayila mukambizho wa Lesa Mupulushi wetu, ne Yesu Kilishitu luketekelo lwetu.

² Kwi Timoti, mwanami wa kine mu lwitabilo. Bupe, ne lusa, ne mutende, bifuma kwi Lesa Taata ne kwi Kilishitu Yesu, Nkambo yetu, bikale ne obewa.

Kwibajimuna na mambo a mafunjisho a bubela

³ Byonka byo nakusashijile byo nasakile kuya ku Makedonya, amba ushale ku Efisesa. Namba wibakambizhe bamo bantu amba kechi bafunjishe mafunjisho angi ne.

⁴ Nangwa kutaako muchima ku bishimi ne ku bya kulondolola bisemi bibula kupela ne, byo bileeta bya kwipuzhaipuzha, kechi bingila bukalama bwa Lesa bwa mu lwitabilo ne.

⁵ Uno mukambizho wayila mu butemwe bufuma mu muchima watoka, ne mu muchima ubula kwizhachisha, ne mu lwitabilo lwabula bujimbijimbi.

⁶ Abino bintu bamo byo byo bapampukako basendukila kala ku misambo yatu.

⁷ Basaka kwikala bafunjishi ba Mizhilo, bino kechi bomvwa nangwatu byambo byobamba bene ne, nangwa kumvwa mwayila bintu byo basumininwa na kwamba ne.

⁸ Pakuba pano atweba twayuka namba Mizhilo yawama, umvwe muntu wiyuba bulongo.

⁹ Byo twayuka namba, Mizhilo kechi yalengejilwe muntu waoloka ne, poso bampupabizhila ne bakajimbulushi, ne baabula kwakamwa Lesa, ne bandengamambo, ne baabula kuzhila, ne baatu, ne bepaya bashabo ne bainabo, ne bepaya bantu bakwabo,

¹⁰ ne ba bulalelale, ne bekuna banabalume na banabalume bakwabo, ne babombola bantu, ne ba bubela, ne bachipa bya bubela, nangwa kintu kikwabo kyapusana na luno lufunjisho lwalumbuluka.

¹¹ Monka mwayila Mambo Awama a lukumo lwa Lesa wa bibusa, o ampele amiwa.

Lusanchilo na mambo lusa lwa Lesa

¹² Namusanchila, yenkaye Kilishitu Yesu Nkambo yetu, aye wankosesha mambo wandangulukile amba, ne wakishinka, ne kuntongwela uno mwingilo,

¹³ nangwa kala amiwa najinga wa mwenga, wa lupato kabiji washiinta. Bino nangwa byonkabyo namwene lusa, mambo nebyubile mu bulubi monka mu kubula kwitabila kwami.

¹⁴ Kabiji aye Nkambo wampele bupe bwavula ne lwitabilo ne butemwe bwa mwi Kilishitu Yesu.

¹⁵ Kino kyambo kyokya kishinka, kabiji kyafwainwa kwitabilwa konse amba, Kilishitu Yesu waishile pano pantanda na kupulusha bandengamambo. Mwi abo, amiwa yami ndegamambo mwine wakilaamo,

¹⁶ na onka ano mambo kyo namwenejile lusa, amba monka mwi amiwa, byo nji mwine wakilamo kulenga mambo, Kilishitu Yesu amwesheshemo kukooka muchima kwanji konse, ngikale wa kumwenako bonse bakamwitabila mu kumona bumi bwa myaka.

¹⁷ Pano kwi aye Mfumu wa myaka, ubula kufwa, ubula kumweka, yenkaye Lesa, kwikale buneme ne lukumo myaka ne myaka. Amena.

¹⁸ Uno mukambizho nakufikizhaye, obewa mwanami Timoti, monka mwayila byambo byo ba ambile bangauzhi na mambo a obewa. Namba ulwenga bulwi bwawama,

¹⁹ kasa ulama lwitabilo na muchima watoka. Mambo bamo, byo bamutaaya ao muchima ubula kwizhachisha balobesha lwitabilo lwabo nobe bwato.

²⁰ Mwi abo muji ne ba Haiminusa ne Alekasanda, bo nafikizha kwi Satana; namba bafundwe baleke kumuuba mwenga Lesa.