1 Petelo 4 - KNTP

Mambo a kufuma ku bubi

¹ Byonka byo amanamine Kilishitu mu mubiji, ne anweba vwalai bya nkondo na muchima wa byonkabyo, mambo aye wamanama mu mubiji ye waleka kulenga mambo.

² Amba pano mu bimye byenu bya bumi byashalaako bya mu mubiji kechi mukisakenga bya lwiso lwa buntunshi ne, poso kulondela kyaswa muchima wa Lesa.

³ Bimye byo mwapaine kala na kuuba byo batemwa Bangentila byapwa, byo mwalondelenga bya bunya, ne bya lwiso, ne bya kutomatoma binyu, ne bya kusangalala kubi, ne bya kupendwapendwa, ne byabipisha bya kupopwela bankishi.

⁴ Kabiji ne abo (babula kwitabila) pano bakumya byo mwabula kwichapakanya naabo pamo mu byatama, kabiji be muneena bibi.

⁵ Bino abo bene baketotolwela kwi aye winengezhezha jimo kala kwibachibila mambo bomi ne bafu.

⁶ O ene mambo, Mambo Awama asapwijilwe ne ku bafu mambo a kuuba amba, bakachibilwe mambo pamo na bantu bamu mubiji, ne kwikala na bumi pamo ne Lesa mu mupashi.

Bakalama bawama ba bupe bwa Lesa

⁷ Kabiji mpelo ya byonse iji kwipi. Onkao mambo ikalai na michima ya kwikanya, ne kutekanya, mwikale ba milombelo.

⁸ Kyakila byonse itemwishai anweba bene na bene. Mambo butemwe buvweta pa mambo avula.

⁹ Kasa mwitambula bulongo anweba bene na bene kwakubula kunyinyita.

¹⁰ Monka mo mwatambwila kya bupe pa muntu pa muntu, mo monka mo mwiingijilanga anweba bene na bene, nobe bakalama bawama ba bupe bwa Lesa bwa misango ne misango.

¹¹ Awa wamba, ambe kyafwainwa byambo bya Lesa; awa wingila engile na bulume boapana Lesa, amba mu byonse aye Lesa atumbijikilwe monka mwi Yesu Kilishitu, kwi aye kwikale lukumo ne bulume myaka ne myaka. Amena.

Kumumanamina Kilishitu

¹² Anweba batemwe, kechi mukumye alwa lweseko lwa mujilo lwiya pe anweba na kwimweseka nobe kintu kingi kimufikilatu ne.

¹³ Pakuba sekelai byomubena kushilang'ana nanji bya kumanama Kilishitu, namba mukasekele ponka pa lumwekesho lwa lukumo lwanji.

¹⁴ Umvwe bemwambila bya mwenga na mambo a jizhina ja Kilishitu mwatokwa, mambo Mupashi wa lukumo, ne Mupashi wa Lesa waikala pe anweba.

¹⁵ Bino kechi umo wa mwi anweba amaname mambo a kwikala mbanzhi, nangwa ngivi nangwa ngubabibi nangwa wa kwibiika mu mambo a bakwabo ne.

¹⁶ Bino umvwe muntu wamanama na mambo a kwikala mwina Kilishitu, kechi obe bumvu ne, poso atumbijike Lesa mu jonka jino jizhina.

¹⁷ Mambo kimye kyafika amba, bunchiba mambo butatwile ku nzubo ya Lesa. Kabiji umvwe butatwile patanshi kuji atweba, pakuba mpelo ya boba babula kukookela Mambo Awama a Lesa ikekala ke ya byepi?

¹⁸ Kabiji umvwe, “Kyakatazha pa kupuluka waoloka pakuba wabula kwakamwa Lesa ne ndengamambo ukekala ke wa byepi?”

¹⁹ Onkao mambo abo bamanama monka mu kyaswa muchima wa Lesa bobenga byawama ne kwiifikizha myeo yabo kwi aye Mulenga wakishinka.