1 Petelo 3 - KNTP

Bantu baji mu masongola

¹ Byonkabyo, anweba banabakazhi basongolwa, nekenenai bamwata wenu amba, nangwa bamo babula kwitabila mambo a Lesa, betabizhiwe pa kumona bwikalo bwenu,

² byo bamona bwikalo bwenu bwawama bwa mushingi.

³ Kwiwamisha kwenu kechi kwikale kwa pangyetu kwa kwiichika nsuki, nangwa kwa kwikobaika bya buneme bya ngolode, nangwa kwa kuvwala bivwalo ne.

⁴ Nanchi kwikale kwa muntu wafyamika wa mu muchima, kyo kivwalo kibula kubola, ye muchima wa bukimote ne wazhindama, ye wa buneme ku meso a Lesa.

⁵ Mambo banabakazhi bazhila bakala, baketekejile Lesa nabo bevwikile byonkabyo, byo banekenejile bamwata wabo.

⁶ Pamo ne Saala byo akookejile Abulahama, kasa amutela amba nkambo. Kabiji anweba pano ke mwi baana banji, umvwe mwauba bulongo ne kuleka kintu nangwa kimo kwimubisha moyo ne.

⁷ Ne anweba banabalume basongola byonkabyo ikalai na bakazhi benu monka mu maana ne kwibanemeka nobe kijiilo kyakila kunekena, byo baji banswanyi pamo ne anweba ba bupe bwa bumi. Kuchiina amba milombelo yenu yakeya kulubankana.

Kumanyikwa pakuba byaoloka

⁸ Pano kyapelako: anweba bonse ikalai bamuchima umo, ba lusa, batemwang'ana byo muji balongo na balongo, ba michima yanekena, ne kwipelula.

⁹ Kubwezha kibi na kibi kikwabo ne, nangwa mwenga na mwenga mukwabo ne, kana bibusa byonka, mambo kino kyo kyo mwaichilwa amba mukaswane bibusa.

¹⁰ Mambo, “Aye watemwa bumi, Ne kumona moba awama, Akanye lujimi wanji kwamba bibi, Ne byatunwa byanji kechi byambe bya bujimbijimbi ne.

¹¹ Kabiji avundamine ku bubi, ne kuuba byawama. Akebe mutende, ne kumulondalonda.

¹² Mambo meso a Nkambo aji pa baoloka, ne matwi anji ateleeka ku milombelo yabo. Bino kilungi kya Nkambo kibatala bibi aba boba byatama.”

¹³ Ye ng'anyi ukemuba kyatama, umvwe mwauba lupata na kuuba byawama?

¹⁴ Kabiji nangwa mumaname na mambo a bololoke, mwatokwa. Kechi mube moyo na mambo a abo ne, nangwa kulukusha muchima ne.

¹⁵ Bino zhijikai Kilishitu mu michima yenu bu Nkambo. Moba onse ikajilai jimo na mwa kwibakumbwila bonse bemwipuzha mambo a luketekelo lomuji naalo,

¹⁶ bino kasa muba na bukimote ne na mushingi, mwikale na michima yatoka, amba aba banena bwikalo bwenu bwawama bwa mwi Kilishitu, balengeshiwe bumvu.

¹⁷ Mambo kyo kyawamisha kumanama pakuba byawama, umvwe kyo kyaswa muchima wa Lesa, kukila pakuba byatama.

¹⁸ Mambo Kilishitu naye wiamanamijile mambo jimo jonka, aye waoloka na mambo a babula koloka, amba etufikizhe kwi Lesa, waipayilwe mu mubiji, bino waubilwe bumi mu mupashi,

¹⁹ namo imo mo ayijile na kusapwila ku bapashi baji mu kaleya.

²⁰ Bonka balengulwile kala, byo kwapembejile kukooka muchima kwa Lesa mu moba a Nowa byo a lengelenga bwato, mo bapulukijile bamo bacheche, bo batanu na basatu na mema,

²¹ o afwanyikizha lubatizhilo lwimupulusha ne anweba pano, kechi na kufumya biko pa mubiji ne, poso kusakisha kwi Lesa muchima wawama ubula kwizhachisha, monka mu lusanguko lwa Yesu Kilishitu.

²² Aye waya mwiulu, kabiji uji ku kilujo kya Lesa, ne bamalaika ne ba luusa, ne ba bulume kasa bamunekenena.