1 Petelo 2 - KNTP

Jibwe jumi ne bantu bazhila

¹ Byonkabyo tayai nshiji yonse, ne bujimbijimbi bonse, ne bukamfutumfutu, ne kichima, ne kwineena bibi konse.

² Mwikale nobe twana twalukeke, musake mukaka wa mupashi wawama, emukomeshe mufike ne ku lupulukilo.

³ Mambo mwatompapo kala amba, Nkambo ye wawama.

⁴ Mwiye kwi aye jibwe jumi, jasulwa ku bantu kine, pakuba kwi Lesa wasalululwa kabiji wa buneme.

⁵ Kabiji ne anweba pamo nobe mabwe omi, mubena kushimikwa ke nzubo ya bumupashi amba, mwikale bung'anga bwazhila, bwa kulambula bitapisho bya bumupashi, byaitabilwa kwi Lesa mwi Yesu Kilishitu.

⁶ Mambo kinembelo kyaamba amba, “Talai, nabiika mu Ziona jibwe jine ja jikonka, ja salululwa, ja buneme. Kabiji aye waitabila mwi aye kechi ukalengeshiwa bumvu ne”.

⁷ Byonkabyo buneme bo bwenu anweba mwaitabila. Pakuba kwi abo babula kwitabila. “Aja jibwe jo balengulwile bashimika, jo jaalukile ke mutwe wa jikonka.”

⁸ Kabiji kinembelo kikwabo kyaamba amba, “Jibwe ja kwituntulako ne mukunko wa kwibaponeshako.” Betuntula mambo a kulengulula mafunjisho byonka byo kibatongwejilwe.

⁹ Pakuba anweba mwi kisemi kyasalululwa, mwi ba bung'anga bwa bufumu, mwi mukoka wazhila, mwi bantu banonkwa kwi Lesa mwine amba, mulondolole byanji bya wamisha, yenka aye wimwichile kufuma mu mfishi kwiya mu kyeya kyanji kya ku kumya.

¹⁰ Kala anweba kechi mwajinga bantu bakwa Lesa ne, pakuba pano mwi bantu ba kwa Lesa, kala mwabujile kumona lusa, pakuba pano mwilumona.

Ba mwingilo wa Lesa

¹¹ Anweba batemwe, amiwa ne musashijila byo muji benyi ne bakang'enda namba muzhile bya lwiso lwa buntunshi, bilwa na muchima.

¹² Bwikalo bwenu bwikale bwafwainwa mu Bangentila, amba nangwa be muneena bibi nobe mwi babi, bakamone mingilo yenu yawama ne kumutumbijika Lesa mu juba jo akebapempula.

Mambo a kwibanekenena bantangi

¹³ Kabiji nekenenai bonse buntangi bwa bantu na mambo a Nkambo, nangwa mfumu byo aji mwine mukatampe,

¹⁴ nangwa bandamakyalo bo atuma mu kwibakabisha boba byatama ne kwibatota boba byawama.

¹⁵ Mambo kino kyo kyaswa muchima wa Lesa amba, monka mukuuba byawama muzhindamike bumbulwa maana bwa ba bilubi.

¹⁶ Ikalai nobe baana ba bene, kechi mwalule bwana bwa bene bwenu ke kintu kya kubilamo bubi ne, poso mwikale bakalume ba Lesa.

¹⁷ Nemekai bantu bonse, temwai balongo. Akamwai Lesa. Nemekai mfumu.

Kya kumwenako nabyo amanamine Kilishitu

¹⁸ Anweba ba mingilo nekenenai ba nkambo yenu na mushingi yense, kechi bonka bawama ne bakimote ne, ne bashinta nabo pamo.

¹⁹ Mambo kino kyo kyaitabilwa, umvwe muntu na mambo a kuta muchima wanji kwi Lesa, watekanya pa ku manyikwa pabula mambo.

²⁰ Mambo ko kutotwa kwa byepi, umvwe mwatekanya pa kupumwa byo mwalenga mambo? Bino umvwe mwatekanya pa kumanyikwa pakuba byawama, kino kyo kyaitabilwa kwi Lesa.

²¹ Mambo kino kyo kyo mwaichilwa, mambo Kilishitu naye wimumanamijile anweba, ne kwimushiila mwa kulondela, mulondelenga monka mungayo yanji.

²² Ye wabujile kulenga mambo, ne bujimbijimbi kechi bwajinga mu kanwa kanji ne.

²³ Aye, byo ba mwambijile mwenga, kechi wabwezhezhe mwenga ne; kabiji byo amanamine, kechi wapingile bipingo ne, bino wifikizhe mwine kwiyewa uchiba mambo mo aolokela.

²⁴ Mwine ye wasendele mambo etu mu mubiji wanji konka ku kichi, amba atweba tufwe ku bundengamambo ne kwikala mu bololoke. Ko ku bipumo byanji ko mwabukilwa.

²⁵ Mambo anweba mwaendelenga kyendeende nobe mikooko yalubilamo, pakuba pano mwabwela kwi Kafunga ne Kalama wa michima yenu.