1 Petelo 1 - KNTP

¹ Petelo, mutumwa wa Yesu Kilishitu. Ku basalululwa bapalang'enamo baikala bwenyi mu Pontusa, ne mu Ngalatiya, ne mu Kapadokya, ne mu Asha, ne mu Bitinya.

² Basalululwa monka mwayila maana akuyukila jimo kwa Lesa Taata, na kuzhijikwa kwa Mupashi, ne kutokeshiwa na mashi anji amba mukookelenga Yesu Kilishitu. Bupe ne mutende bimuvujile.

Luketekelo lwa myaka

³ Atotwe Lesa Shanja Nkambo yetu Yesu Kilishitu, ye witusemene jibiji monka mu lusa lwanji lukatampe, mambo a kusanguka kwa Yesu Kilishitu mu bafu, pano twaikala na luketekelo lumi,

⁴ ne na buswanyi bubula kubola, bubula kutamishiwa, bubula kwaluka, bo bemulamina mwiulu.

⁵ Anweba mwalamwa na bulume bwa Lesa monka mu lwitabilo lwenu amba, mukamone lupulukilo lwanengezhiwa jimo lukasoloka mu juba jikapelaako.

⁶ Mo mo mwamwena lusekelo nangwa pa kakimye kacheche, umvwe kyafwainwa, mwaubishiwa bulanda na bya kwimweseka bya misango ne misango.

⁷ Amba lwitabilo lwenu pa kwesekwa, byo lwakijisha ngolode yonaika mu buneme nangwa beyeseka mu mujilo, lukatanwe ke lwa kutotwa ne lwa lukumo ne lwa buneme byo akamweka Yesu Kilishitu.

⁸ Ye mwatemwa nangwa kechi mwamumwenepo ne. Kabiji aye nangwa pa kino kimye kechi mubena kumumona ne mwa mwitabila, ne kusekela mwasekela pakatampe na lusekelo lwa kubula kukonsha mwa kwilulumbulwila lwayuula lukumo,

⁹ mambo mubena kutambula kya mu lwitabilo lwenu, lo lupulukilo lwa myeo yenu.

¹⁰ Mwayila luno lupulukilo bangauzhi belukebele ne kwilupalanguzha bingi, bonka baawilenga na Mupashi na mambo a bupe bwenu bo mukatambula anweba.

¹¹ Kasa bapalanguzha amba, ng'anyi kimye, nangwa kyo kimye kya byepi, kyoatongwele Mupashi wa Kilishitu wajinga mwi abo, byo ashimwijile jimo mambo a bya kumanama bya Kilishitu ne bya lukumo bikalondela panyuma.

¹² Kabiji kibabujilwe abo amba kechi babena kwiingijila abo bene ne, poso kwimwingijila anweba, mu bintu byo bemubujile anweba kupichila mu boba basapwijile Mambo Awama kwi anweba na Mupashi Wazhila watuminwe kufuma mwiulu, bino bintu ne bamalaika nabo basakisha kwibimona.

Lwito lwa kwikala bwikalo bwa buzhile

¹³ Onkao mambo, nengezhai michima yenu mutekanye, mwilulanguluke bulongo luketekelo lwenu lwa bupe bukemuletelwa pa lumwekesho lwa Yesu Kilishitu.

¹⁴ Byo muji baana ba lukookelo kechi mwipashang'anyenga na mwayila bya lwiso lwenu lwakala, lwa mu myaka yo mwabujile kuyuka ne.

¹⁵ Bino monka mwaikajila aye wazhila wimwita, monkamo ne anweba mwikale bazhila mu misango yonse ya bwikalo bwenu.

¹⁶ Mambo kyanembwa amba, “Mukekala bazhila mambo ne amiwa nazhila.”

¹⁷ Kabiji umvwe mumwita aye amba Taata, yenkaye ukebachibila mambo bonse monka mwayila mingilo yabo kwakubula kutala ku kilungi kya muntu ne, ikalai na kwakamwa mu bimye byo mwa kikala bwenyi pano pantanda.

¹⁸ Byo mwayuka amba, mwakuujilwe ku bwikalo bwenu buncha bo mwatambwile ku bashakulu benu, kechi na bintu bibola pamo nobe siliva ne ngolode ne,

¹⁹ poso na mashi aneema, nobe a mwana mukooko wabula bulema nangwa kiko kicheche ne, o mashi a Kilishitu.

²⁰ Ye basalulwijile jimo pano pantanda kasa pakyangye kulengwa, pakuba wasololwa kuno kumpelo ya myaka na mambo a anweba.

²¹ Mwaitabila Lesa kupichila mwi aye, ye basangwile mu bafu ne kumupa lukumo, amba lwitabilo lwenu ne luketekelo lwenu lwikale mwi Lesa.

²² Byo mwatokesha michima yenu na kukookela bya bukine ne kumwenamo butemwe bwa kine bwa kutemwa balongo, kasa mwitemwa anweba bene na bene na muchima watoka too.

²³ Byo mwasemwa jibiji, kechi ku lukunwa ubola ne, poso ku ubula kubola, monka mu mambo a Lesa, aji na bumi myaka ne myaka.

²⁴ Mambo, “Bonse bantu baji pamo nobe nsono, Ne lukumo lwabo lonse luji pamo nobe buluba bwa nsono. Nsono yuma, ne buluba bulakata,

²⁵ Pakuba byambo bya Nkambo byaikajikwa myaka.” Kabiji bino byambo o Mambo Awama o bemusapwijile anweba.