1 Kolinda 9 - KNTP

Luusa ne mingilo ya mutumwa

¹ Nanchi amiwa kechi ne mwana bene nenyi? Kechi ne mutumwa nenyi? Kechi na mumwenepo Yesu Nkambo yetu nenyi? Anweba kechi mwi mwingilo wami wa mwi Nkambo nenyi?

² Nangwa ku bakwabo amiwa kechi ne mutumwa ne, pakuba kwi anweba ne mutumwa kine, mambo anweba mwi kayukilo ka butumwa bwami mwi Nkambo.

³ Mo ndondolwela kwi abo bampima momo muno;

⁴ namba, nanchi kechi tuji na luusa lwa kwimusakila bya kuja ne bya kutoma nenyi?

⁵ Kechi tuji na luusa lwa kwenda na mukazhi waitabila pamo na batumwa bakwetu ne balongo ba Nkambo ne Kefasa nenyi?

⁶ Nanchi amiwatu yenka ne Banabasa twabulwa luusa lwa kuleka kwingila na maboko etu nyi?

⁷ Ng'anyi mushilikale wingila kasa emwena mfweto mwine? Ng'anyi ujimba bujimi bwa ming'anzang'anza ubula kujako bipangwa byabyo? Ng'anyi ujiisha jitanga ubula kutomako mukaka?

⁸ Bino bintu mbena kwibyamba mu buntunshi nyi? Inyi byo byo yaamba mizhilo?

⁹ Mambo kyanembwa mu mizhilo ya Mosesa amba, “Kechi mukase ng'ombe pa kanwa ubena kupuula kajo ne”. Nanchi bang'ombe Lesa bo ateshako muchima nyi?

¹⁰ Inyi wikyambile na mambo a atweba? Ee, kyanembejilwe atweba. Mambo awa ujima wafwainwa kujima na luketekelo, ne awa upuula wafwainwa kupuula na luketekelo lwa kujapo.

¹¹ Inge twabyajile bya bumupashi mwi anweba, nanchi kechi kitufwainwa atweba kunowa byenu bya kukwasha mibiji yetu nyi?

¹² Umvwe bakwabo baji na luno luusa lwa byonkabyo pe anweba, atweba kechi yetu bene, bene nenyi? Nangwa byonkabyo kechi twimubijiile luno luusa ne. Bino atweba bene twimwenejile byonse kuchiina amba, twakashinkila Mambo Awama a Kilishitu.

¹³ Kechi mwayuka nenyi amba, aba bengila mu nzubo yazhila, baja ku bya mu nzubo yazhila, kabiji aba bengila ku kyakusokelapo bitapisho batambulako byabo ku bitapisho.

¹⁴ Byo byo akambizha Nkambo amba, basapwila Mambo Awama bamonenga mwa kwikajila monka mu Mambo Awama.

¹⁵ Pakuba amiwa kechi nebyubile bino bintu nangwa kimo ne, kabiji kechi nanemba bino bintu namba kingubilwe byonkabyo ne. Mambo kyangwamina amiwa kufwa, kukila kuleka nangwa muntu umo alulule kwitota kwami ke kwatu.

¹⁶ Amiwa nangwa nsapwila Mambo Awama, kechi kyokya kwitotelamo ne. Mambo naswiikwa na uno mwingilo. Kabiji malwa o ami umvwe amiwa ne kusapwila Mambo Awama ne.

¹⁷ Mambo umvwe nekyuba kino monka mu kyaswa muchima wami amiwa mwine, nkatambula mfweto. Bino umvwe kechi mu kyaswa muchima wami ne, natwikwa na uno mwingilo.

¹⁸ Nanchi mfweto yami yo yika? Namba byo nsapwila Mambo Awama, neasapwile kwakubula mfweto amba kechi ngube byonse bya luusa lwami lwa mu Mambo Awama ne.

¹⁹ Mambo amiwa nangwa kechi ne muzha wa muntu ne, neleeta amiwa mwine mu buzha bwa bonse, namba mmwenemo bantu bavujisha.

²⁰ Ku Bayudea, naalukile nobe mu Yudea namba mmwenemo Bayudea; kabiji kwi aba baji mu mizhilo, naalukile nobe wa mu mizhilo, nangwa amiwa kechi najinga wa mu mizhilo ne, namba mmwenemo baji mu mizhilo.

²¹ Kabiji kwi abo babula mizhilo, naalukile nobe wabula mizhilo, bino kechi nabujile mizhilo kwi Lesa ne, najinga monka mu mizhilo ya Kilishitu, namba mmwenemo babula mizhilo.

²² Kabiji ku banekena naalukile ke wanekena, namba mmwenemo banekena. Kabiji naaluka ke bintu byonse ku bantu bonse namba na bintu byonse mpulushepo bamo.

²³ Kabiji nguba byonse na mambo a Mambo Awama, namba ngikale ke wa kwabana na bakwetu bibusa bya Mambo Awama.

²⁴ Kechi mwayuka nenyi amba, banyema kapeela banyema bonse, pakuba umotu yeutambula mpasela? Byonkabyo nyemai mukeitambule.

²⁵ Kabiji bonse basaka kushindang'ana mu bisela, bekanya mu bintu byonse, amba bakatambule munchinya ubola, pakuba atweba tukatambula ubula kubola.

²⁶ Onkao mambo kyo nnyemena byonkabyo kechi nobe unyematu ne, amiwa kulwa kwami kechi kuji nobe kupumatu mwela ne.

²⁷ Pakuba nepumapuma pa mubiji wami ne kumuleeta mu buzha, kuchiina amba nangwa mu kya byepi, pa kusapwila ku bakwabo amiwa mwine nakalengululwa.