1 Kolinda 8 - KNTP

Kajo ko batapisha ku bankishi

¹ Mwayila kajo ko batapisha ku bankishi. Twayuka namba atweba bonse tuji na maana, bino maana alengela kwilundumika, pakuba butemwe bukomesha bantu.

² Umvwe muntu wilanguluka amba wayuka bintu, kechi wayuka byo afwainwa kuyuka ne.

³ Bino umvwe muntu watemwa Lesa, awa wayukanyikwa kwi Lesa.

⁴ Na mambo a mwayila kajo ko batapisha ku bankishi, twayuka namba nkishi kechi kyo kintu pano pantanda ne, kabiji kechi kujipo Lesa mukwabo ne, kana umo yenka.

⁵ Mambo nangwa kine ko biji bintu byatelwa “bulesa”, mwiulu ne pano panshi, kuji “ba lesa” bavula ne ba “nkambo” bavula,

⁶ pakuba kwi atweba kujitu Lesa umo yenka Taata, ko bifuma byonse kabiji motwaikela ne atweba, ne Nkambo umo yenka Yesu Kilishitu mo byamwekejile byonse, ne atweba mo twaikala.

⁷ Bino bantu bonse kechi baji na maana a kuyuka byo byo ne. Bino bamo ne pano bakiji na michima yapijilwa na bankishi, pa kuja kajo ko batapisha ku bankishi, balanguluka na jiwi ja mu michima yabo nobe kine bazhilululwa na kajo, byo baji banekena.

⁸ Pakuba kajo kechi ketufwenya kwi Lesa ne; mambo nangwa twabula kuja, kechi twakila mukutama ne, kabiji nangwa twaja kechi twiwamisha ne.

⁹ Jimukai kuchiina amba, luusa lwenu lwakebatuntwisha banekena.

¹⁰ Umvwe muntu wakumona obewa wa maana kasa waikala na kuja mu nzubo ya nkishi, inge muchima wanji wanekena kechi kikamutundaike aye kuja byo batapisha ku bankishi nenyi?

¹¹ Kabiji byonkabyo monka mu maana obe mo aonaikila awa mulongo wetu yeafwijile Kilishitu.

¹² Byonkabyo, byo mwi balenga mambo balongo benu ne kwibaasa ku michima yabo yanekena, mwalenga mambo kwi Kilishitu.

¹³ Na onkao mambo, umvwe kajo kamutuntwisha mulongo wami, kechi nkaja nyama myaka yonsetu ne, kuchiina amba, nakamutuntwisha mulongo wami.