1 Kolinda 7 - KNTP

Mambo a masongola

¹ Mwayila abya byo mwandembejile, kyawama mwanamulume kubula kusongola.

² Bino na mambo a kuchiina bulalelale, mwanamulume yense ekale na mukazhanji, ne mwanamukazhi naye ekale na mwata wanji.

³ Mwanamulume kechi atane mukazhanji mwafwainwa ne, ne mwanamukazhi naye byonkabyo ku mwata wanji.

⁴ Mwanamukazhi wasongolwa kechi uji na luusa lwa pa mubiji wanji mwine ne, kana mwata wanji, kabiji ne mulume naye kechi uji na luusa lwa pa mubiji wanji mwine ne, kana mukazhanji.

⁵ Kechi mwitane anweba bene na bene ne, poso mwaumvwang'ana kimye kimo amba mwipane mu milombelo; kabiji mukasambakane jibiji kuchiina amba, Satana wakemweseka mambo a kubula kwikanya kwenu.

⁶ Byo naamba bino, kechi naamba na kwimukambizha ne, poso kwimubuulatu.

⁷ Byonkabyo inge bantu bonse bajinga pamo byonka byonji amiwa inge natemwa. Bino bantu bonse baji na bya bupe byabo bene byo batambula kwi Lesa bya pusanapusana.

⁸ Babula kwikala mu masongola ne banabakazhi bafwilwa, nebambila namba kibawamina inge baikala byonka byonji amiwa.

⁹ Bino umvwe babula mwakwikainya, bekale mu masongola, mambo kwikala mu masongola kwawama kukila kupya muchima.

¹⁰ Bino ku baji mu masongola nakambizha, kechi mukambizho wami ne, wakwa aye Nkambo, namba mwanamukazhi kechi abane na mwata wanji ne;

¹¹ bino umvwe waabana nanji, ekaletu kusongolwa ne, abwele konka ku mwata wanji; ne mwanamulume naye kechi amukane mukazhanji ne.

¹² Pakuba ku bakwabo amiwa yami naamba kechi Nkambo ne, namba umvwe mulongo wetu umo uji na mukazhi wabula kwitabila, ne aye mwanamukazhi waswa kwikala nanji, kechi amukane ne.

¹³ Kabiji mwanamukazhi uji na mwata wanji wabula kwitabila, ne aye mwanamulume waswa kwikala nanji, kechi amukane mwata wanji ne.

¹⁴ Mambo mwanamulume wabula kwitabila, wazhijikilwa mu mukazhanji, ne mwanamukazhi wabula kwitabila naye wazhijikilwa mu mwata wanji. Inge kechi kyaji byo byo ne, inge baana benu kechi bazhijikwa ne; pakuba pano bazhijikwa.

¹⁵ Pakuba umvwe wabula kwitabila wasaka amba babane, kikale byonkabyo. Aye mulongo wetu nangwa nyenga yetu kechi wakaswa mu mambo a byonkabyo ne. Mambo Lesa wimwiita amba mwikale mu mutende.

¹⁶ Mambo obewa mwanamukazhi wayuka byepi kana ukamupulusha mwata obe? Nangwa obewa mwanamulume wayuka byepi kana ukamupulusha mukazhobe?

Bwikalo bo asaka Lesa

¹⁷ Bonse pa muntu pa muntu bekale bwikalo bwa monka moebapela aye Nkambo, ne monka mo baichilwa kwi Lesa. Byo byo mfunjisha mu bipwilo byonse.

¹⁸ Umvwe muntu waichilwe kasa aji mu mukanda, kechi asake kwaluka ke wabulwa mu mukanda ne; kabiji kana waichilwe kasa abulwa mu mukanda kechi asake kutwezhiwa mu mukanda ne.

¹⁹ Mukanda ye watu ne bumbulwa mukanda nabo bo bwatu; poso kulama mwayila mikambizho ya Lesa.

²⁰ Bantu bonse bekale monka mo bajinga byo baichilwe.

²¹ Umvwe mwaichilwe kasa muji mu buzha, kechi muteko muchima ne; kabiji umvwe mwamona mwa kwalulukila ke mwana bene, kyawama ubai byonkabyo.

²² Mambo aye waichilwe mwi Nkambo kasa aji mu buzha, wa aluka ke mwana bene wa Nkambo, byonkabyo ne aye waichilwe kasa aji mwana bene, naye ye kalume wa Kilishitu.

²³ Mwapotelwe na lupoto kechi mwaluke ke bakalume ba bantu ne.

²⁴ Balongo bami, monka mo mwaichilwe mwikale monkamo na Lesa.

Babula mu masongola ne bafwilwa

²⁵ Kabiji mwayila mambo a babula mu masongola kechi nji na mukambizho wa Nkambo ne, bino naamba mo nalangulukila byonji muntu wa kishinka waubilwa lusa kwi aye Nkambo.

²⁶ Nalanguluka namba, kino kyo kyawama na mambo a bino bya malwa byotujimo namba, kyamuwamina mwanamulume kwikala byonka byo aji.

²⁷ Umvwe mwakaswa ku mwanamukazhi, kechi mukebe kukasuluka ne, umvwe mwabulwa kukaswa na mukazhi, kechi mukebe mukazhi ne.

²⁸ Pakuba nangwa mwasongola kechi mwalenga mambo ne, kabiji ne muzhike naye umvwe wasongolwa kechi walenga mambo ne. Bino bantu baji mu masongola bakamonanga byakatazha, ne amiwa nasaka kwimulamwinako.

²⁹ Balongo bami, naamba kino namba, kimye kyakepa kala, amba kufuma ku kino kimye aba baji na bakazhi bekale nobe bafwabo;

³⁰ kabiji ne aba bajila bekale nobe babula kujila, ne aba basekela bekale nobe babula kusekela, ne aba bapota bekale nobe babulabyo;

³¹ ne boba bengijisha bya pano pantanda bekale nobe babula kwibingijisha, mambo musango wa pano pantanda ubena kupichijila.

³² Bino amiwa nasaka namba anweba kechi mwikale na bya kwimutabankanya ne. Awa wabula kusongola uta muchima wanji ku mwingilo wa Nkambo, amba amutokeshe Nkambo pa muchima.

³³ Pakuba awa wasongola uta muchima wanji ku bya pano pantanda amba amutokeshe mukazhanji pa muchima;

³⁴ mambo watabankana na bintu bibiji. Awa wabula kusongolwa uta muchima ku bintu bya Nkambo, amba ngikale wazhila ku mubiji ne ku mupashi pamo; pakuba awa wasongolwa uta muchima ku bya pano pantanda, mwa kutokeshesha mwata wanji pa muchima.

³⁵ Naamba bino namba nemukwashe kechi na mambo a kwimukanya ne, poso amba mube byonka byafwainwa, kabiji muteshe michima kwi Nkambo kwakubula bya kwimutabankanya.

³⁶ Umvwe muntu walanguluka amba, kechi wamubila bulongo mwananji muzhike ne, inge wakoma kala ke mukulumpe obe monka mo asakila; mwananji ne wamwipanguzha kechi kyatama kwisongola ne.

³⁷ Pakuba umvwe muntu kwakubula kumukanjikizha ne, wapwisha kya kine mu muchima wanji mwine amba, mwanami nkamulama buzhike, aye wauba bulongo.

³⁸ Byonkabyo awa upana mwananji muzhike ku masongola wauba bulongo, bino aye ubula kupana mwanji ku masongola ye waubisha bulongo.

³⁹ Mwanamukazhi wakaswa kimye kyonse kyo akiji mumi mwata wanji, kabiji umvwe mwata wanji wafwa, wakonsha kusongolwa ku yeasaka, bino kana monka mwi Nkambo.

⁴⁰ Pakuba umvwe waikala buzhike byonka byo aji, ukamona lusekelo lwakila. Byo byo ndanguluka amiwa, mambo ne amiwa nji na Mupashi wa Lesa.