1 Kolinda 6 - KNTP

Kwitwala ku bije bena Kilishitu

¹ Kabiji umvwe umo wa mwi anweba uji na mambo na mukwabo, akoseshe muchima wanji ne kuya ku kije, kya babula kwitabila ne kuuba wa twala mambo anji ku bazhijikwa nenyi?

² Nanchi kechi mwayuka amba bazhijikwa bakebachibila mambo ba pano pantanda nenyi? Umvwe ba pano pantanda bakachibilwa mambo kwi anweba, nanchi kechi mwakonsha kuchiba tu mambo tucheche nenyi?

³ Kabiji kechi mwayuka amba tukachiba mambo a bamalaika nenyi? Lelo nanchi bya mu buno bumi kechi tukakijishatu kwibichiba!

⁴ Kabiji umvwe muji na mambo a bya mu buno bumi, mambo ka o mwiatwajila ku babula kunemekwa ku kipwilo?

⁵ Naamba kino namba nemulengeshe bumvu, nanchi mwi anweba kafwamo nangwa umo wa maana wakonsha kwibachibila balongo banji mambo abo nyi?

⁶ Balongo na balongo byo betwala ku kije, nakyo kije kya babula kwitabila?

⁷ Mwauba kala bulema byo mwitwala ku bije anweba bene na bene. Lelo nanchi mambo ka ne kuswatu kubiwa bibi nenyi? Mambo ka ne kuswatu kubepaikwa ne?

⁸ Bino ne anweba bene muba bibi ne kubepaika bantu, nabo balongo benu mwi Nkambo!

⁹ Nanchi kechi mwayuka amba babula koloka kechi bakaswana bufumu bwa Lesa nenyi? Kechi mujimbaikwe ne; nangwa ba bulalelale, nangwa bapopwela bankishi, nangwa bankende, nangwa bekuna na banabalume bakwabo,

¹⁰ nangwa bangivi, nangwa ba lunkumbwa, nangwa ba bitomi, nangwa batukana, nangwa baja bya lunkanankana, kechi bakaswana bufumu bwa Lesa ne.

¹¹ Ne anweba bamo byobyo mwajinga, bino pano bemovwa, bemuzhijika ne kwimubingisha monka mu jizhina ja Nkambo Yesu Kilishitu, ne na Mupashi wa Lesa wetu.

Tumbijikai Lesa mu mibiji yenu

¹² “Bintu byonse byabula kuzhila kwi amiwa” bino kechi byonse byamfwainwa kuuba ne. “Bintu byonse byabula kuzhila kwi amiwa” bino kechi naswa namba nonkwe buzha kwi abyo nangwa ku kimo ne.

¹³ “Kajo ko ka munda, ne munda namo momwa kajo” bino aye Lesa ukebizhimang'anya byonse bibiji. Mubiji kechi ye wa bulalelale ne, ye wa kwa Nkambo, ne Nkambo ye wa mubiji.

¹⁴ Kabiji aye Lesa wamusangwile Nkambo, ye uketusangula ne atweba na bulume bwanji.

¹⁵ Nanchi kechi mwayuka amba, mibiji yenu byo bya mubiji wa Kilishitu nenyi? Ng'angate bya mubiji wa Kilishitu ne kwibyalula ke bya mubiji wa pite nyi? Ine, kabiji akyo ne.

¹⁶ Nanchi kechi mwayuka amba, awa wilamankanya na pite waikala ke mubiji umo ne aye nenyi? Bino aye Lesa wa amba amba, “Abo babiji bakekala ke mubiji umo.”

¹⁷ Pakuba aye walamankana ne Nkambo waikala ke mupashi umo ne aye.

¹⁸ Chiinai bulalelale. Mambo onse o alenga muntu aji pangye ya mubiji; pakuba awa uba bulalelale umulenga mambo mubiji wanji mwine.

¹⁹ Nanchi kechi mwayuka amba, mibiji yenu yo nzubo yazhila ya Mupashi Wazhila, uji mwi anweba ye mwatambula kwi Lesa nenyi? Kechi mwinonka anweba bene ne;

²⁰ mambo mwapotelwe na lupoto. Onkao mambo mutumbijike Lesa mu mibiji yenu.