1 Kolinda 5 - KNTP

Bya bulalelale mu kipwilo

¹ Kine kyaumvwanyika amba, mwi anweba muji bulalelale, naye musango wa bulalelale wabulwa mu Bangentila. Amba umo mukwenu uji na muka shanji!

² Ne anweba mwilundumika ne kuuba bulanda ne, amba awa wauba kino kintu afumishiwe mwi anweba.

³ Bino kine amiwa, nangwa mubiji wami ufwako, muchima wami uji konka, kabiji na muchibila kala mambo awa wauba kino kintu nobe nji konka.

⁴ Mu jizhina ja Nkambo yetu Yesu, byo mukapwila pamo ne muchima wami ukekala ponka na bulume bwa Nkambo yetu Yesu,

⁵ muntu wa byonkabyo mumufikizhe kwi aye Satana amba, mubiji wanji onaike mupashi wanji akapuluke mu juba ja Nkambo.

⁶ Bwitote bwenu kechi bwawama ne. Kechi mwayuka amba, mbizho icheche itutumusha mushinshi yense nenyi?

⁷ Fumyaimo mbizho ya kala mwikale mushinshi mupya byo muji babula mbizho. Mambo Kilishitu, mwana mukooko wetu wa lupitailo, waipayilwe kala.

⁸ Onkao mambo kechi tuje kijiilo na mbizho ya kala ne, nangwa na mbizho ya bumuchima watama ne ya bubi ne, poso na shinkwa wabula mbizho, wa buwame ne wa bukine.

⁹ Nemunembejile mu nkalata yami namba kechi mukwatankane na ba bulalelale ne.

¹⁰ Kechi naamba namba na ba bulalelale ba panopatanda ne, nangwa ba lunkumbwa, nangwa baja bya lunkanankana, nangwa bapopwela bankishi ne, mambo inge byonkabyo, nanchi kyafwainwa ne kufumapo pano pantanda.

¹¹ Pakuba kyo nemunembejile kyo kyo kino namba, kechi mupwanang'ane na muntu watelwa amba mulongo wetu mwi Nkambo umvwe waikala ke wa bulalelale, nangwa wa lunkumbwa, nangwa upopwela bankishi, nangwa utukana ne, nangwa kitomi, nangwa uja bya lunkanankana ne, wa byonkabyo kechi muje nanji ne.

¹² Nanchi kyo kyami kya kwibachibila mambo baji pangye nyi? Anweba nanchi kechi mwafwainwa kwibachibila mambo baji mu kipwilo nenyi?

¹³ Pakuba aba baji pangye Lesa ye wibachibila mambo abo. “Fumyai awa muntu mubi mukachi kenu.”