1 Kolinda 4 - KNTP

Batumwa ba Kilishitu

¹ Bino bantu bafwainwa kwitulangulukila amba, bo bakalume bakwa Kilishitu ne bakalama ba byafyamika bya Lesa.

² Pano bino, bakalama kyafwainwa amba bekale bakishinka.

³ Bino kwi amiwa nangwa napimwa kwi anweba nangwa ku bantu bakwabo, kyo kintu kicheche, kine kabiji nangwa amiwa mwine kechi nepima ne.

⁴ Amiwa kechi nayuka mambo o nji nao ne, nangwa byonkabyo kechi momo nabingila ne, mambo aye Nkambo ye umpima.

⁵ Onkao mambo kechi muchibe mambo kimye kasa kikyangye kufika ne, poso Nkambo waiya. Ye ukasolola patoka bintu byafyamika bya mu mfishi, ne kumwesha bulongo milanguluko ya mu michima, kabiji muntu yense ukamona kutotwa kwi Lesa.

⁶ Anweba bakwetu, bino bintu amiwa mwine pamo ne aye Apolosa twaikala ke ba kumwenako, na mambo a anweba, namba monka mwi atweba mufunde kino amba, kechi mupitaile pa byanembwa ne, namba kafwako nangwa umo wa mwi anweba elundumikile mu umo ne kupelulako mukwabo ne.

⁷ Mambo ng'anyi wakumona amba obewa wakila mukwenu? Kabiji ikika kyo uji naakyo akyo kyo wabujile kutambula? Pakuba umvwe wikitambwile mambo ka kyo witotela nobe wabujile kwikitambula?

⁸ Mwatondwa kala! Mwa aluka kala ke mwi banonshi! Kwa kubula atweba mwa aluka kala ke mwi bamfumu! Kine kabiji ne amiwa namba inge anweba mwajinga bamfumu inge kyawama bingi, inge ne atweba twaikala bamfumu pamo ne anweba.

⁹ Mambo nalanguluka namba, aye Lesa witumwesha atweba batumwa ke bapelaako, nobe bantu bazhatwa nao a lufu, mambo twaalulwa ke kya kutalatala ntanda yonse, ku bamalaika ne ku bantu pamo.

¹⁰ Twi bakosama na mambo a Kilishitu, pakuba anweba mwi bamaana mwi Kilishitu. Atweba twi banekena, anweba mwi bakosa. Anweba mwi bashing'ama pakuba atweba twi baatu babula buneme.

¹¹ Kufika ne ku kyonka kino kimye twikala na nzala ne kilaka, kabiji tuvwala misakila, kabiji tupumwa, kechi tuji na pa kwikala ne;

¹² twingila kyakosa kasa twingila na maboko etu. Pa kunenwa bibi twibapesha, pa kumanyikwa, tutekanya;

¹³ pa kunenwa bya mwenga, tusashijilatu. Twaalulwa ke pamo nobe binchatu bya pano pantanda, nobe mapipo a bintu byonse, kufika ne leelo.

¹⁴ Kechi nanemba bino bintu namba nemulengeshe bumvu ne, poso namba ne mufunde byo muji baana bami bo natemwa.

¹⁵ Mambo nangwa muji na bafunjishi bavula mwi Kilishitu, kechi muji na bashenu bavula ne. Bino mwi Kilishitu Yesu, amiwa yami nemusemene mu Mambo Awama.

¹⁶ Byonkabyo nemusashijila namba mwikale ba kundondela amiwa.

¹⁷ Na onka ano mambo nemutumina Timoti, mwanami wa mwi Nkambo wakishinka ye natemwa, ye ukemuvulula mwayila bwikalo bwami bwa mwi Kilishitu, monka mo mfunjishisha konse konse mu bipwilo byonse.

¹⁸ Anweba bamo mwilundumika nobe amiwa kechi nkeya ko muji ne.

¹⁹ Umvwe Nkambo waswa, amiwa nkeya ko muji palutwe kacheche, kabiji amiwa nkayuka bulume bwabo abo belundumika kechi byambo byabo byonka ne.

²⁰ Mambo bufumu bwa Lesa kechi buji mu byambo ne, poso mu bulume.

²¹ Nanchi mubena kusaka ka? Nkeye ko muji na kamama nyi? Inyi na butemwe ne na muchima wa lusa?