1 Kolinda 3 - KNTP

Lwabano mu kipwilo

¹ Anweba bakwetu, amiwa kechi nakonsheshe kwimwambila anweba byonka byo bambila bantu ba bumupashi ne, pakuba amiwa nemwambijile byonka byo bambila bantunshi, baana balukeke ba mwi Kilishitu.

² Nemujishishe mukaka, kechi kajo kakosa ne, mambo kechi mwakonsheshe kwikaja ne. Nangwatu pa kino kimye kechi mwakonsha kwikaja ne,

³ mambo mukiji mu bwikalo bwa buntunshi. Mambo byo mukiji na kichima ne lutobo mukachi kenu, nanchi kino kechi kyamwesha amba mukiji mu bwikalo bwa buntunshi nenyi? Kechi mubena kuba monka mwendela bantu babula kwitabila nenyi?

⁴ Mambo umo byo amba, amba “Amiwa ne wa kwa Paulo” kabiji mukwabo amba, “Amiwa ne wa kwa Apolosa,” abyo nanchi kechi mwi bantutu nenyi?

⁵ Lelo kabiji Apolosa ye ng'anyi? Ne Paulo naye ye ng'anyi? Bo bamwingilo wa Lesa bo mwaitabijileko, monka mo ebapelejile Nkambo pa muntu pa muntu.

⁶ Amiwa nabyajile, Apolosa watekezhepo, pakuba Lesa ye wiikomesha.

⁷ Kabiji aye ubyala ne aye utekezha bonse bo baatu, kana Lesa yenka wiikomesha.

⁸ Pakuba awa ubyala ne awa utekezha bajitu pamo, mambo bonse pa muntu pa muntu, bakatambula mfweto, au yanji, au yanji, monka mwayila mingilo yabo.

⁹ Mambo atweba twi ba mu mwingilo umo wa Lesa, anweba mwi bujimi bwa Lesa. Anweba mwi kishimikwa kya kwa Lesa.

¹⁰ Monka mwayila bupe bo ampele aye Lesa, amiwa naajile kitendekesho pamo nobe mwine sendwe wayukisha kushimika, kabiji mukwabo naye ushimika ponka. Bino bonse bafwainwa kujimuka byo bashimikapo.

¹¹ Mambo Yesu Kilishitu kyo kyonka kitendekesho kyaalwa kala, kabiji kechi kwalwe kitendekesho kikwabo ne.

¹² Kabiji kana muntu washimikapo ngolode, nangwa siliva, nangwa mabwe a buneme, nangwa bichi, nangwa nsono, nangwa nnenge,

¹³ mingilo ya muntu yense ikasololwa, aja juba jikeimwesha mo yayila, mambo mujilo ye ukeisolola, kabiji mujilo ukeyeseka mingilo ya bonse, kana ya musango ka, kabiji kana ya byepi.

¹⁴ Inge mingilo ya muntu yo ashimikilepo yabula kupya, ukatambula mfweto.

¹⁵ Inge mingilo ya muntu yapya ukakabapotu, bino aye mwine ukapuluka, nakyo kabiji nobe wapita mu mujilo.

¹⁶ Nanchi kechi mwayuka amba, mwi nzubo ya Lesa kabiji Mupashi wa Lesa waikala mwi anweba nenyi?

¹⁷ Umvwe muntu waonauna nzubo ya Lesa, Lesa naye ukamonauna. Mambo nzubo ya Lesa yo yazhila, ne anweba byobyo muji.

¹⁸ Kabiji muntu nangwa umo kechi ejimbaike mwine ne. Umvwe muntu wa mwi anweba walanguluka amba, ye wa maana a pano pantanda, ekale nobe ke wabula maana, pakuba amba, akekale na maana a kine.

¹⁹ Mambo maana a pano pantanda, kwi aye Lesa kechi o maana ne. Mambo kyanembwa amba, “Aye ukwata bamaana mu kujimuka kwabo.”

²⁰ Kabiji amba, “Nkambo wayuka milanguluko ya bamaana amba yo yaatu.”

²¹ Onkao mambo muntu kechi etotele mu bantu ne, mambo bintu byonse byo byenu,

²² nangwa Paulo, nangwa Apolosa, nangwa Kefasa, nangwa pano pantanda, nangwa bumi, nangwa lufu, nangwa bijipo, nangwa bikekalaako, byonse byo byenu,

²³ ne anweba mwi ba kwa Kilishitu, ne Kilishitu ye wa kwa Lesa.