1 Kolinda 2 - KNTP

Kusapwila mambo a lufu lwa Kilishitu pa musalabu

¹ Kabiji anweba bakwetu, amiwa byo naishile kwi anweba na kusapwila byafyamika bya bukine bya Lesa, kechi naishile na byambo bya mulambisha nangwa bya maana ne.

² Mambo napwishishe mu muchima byo najinga ne anweba, namba kechi ngyuke kintu nangwa kimo ne, poso yenka Yesu Kilishitu ne byo apopelwe pa musalabu.

³ Kabiji najinga nenu na kunekena, ne na moyo, ne na kuzakama ku katampe,

⁴ kabiji kwamba kwami ne kusapwila kwami kechi kwajinga mu byambo bya maana nangwa bya mulambisha ne, kwajinga mu kumweka kwa Mupashi wa Lesa ne mu bulume.

⁵ Amba, lwitabilo lwenu kechi lwikale mu maana a bantu ne, poso mu bulume bwa Lesa.

⁶ Nangwa byonkabyo twamba bya maana mukachi ka bantu bakoma. Byonkabyo kechi maana a ba pano pantanda ne, nangwa a ba luusa lwa pano pantanda babenakuya na kuzhimang'ana ne.

⁷ Bino twamba maana a Lesa a mu byafyamika, o afyamikile kala o atongwejile jimo Lesa mu kwituletela lukumo pano pantanda kasa pakyangye kulengwa.

⁸ Ao maana, kafwako nangwa umo ndamakyalo wa pano pantanda wiayukile ne, mambo umvwe beayukile, inge kechi bamupopele pa musalabu Nkambo wa lukumo ne.

⁹ Bino monka mo kyanembelwa amba, “Bintu byabujile kumweka na meso, ne byabujile kumvwanyika na matwi, ne byabujile kutwela mu muchima wa muntu, byo byo ebanengezhezha Lesa bantu bamutemwa.”

¹⁰ Pakuba kwi atweba Lesa wibimwesha na Mupashi. Mambo aye Mupashi ukebakeba byonse, ne bine byazhika bya Lesa.

¹¹ Mambo ng'anyi muntu wayuka biji mu muchima wa muntu mukwabo? Poso mupashi wa muntu mwine uji mwi aye. Mo monka ne bintu bya Lesa nabyo kafwako wibiyuka ne, poso yenka Mupashi wa Lesa.

¹² Kabiji atweba kechi twatambwile mupashi wa pano pantanda ne, poso Mupashi ufuma kwi Lesa amba, tuyuke bintu byo twapewatu kwi Lesa.

¹³ Byo bino byotwamba, kechi mu byambo bifunjisha maana a bantu ne, poso bifunjisha Mupashi, kasa tulumbulula bintu bya bumupashi ku boba ba bumupashi.

¹⁴ Kabiji muntu wabula Mupashi, kechi utambula bya Mupashi wa Lesa ne, mambo kechi byo bya maana kwi aye ne. Kabiji kechi wakonsha kwibiyuka ne, mambo kumvwisha kukebewa na bukwasho bwa Mupashi wa Lesa.

¹⁵ Pakuba aye uji na Mupashi upima byonse, bino aye mwine kechi bamupima ku muntu nangwa umo ne.

¹⁶ Mambo kyanembwa amba, “Ng'anyi wayuka muchima wa Nkambo? Ng'anyi wakonsha kumubuula bya kuuba?” Bino atweba tuji na muchima wa Kilishitu.