1 Kolinda 16 - KNTP

Bya bukwasho ku bakajilwa

¹ Pano mwayila kupana bya bupe bya kukwasha bazhijikwa, ne anweba muubile monka monalayijile bipwilo bya mu Ngalatiya.

² Mu juba jitanshi ja milungu yonse, bonse pa muntu pa muntu kasa mutujila jimo bya bupe monka mo mwashukilwa, kuchiina amba mukakonkanye bya bupe kimye kyo nkeya.

³ Kabiji byo nkafika, bonka bo mukatongola bo bo nkatuma na makalata a kwibalumbulula kutwala bya bupe byenu ku Yelusalema.

⁴ Umvwe kyamfwainwa amiwa kuya, bakaya ne amiwa.

Kufuukula kwa Paulo kwa lwendo lwanji

⁵ Bino amiwa nkeya ko muji, byo nkapwisha kupita mu Makedonya, mambo naketekela kupita mu Makedonya.

⁶ Kabiji kampe nkekala nenu ne mu bang'ondo ba mashika, pakuba amba mukanshinjikinyeko pa lwendo lwami lwa konse konkaya.

⁷ Mambo pano kechi nasaka kwimumonatu mu lwendo ne, umvwe Nkambo waswa naketekela kwikala nenu kimye kyabaya.

⁸ Nkekala ku Efisesa kufika ne ku kimye kya Pentekosta.

⁹ Mambo kibelo kikatampe kya kwingijilamo mingilo ikatampe kyanshinkukila, nangwa kuji balwanyi bavula.

¹⁰ Kabiji umvwe Timoti wafika koko, mukekale nanji bulongo, mambo ye wamwingilo wa Nkambo pamotu ne amiwa.

¹¹ Kechi muleke nangwa umo amusuule ne, kabiji mukamukwashe mu lwendo lwanji akende mu mutende, akabwele kuno, mambo naketekela namba ukeya pamo na balongo bakwabo.

¹² Bino na mambo a mulongo wetu Apolosa, namusashijile bingi namba akeye ko muji pamo na balongo bakwabo, kabiji aye kechi waswile kwiya katataka ne, bino ukeya pa kumona mwa kwishila.

Byambo byapelaako

¹³ Labainga ne kukenkenta, koselai mu lwitabilo, mwikale bachinchika, kosai.

¹⁴ Byonse byomuba, kasa mwibyubila mu butemwe.

¹⁵ Pano anweba bakwetu, mwayuka ba kisemi kya kwa Setefanusa amba bo batanshi baitabijile mu Akaya, kabiji mwayuka ne byo baata michima yabo mu kwibengijila bazhijikwa,

¹⁶ nemusashijila namba mwibanekenene ba byonkabyo, ne bonse bakwasha mu mwingilo ne kwingila.

¹⁷ Kabiji nasekela pa kwiya kwa kwa Setefanusa, ne Fotunatusa ne aye Akayikusa, mambo abo bapingakena mwi anweba mu kubulwako kwenu.

¹⁸ Mambo bekizha muchima wami ne wenu pamo, onkao mambo mwibanemeke abo.

¹⁹ Bipwilo bya mu Asha bimwimuna, ne Akwila, ne Pilisila ne kipwilo kipwila mu nzubo yabo, nabo bemwimuna kya kine, kine!

²⁰ Ne balongo bonse bemwimuna. Mwiimune anweba bene na bene na lwimu lwazhila.

²¹ Amiwa nemunembela lwimu lwami na kuboko kwami amiwa mwine Paulo.

²² Umvwe muntu wabula kutemwa Nkambo, afingwe mafingo! Nkambo yetu mwiye!

²³ Bupe bwa Nkambo yetu Yesu Kilishitu bwikale ne anweba.

²⁴ Butemwe bwami bwikale ne anweba bonse mwi Kilishitu Yesu.