1 Kolinda 15 - KNTP

Lusanguko lwa Kilishitu

¹ Anweba bakwetu, pano nasaka kwimuvulula Mambo Awama o nemusapwijile, o mwatambwile, kabiji o emwimika ne kwimukosesha.

² Onka emusapwijilwe mo mwamwena lupulukilo umvwe mwiakwachisha, kana umvwe mwaitabijile kyatuutu.

³ Amiwa natambwile byakila mu buneme ne kwibifikizha kwi anweba, namba Kilishitu witufwijile na mambo etu monka mwayila binembelo;

⁴ ne kuzhiikwa, kabiji wasangukile mu juba ja busatu monka mwayila binembelo;

⁵ kabiji wamwekele kwi Kefasa, ne ku ba jikumi na babiji.

⁶ Kepo amwekele ne ku balongo kukila bitota bitanu pa kimye kimo, bavula bakiji bomi ne buji lelo, pakuba bamo bafwa kala.

⁷ Kabiji palutwe wamwekele kwi Yakoba, ne ku batumwa bonse.

⁸ Kyapeleleko, wamwekele ne kwi amiwa, nobe mwana wasemwa pa kimye kyabula kufwainwa.

⁹ Mambo amiwa ne muchechetu pa batumwa, kechi nafwainwa kutelwa butumwa ne, mambo namanyikile kipwilo kya Lesa.

¹⁰ Pakuba na bupe bwa Lesa, amiwa naikala byonji lelo, ne bupe bwanji bo ampele kechi bwaji bwatu ne, bino naingijilenga kwibakila bonse, byonkabyo kechi na bulume bwami ne, poso bupe bwa Lesa buji ne amiwa.

¹¹ Nangwa amiwa, nangwa batumwa bakwabo, imo motusapwila, kabiji imo mo mwaitabijile.

Lusanguko lwetu

¹² Umvwe tusapwila amba, Kilishitu wasangwilwe mu bafu, anweba bamo kika kyo mwambila amba, kafwako lusanguko lwa bafu?

¹³ Pakuba umvwe kafwako lusanguko lwa bafu, nanchi Kilishitu naye kechi wasangwilwe ne;

¹⁴ kabiji inge Kilishitu kechi wasangukile ne, inge kusapwila kwetu ko kwatu, ne lwitabilo lwenu nalo lo lwatu.

¹⁵ Kine, ne atweba inge twaikala ke batumonyi ba bubela twamubepela Lesa, mambo twashimwine amba, Lesa wamusangwile kilishitu, yeabujile kusangula inge kya kine bafu kechi basangulwa ne, nanchi Kilishitu naye kechi wasangwilwe ne.

¹⁶ Mambo bafu kechi basangulwa ne, nanchi Kilishitu naye kechi wasangwilwe ne.

¹⁷ Kabiji umvwe Kilishitu kechi wasangwilwe ne, inge lwitabilo lwenu lo lwatu, mukiji mu mambo enu.

¹⁸ Kokuuba amba, ne boba bafwila mwi Kilishitu inge ne abo baonaika.

¹⁹ Umvwe twaketekela mwi Kilishitu na mambo a buno bumi bonka, twibakila bantu bonse mu kushamwa.

²⁰ Bino kya kine Kilishitu wasangwilwe mu bafu, ke wa nsomo wa mu boba bafwa.

²¹ Mambo lufu lwaishile kupichila mu muntu umo, ne lusanguko lwa bafu nalo lwaishile kupichila mu muntu mukwabo.

²² Mambo bonse byonka byo bafwile kupichila mwi Adama, byo byo bakamwena bumi bonse kupichila mwi Kilishitu.

²³ Bino luno lusanguko luji na ndonda, Kilishitu ye wa nsomo, apa bino ke boba ba kwa Kilishitu pa kukeya kwanji.

²⁴ Ponkapo ke kumpelo, Kilishitu byo akapwisha konauna bufumu bonse, ne luusa lonse, ne bulume bonse, ukafikizha bufumu kwi Lesa Taata.

²⁵ Mambo kyafwainwa aye kwikala mfumu poso bakabiike balwanyi banji bonse munshi ya maulu anji.

²⁶ Mulwanyi ukapelaako konaunwa lo lufu.

²⁷ Mambo binembelo byaamba amba, “Lesa wabiika Bintu byonse munshi ya maulu anji.” Kyaambiwatu bulongo byo kyaamba amba “bintu byonse,” kufumyako Lesa mwine, aye wabiika bintu byonse munshi ya maulu a Kilishitu.

²⁸ Kabiji Kilishitu byo aji na luusa lwa pa bintu byonse, ne aye Mwana naye ukebiika munshi ya Shanji, amba Lesa ekale byonse mu byonse.

²⁹ Pano, nanchi lubatizhilo lwa boba bantu ba batizhiwa na mambo a bafu lwayila muka? Umvwe bafu kechi basangulwa ne, mambo ka kyo ba batizhiwa na mambo a bafu?

³⁰ Ne atweba mambo ka bya malwa bitunyeng'amina bimye byonse?

³¹ Anweba bakwetu, naamba kya kine monka mwayila kwitota kwami ko netotela mwi anweba mwi Kilishitu Yesu Nkambo yetu, namba mona lufu pa juba pa juba.

³² Ikika kyo nkamwenamo umvwe nalwilenga na “Bijanyi” ku Efisesa? (Naambatu monka mwambila bantu,) umvwe kafwako lusanguko lwa bafu, nanchi byonka byo bamba amba, “tuje ne kutoma mambo kesha tukafwa.”

³³ Kechi mujimbaikwe ne. “Kwendazhana na babi konauna byubilo byawama.”

³⁴ Buukai mwikale batekanya ne baoloka. Mambo bamo kechi bamuyuka Lesa ne, naamba bino namba nemulengeshe bumvu.

Mubiji wa Lusanguko

³⁵ Pakuba umo ukepuzha amba; “Nanchi bafu bakasanguka byepi? Bakekala na mubiji wa musango ka?”

³⁶ Obewa kilubi, inge wabyala lukunwa mu mushiji, kechi akamene ne poso patanshi wafwa.

³⁷ Kabiji obewa ubyalatu lukunwa, nangwa wa wichi, nangwa wa mutundu mukwabo, kechi ubyala akya kijimbwa kikakoma ne.

³⁸ Bino Lesa wikipa mubiji yeasaka mwine; aye upana mubiji ku nkunwa yonse.

³⁹ Mibiji ya bintu bipeema kechi yonse iji musango umo ne, kuji imo ya bantu, imo ya ba nyama, imo ya bang'onyi, ne imo ya masabi.

⁴⁰ Kabiji kuji ne mibiji ya mwiulu ne ya pano panshi, kabiji lukumo lwa mwiulu lwa pusana na lukumo lwa pano panshi.

⁴¹ Kuji lukumo lwa juba, ne lukumo lwa ng'ondo, ne lukumo lwa tubangabanga, bino kabangabanga kamo kapusana mu lukumo na kakwabo.

⁴² Ne lusanguko lwa bafu byo byo luji. Wabyalwa ubola, wasangulwa ubula kubola.

⁴³ Wabyalwa wa bumvu wasangulwa wa lukumo, wabyalwa wanekena, wasangulwa wa bulume.

⁴⁴ Pa kubyalwa, ye mubiji wa buntunshi, pa kusangulwa ye mubiji wa bumupashi, umvwe ko aji mubiji wa buntunshi, ko aji ne mubiji wa bumupashi.

⁴⁵ Mambo kinembelo kyaamba amba, “Muntu mutanshi, Adama, waalukile ke muntu mumi.” Bino Adama wapelaako waalukile ke mupashi upana bumi.

⁴⁶ Bino awa wa bumupashi kechi ye wajinga mutanshi ne, kana wa buntunshi, apa bino ke wa bumupashi.

⁴⁷ Muntu mutanshi walengelwe ku lukungu lwa panshi, muntu wa bubiji wafumine mwiulu.

⁴⁸ Byonka byajinga muntu walengelwe ku lukungu lwa panshi, ne boba bapanshi byo byo baji. Kabiji byonka biji wa mwiulu, ne ba mwiulu byo byo baji.

⁴⁹ Kabiji byonka byo twapashang'ana nayewa walengelwe ku lukungu lwa panshi, byo byo tukapashang'ana nanji awa wafumine mwiulu.

⁵⁰ Pano nemwambila anweba bakwetu namba, mibiji ya nyama ne mashi kechi yakonsha kuswana bufumu bwa Lesa ne, kabiji kubola kechi kwakonsha kuswana kubula kubola ne.

⁵¹ Ng'umvwai, nemubuule kyafyamika, bonse kechi tukalaala tulo ne, bino bonse tukalulwa,

⁵² mu kakimye kacheche, pamo nobe kukopa kwa jiso. Mambo ntolompita yapelaako ikavuma, ne bafu bakasangulwa ke babula kubola, ne atweba tukalulwa.

⁵³ Mambo uno ubola wafwainwa kuvwala ubula kubola, ne uno wa lufu wafwainwa kuvwala ubula kufwa.

⁵⁴ Pakuba uno ubola byo akavwala ubula kubola, ne uno wa lufu byo akavwala ubula kufwa, ponkapo kino kinembelo kikafika amba, “Lufu belumina ku lushinjilo!”

⁵⁵ “Obewa lufu, kushinda kobe kuji pi?” “Obewa lufu, lumuna obe uji pi?”

⁵⁶ Bundengamambo ye lumuna wa lufu, ne bulume bwa bundengamambo yo mizhilo.

⁵⁷ Bino sante ekale kwi Lesa, ye witupa lushinjilo mwi Yesu Kilishitu Nkambo yetu!

⁵⁸ Onkao mambo, balongo bami batemwe, ikalai bashikamatu, kutelengela ne, kasa mukelwa kwingila kyakosa mwingilo wa Nkambo, byo mwayuka amba, mwingilo wetu wa mwi Nkambo kechi ye watu ne.