1 Kolinda 14 - KNTP

Bupe bwa bungauzhi ne kwamba mu njimi

¹ Londelai butemwe, byonkabyo sakishai bya bupe bya bumupashi, bino kine kyakila kyo mwafwainwa kusakisha ke kya kwaula.

² Aye wamba na lujimi ungi kechi wibambila bantu ne, wambila Lesa, mambo kafwako muntu umvwa ne, bino mu Mupashi aye wamba byafyamika.

³ Pakuba aye waula, wambila bantu mu kwibakomesha, ne kwibatundaika, ne kwibatekenesha.

⁴ Awa wamba mu lujimi ungi wikomesha aye mwine, pakuba awa waula ukomesha kipwilo.

⁵ Nasaka namba, inge anweba bonse mwamba mu njimi ingi, pakuba kine kyakila namba mwaule. Mambo awa waula ye wakila yewa wamba mu njimi ingi, kana kwaikala umo wa kulumbulula amba kipwilo kikomeneko.

⁶ Anweba bakwetu, umvwe naiya ko muji kasa ng'amba mu njimi ingi, kika kyo mukamwenamo mwi amiwa? Poso nemwambila mu lumwekesho, nangwa mu maana, nangwa mu bungauzhi nangwa mu lufunjisho.

⁷ Byonka biji bintu bya bula bumi, mutolilo nangwa kyansa pakuvuma umvwe mvumino yabyo ne kupusana ne, kikayukanyikwa byepi amba baimba mutolilo nangwa kyansa?

⁸ Kabiji umvwe ntolompita ivuma kivumevume ng'anyi usakwinengezha amba ke nkondo?

⁹ Byonkabyo ne anweba umvwe mwamba na njimi byambo byabula kumvwanyika, kikayukanyikwa byepi kyo mwamba? Abyo mwambatu bya mu mwela!

¹⁰ Kabiji pano pantanda paji misango yavula ya milaka, bino yonse iji na moyumvwanyikila.

¹¹ Pakuba umvwe nabula kuyuka moayila mulaka, nkekala ke ungitu kwi aye wamba, kabiji ne aye wamba naye ukekala ke ungitu kwi amiwa.

¹² Ne anweba, byo musakisha kwikala na bya bupe bya bumupashi, nanchi sakishai byakonsha kukwasha kukomesha kipwilo.

¹³ Onkao mambo awa wamba mu lujimi ungi, alombe amba, amone mwa kumulumbulwila.

¹⁴ Mambo umvwe nalomba mu lujimi ungi, mupashi wami ulomba bino maana ami kechi amwenamo kintu ne.

¹⁵ Nanchi ngube byepi? Nkalomba na mupashi, bino nkalomba na maana, nkemba na mupashi, bino nkemba na maana.

¹⁶ Umvwe mwasanta na mupashi, awa mwenyi ye muji nanji ukamba byepi amba “Amena” pa kusanta kwenu byo abula kuyuka byo mwa amba?

¹⁷ Kine mwasanta bulongo, bino mukwenu kechi kya mukwasha ne.

¹⁸ Amiwa nasanchila Lesa, mambo nemukila anweba bonse mu kwamba mu njimi ingi.

¹⁹ Nangwa byonkabyo kyo natemwako mu kipwilo, kyokya kwamba byambo nangwa bitanutu, mu maana ami namba ne bafunjishe bakwetu, kukila kwamba byambo biumbi jikumi mu lujimi ungi.

²⁰ Anweba bakwetu, kechi mwikale banyike mu maana ne, pakuba mu bubi mwikale balukeke, bino mwikale bakoma mu maana.

²¹ Mu buku wa mizhilo kyanembwa amba, “Na bantu ba njimi ingi, ne na byatunwa bya bangi. Nkebambila bano bantu, kabiji nangwa byonkabyo kechi bakang'umvwa ne.” Byo byaamba Nkambo.

²² Byonkabyo nanchi njimi ingi kyo kiyukilo, ku babula kwitabila, kechi ku baitabila ne, pakuba kwaula na Mupashi kyo kiyukilo ku baitabila, kechi babula kwitabila ne.

²³ Byonkabyo umvwe kipwilo kyonse kyapwila pamo ne bonse kebambe mu njimi ingi, kabiji mwatwela bantutu nangwa babula kwitabila, kechi bakamba amba mwakonya nenyi?

²⁴ Pakuba umvwe bonse baula, kabiji mwatwela muntu wabula kwitabila nangwa muntutu, ukashiinwa ne kupimwa ku bonse,

²⁵ ne byafyamika bya mu muchima wanji bikasololwa, ne aye ukafukama panshi na kumulambila ne kumupopwela Lesa, kabiji ukamba amba, “Kine Lesa uji mukachi kenu.”

Bintu byonse byubiwe mundonda mu kipwilo

²⁶ Balongo bami, nanchi tusa kwamba amba ka? Byo mupwila pamo, umo uji na lwimbo, mukwabo uji na lufunjisho, ne mukwabo uji na lumwekesho, mukwabo naye wamba mu njimi, kabiji mukwabo uji na kya kulumbulula byambo. Byonse byubiwe mu kwikomesha.

²⁷ Umvwe kuji bamba mu njimi ingi, bambe babiji nangwa basatu, bino kukila pa basatu ne, kasa balondankana, kabiji umo alumbululenga.

²⁸ Bino inge kafwako wa kulumbulula, bonse bazhindame mu kipwilo, beambile bene ne kwisamba ne Lesa.

²⁹ Kabiji bangauzhi nabo bambe babiji nangwa basatu, bino bakwabo be byeseke byo ba amba.

³⁰ Umvwe lumwekesho lwamweka ku mukwabo ye aikala nanji, mutanshi azhindame.

³¹ Mambo bonse kyawama kwaula umo, umo, amba bonse bafunde kabiji batundaikwe.

³² Mipashi ya bangauzhi ikookela bangauzhi ba Lesa.

³³ Mambo Lesa kechi ye Lesa wa kiwowo ne, ye wa mutende. Byonka byo kyubiwa mu bipwilo byonse bya bazhijikwa,

³⁴ banabakazhi bazhindame mu bipwilo. Mambo kechi kyaswishiwa abo kwamba ne, bino abo bekale ba kunekenena, mwayila mizhilo.

³⁵ Bino umvwe kuji kyo basaka kuyuka, bepuzhe bamwata wabo ku mazubo. Mambo kyokya bumvu mwanamukazhi kwamba mu kipwilo.

³⁶ Nanchi mambo a Lesa afumine kwi anweba nyi? Nangwa amba, aishiletu kwi anweba yenka nyi?

³⁷ Umvwe muntu wilanguluka mwine amba ye ngauzhi wa Lesa, nangwa amba ye wa bumupashi, etabe amba, abino bintu byo nemunembela byo byakambizha Nkambo.

³⁸ Bino umvwe wibilengulula, ne aye naye walengululwa.

³⁹ Onkao mambo balongo bami, sakishai kwaula na Mupashi bino kechi mukaanye kwamba na njimi ingi ne.

⁴⁰ Pano bino, bintu byonse mwibyube na mushingi ne mo byalondankena.